اشترك
Buy Neuth France products

9 أخطاء لازم تتجنبها في بداية الارتباط بالبنت

0

مرحلة التعارف بينك وبين اي بنت  اللي بتيجي قبل الارتباط الرسمي بتعتبر من اهم المراحل في معرفتك بالبنت دي لانها المرحلة اللي كل واحد فيكم بيتعرف فيها علي طباع وسلوكيات التاني علشان يقدر يقرر اذا كان ده الشخص المناسب ولا لأ واذا اخدتوا القرار انكم تستمروا في الارتباط تعرفوا ازاي هتتعاملوا مع بعض وكل واحد فيكم يقدر يكسب التاني,لكن علشان التعارف والارتباط بينكم يستمر بشكل صح في شوية اخطاء هنقولك عليها ولازم تتجنبها.

1-انك تركز بس علي الشكل الخارجي للبنت:

كتير من الشباب بيتشدوا اوي للبنت اللي بتجذبهم بجمال ملامحها وشكلها الخارجي بدون مايهتموا بشخصية البنت وطريقة تفكيرها,ماتخليش شكل البنت من برة ينسيك انك تتعرف علي طباعها وشخصيتها,لاحظ ان جمال الشكل مش هو بس اللي بينجح الارتباط لكن لازم تهتم انك تشوف طباع البنت دي وتفكيرها وشخصيتها تناسبك ولا لأ.
2-انك ترسم لها صورة مثالية عن نفسك:
من اكبر الاخطاء اللي ممكن يقع فيها  الشاب في بداية التعارف مع البنت هي انه يرسم صورة مثالية عن نفسه,علشان كده بلاش تدعي انك مثالي في كل حاجة وخالي من العيوب لان في الحالة دي ممكن البنت تلاحظ انك بتبالغ في الصورة اللي بترسمها عن نفسك وممكن تزهق من مبالغاتك,خليك واضح وصريح يعني قولها عن عيوبك ومميزاتك بشكل طبيعي علشان تخليها تقدر تفهمك وتتعامل معاك صح ولاحظ ان مفيش انسان مفيهوش عيوب لكن مهم جدا انك تركز علي نقط قوتك وتنميها.
3-انك تتفادي الاختلاف معاها:
اختلافك في الرأي مع البنت اللي بتتعرف عليها ده شئ طبيعي وعادي مش غلط انك تتجنبه بس المهم انك تعرف ازاي تختلف معاها بذوق وبأسلوب راقي لان تفادي الاختلاف معاها في البداية ممكن يسبب مشاكل بينكم بعد كده,بمجرد تسوية الخلاف بهدوء كل طرف منكم هيرتاح والموضوع هيعدي وهتعرفوا ازاي تحلوا خلافاتكم صح في المرات اللي جاية.
4-انك تحكم علي البنت من غير ماتسمعها:
بلاش تاخد فكرة عن تصرفات وتفكير البنت اللي قدامك من خلال كلام سمعته عنها من حد او من خلال فكرتك عن بنت كنت مرتبط بيها قبل كده,ادي البنت اللي قدامك فرصة تعبرلك عن نفسها واتعامل معاها علي اساس الفكرة دي مش من خلال مؤثرات خارجية.
5-المبالغة في تقديم الهدايا:
جميل انك تعبر للبنت اللي قدامك عن تقديرك واحترامك ليها بس مش مفضل المبالغة في تقديم الهدايا  لان ده هيعود البنت علي كده وهتبقي مشكلة لو في مرة مقدمتش ليها هدية,لاحظ انك بعد الجواز هيبقي عندك مصاريف ومسئوليات كتيرة وهيكون صعب عليك انك تستمر في تقديم الهدايا كل شوية,قدملها هدية من وقت للتاني بس بدون مبالغة ومش ضروري تكون حاجة غالية قوي قد ماتكون حاجة هي بتحبها ومحتاجاها,وعلي فكرة مش لازم انك تقدم الهدية بس في الاعياد لان ده بيخليها روتينية لكن حلو انك تفاجئ البنت في الهدية في يوم هي مش متوقعاها فيه.
6-انك تسيبها هي تختار كل حاجة:
مش  كل ماتخرجوا تسيبها هي تختار كل حاجة زي المكان اللي هتروحوه والفيلم اللي هتتفرجوا عليه او الاكل اللي هتاكلوه،البنت عموما بتحب تحس ان الشخص اللي معاها يقدر يخطط و ياخد قرارت ويكون شخصية قيادية,ممكن مثلا في مرة تخليها هي تختار والمرة اللي بعدها انت تختار.
7-انك تبالغ  في كلام الحب:
تعبيرك للبنت عن حبك ليها مهم وجميل لكن المبالغة في التعبير عن الحب بالكلام طول الوقت بيخلي الكلام يفقد قيمته ومعناه و بيخلي البنت تتعود علي كده و تمل منك,خليها تتشوق انها تسمع منك الكلام ده من وقت للتاني.
8-انك تخبي حاجات مهمة:
الصراحة مع البنت اللي انت بتتعرف عليها مهمة جدا خصوصا في الامور اللي ليها علاقة بأحوالك المادية والصحية واذا كنت مرتبط قبل كده,لاحظ انك لو ماكنتش صريح معاها في الاساسيات دي هتفضل طول الوقت قلقان انها تعرفها من حد تاني وهتبقي حاجة مش لطيفة في حقك لو هي عرفتها من حد غريب بعد ارتباطكم,لكن لو صارحتها هتحترمك جدا لصراحتك وهتكبر في نظرها.

9-انك تتوقع انها هتتغير حسب رغبتك:
لو لاحظت في البنت اللي قدامك ان ليها طباع وتصرفات انت متحبهاش في شريكة حياتك بلاش تقول لنفسك انك هتغيرها مع الوقت علي مزاجك لانك هتكون بتخدع نفسك,هي ممكن تتغير لو هي عايزة تتغير مش علي حسب رغبتك,كلمها بصراحة عن الطباع اللي بتريحك واللي مش بتريحك وشوف اذا كان عندها الاستعداد انها تتقبل اللي انت عايزه ولا لأ.

Share.

Comments are closed.