اشترك
like Sofy on Facebook

7 افكار للتعامل مع غضب طفلك

0

مفيش طفل في الدنيا الا وبيغضب في مواقف كتيرة وطبعا غضب طفلك الصغير احيانا بيسببلك احساس بالتوتر والضيق والاحراج خصوصا في لما تاخديه معاكي  في زيارة منزلية او مناسبة عامة وبتخافي ان نوبات غضب طفلك تضايق الناس اللي انتي قاعدة معاهم وياخدوا انطباع عن طفلك انه مزعج ومشاغب وبتقلقي من ان طفلك في غضبه يكسر حاجة او يضر نفسه,لكن ممكن بطرق بسيطة تقدري تتعاملي مع غضب طفلك بذكاء ومن غير مشاكل وتحتفظي بهدوئك في نفس الوقت.

1-لازم تحتفظي بهدوئك علي قد ماتقدري:

طفلك وهو في حالة الغضب بيكون محتاج جدا لحد يهديه ويحسسه بالامان علشان كده طول مانتي متوترة مش هتقدري تهدي طفلك بالعكس هتنقليله احساسك بالتوتر,خدي نفس عميق لثواني قبل ماتشوفي هتعملي ايه.

2-اتأكدي ان طفلك بياخد احتياجاته بشكل طبيعي:
ممكن يكون غضب الطفل بسبب انشغالك عنه لفترة ويمكن بسبب ان في حاجة بتوجعه او في مشكلة في الهضم عنده او بسبب مروره بمرحلة التسنين او اذا كان محتاج لتغير ملابسه ويمكن عايز ينام او جعان,لو خرجتي ومعاكي طفلك لازم تعملي حسابك انك تاخدي معاكي اكلة خفيفة ومهم جدا انك تعوديه مع الوقت علي النوم في مواعيد منتظمة .

3-بلاش تقولي لطفلك (لا) بدون توضيح السبب:
لو طفلك طلب منك حاجة وقولتيله لا يبقي لازم تفهميه سبب رفضك مهما كان طفلك صغير,قوليله بهدوء انتي ليه رافضة الحاجة دي بأسلوب مبسط وعلي قد سنه لان كلمة لا بدون سبب بتثير غضب طفلك,لو مثلا في مرة كنتي معاه في محل وطلب منك حلويات وانتي مش عايزاه ياكلها عشان مضرة بلاش تقولي لا, قوليله طب هجيبلك حاجة احلي ومفيدة اكتر ولو سمع كلامك امدحيه.

4-اصرفي انتباه طفلك عن اللي مضايقه:
ممكن تصرفي انتباهه عن سبب غضبه بإنك تفتحيله التلفزيون علي قناة مشوقة ليه وخليكي دايما جاهزة بلعبة بيحبها او فيديوهات علي موبايلك تشد انتباهه,كل دي حاجات ممكن تشغل طفلك عن الحاجة اللي مضايقاه وهتنجدك لو طفلك بدأ يغضب وهو معاكي برة البيت.

5-ماتخليش غضب طفلك يدفعك لمعاملة مختلفة له قدام الاغراب:
طفلك ممكن يقصد انه يعمل نوبات غضب برة البيت وهو عارف انك هتنفذي له اللي هو عايزه بسبب خوفك من انه يعمل دوشة قدام الناس,علشان كده بلاش وانتي مع طفلك برة البيت تستجيبي لطلباته اللي مش بتوافقي عليها وانتو لوحدكم,لانه هيستغل وجودكم برة البيت علشان يعمل نوبات غضب يحقق بيها رغباته.

6-ابعديه عن مكان الحاجة اللي ضايقته:
لو طفلك بدأ في نوبة غضب بسبب حاجة ضايقته ممكن تشيليه بلطف وتبعديه عن المكان اللي شاف فيه حاجة ضايقته لانه بكده هينسي الحاجة دي وهيهدأ اسرع.

7-شجعيه يحسن من سلوكه:
اوعديه بمكافأة بأي حاجة بيحبها لو حاول يحسن من سلوكه ويقلل من غضبه,لانه من الصعب جدا ان الطفل يبقي هادي طول الوقت من غير ما يكون في حافز له يشجعه علي كده.

Share.

Comments are closed.