اشترك
Buy Neuth France products

9 طرق بسيطة لتخفيف ألم الولادة

0

كل ست في الدنيا من اول مابتعرف انها حامل بتكون متشوقة اوي انها تشوف ابنها او بنتها اللي هييجوا للدنيا وبتستني اللحظة اللي هتشيل فيها طفلها علي ايديها وبتقعد تتخيل في شكله،لكن مع قرب معاد الولادة بيكون في افكار بتدور في فكر كل واحدة حامل عن صعوبة الولادة وألمها وياتري ألم الولادة بيكون صعب اوي كده وغير محتمل زي مابنشوفه في المسلسلات والافلام العربي ولا ايه،وبتزيد المخاوف والافكار دي عند السيدة الحامل اكتر لما بتكون متقدمة في السن وكمان في حالة الحمل بتوأم،تابعينا لو عايزة تعرفي معانا شوية افكار بسيطة تساعدك في تخفيف ألم الولادة وكمان لو تعرفي واحدة قربت تولد تقدري تساعديها بالافكار دي.
1-حاولي تبعدي عن الضغوط:
بالرغم من ان البعد عن الضغوط ومسبباتها حاجة من الصعب جدا ان اي حد يقدر يعملها لكن مهم جدا ليكي خصوصا قرب موعد الولادة انك تحاولي تبعدي عن مصادر الضغوط ،حاولي تتعاملي مع المشاكل بهدوء وبدون توتر لان التوتر مش هيسهل حل المشكلة لكن هيتعبك انتي وهيخلي الولادة اصعب وهيكون له اثار جانبية مش كويسة لصحة طفلك.
2-مارسي تمارين خفيفة:
مهم جدا ليكي مع قرب معاد الولادة انك تخلي ممارسة التمارين الرياضية حاجة اساسية بالنسبة ليكي في روتينك اليومي،بعض التمارين زي المشي في هوا نقي بتقلل من متاعب الولادة ووجع الضهر والام انتفاخ الكاحلين وكمان مفيدة لقلب الطفل ،وكمان التمارين اللي بتساعد علي تقوية عضلات الحوض مهمة جدا ليكي لانها بتساعدك اكتر علي تحمل ألم الولادة وبتهيأ جسمك للولادة،ولازم تاخدي رأي الدكتور اللي بيتابع حالتك في نوعية التمرينات المناسبة ليكي قبل ممارستها علشان متمارسيش اي تمرين بشكل مش صح يضر صحتك انتي وطفلك.
3- اتنفسي بعمق:
التنفس بعمق عن طريق الانف بيساعدك جدا في تخفيف الام الولادة ومهم لصحة طفلك لانه بيديكي الاكسجين الضروري جدا لصحتك وحيوية الطفل،لما تحسي بانقباض في الرحم جربي انك تاخدي شهيق من الانف وبعدين تستني ثانيتين وبعدين تطلعي زفير وبعدين تستني ثانيتين وتعملي نفس الحكاية لما تحسي بالانقباض اللي بعده.
4-ماتسمعيش حكايات سلبية عن الولادة:
في امهات كتير بيحبوا يحكوا عن موقف الولادة اللي مروا بيه وازاي تعبوا واتألموا،لو اضطريتي انك تسمعي الكلام ده بلاش تطبقيه علي حالتك وتخليه يشغل تفكيرك لان الاحساس بألم الولادة بيختلف من حالة للتانية وممكن اوي ولادتك تكون سهلة عنهم،لاحظي ان تفكيرك في حكاياتهم السلبية عن الولادة  هو من اكتر الحاجات اللي بتخلي ألم الولادة صعب،لو لاقيتي التفكير في ألم الولادة مسيطر عليكي فكري في حاجة تانية مختلفة.
5-اعملي تدليك بانتظام:
من بعد نهاية الشهر السابع من الحمل اعملي تدليك بشكل منتظم لضهرك و للمنطقة اسفل المهبل،ده مهم جدا لتخفيف ألم الضهر والمفاصل وانقباض العضلات قبل الولادة .
6-دفي نفسك كويس:
من افضل الطرق اللي بتساعد في تخفيف ألم الولادة عليكي هي انك تسترخي في حمام المية الدافية،ده بيقلل جدا من احساسك بالالم مع انقباضات الرحم.
7-جربي انك تسترخي علي جنبك:

انك ترتاحي علي جنبك وبعدين تتحركي بعد شوية وترتاحي علي الجنب التاني ده بيقلل من متاعب الولادة وكمان بيخليها اسرع .

8-اهتمي بترطيب جسمك:
ترطيب جسمك من خلال شرب المية والسوايل بيخفف جدا من احساسك بالتقلصات اثناء الولادة.

9-اتكلمي مع الدكتور اللي بيتابعك:
خلال متابعاتك مع الدكتور اثناء الحمل وقرب معاد الولادة اتناقشي معاه بخصوص ظروف الولادة وافضل الامكانيات المتاحة لتقليل متاعب الولادة عليكي،لو حسيتي ان الدكتور مش مقدر قلقك من متاعب الولادة ومعندوش خطة كويسة تخفف من ألم الولادة بالنسبة ليكي يبقي شوفي مكان تاني انسب وممكن تسألي الناس اللي تعرفيهم عن افضل المستشفيات المناسبة ليكي اللي فيها امكانيات متاحة لتخفيف ألم الولادة.

 

Share.

Comments are closed.