اشترك
Buy Neuth France products

6 خطوات لازم تعرفهم عشان تذاكر صح

0

المذاكرة شئ مهم و ضرورى جدا لكل شخص علشان يقدر يتعلم كويس و يبنى مستقبل عملى مناسب لجهده و قدراته ، مفيش حد معداش على سنين طويلة من المذاكرة و الامتحانات ، و لأن كل الطلبة بيقضوا وقت طويل جدا فى المذاكرة  فلازم تعرفوا إزاى تذاكروا صح و تعرفوا كمان شوية نصايح تساعدكم على تقضية وقت المذاكرة من غير تعب أو ملل

  • هيأ جو مناسب للمذاكرة :
    جهز مناخ مناسب للمذاكرة و مريح نفسيا و جسمانيا ليك ، لو قدامك مادة طويلة أو امتحان بعد وقت قصير أكيد بتبقى حاسس  إن قدامك هم كبير زى الجبل ، خد نفس عميق و هدى نفسك شوية قبل ما تبدأ فى المذاكرة
    فكر فى الحاجات إللى بتحب تعملها و إنت بتعمل نشاط معين بتستمتع بيه زى فيلم حلو بتحب تتفرج عليه أو و إنت بتقرا كتابك المفضل ، فكر إزاى بتهيأ الجو من حواليك عشان تستمتع بالنشاط دة مثلا بتحب تبقى ممدد على كنبة أو سرير أو بتتحرك كل شوية ، تحب تشرب نسكافيه أو عصير أو تاكل سناك لذيذ ، ملابس مريحة بتحب تلبسها ، أيا كان إللى بتحب تعمله فى وقت ممارستك للأنشطة الممتعة اعمله و إنت بتذاكر عشان تبقى المذاكرة ممتعة أكتر بالنسبة لك ، لو الجو إللى حواليك مريح جسديا و نفسيا هتقدر تذاكر و إنت مرتاح
  • جهز مكان مريح فى وقت المذاكرة :
    اخلق مكان مناسب و مريح للمذاكرة ، مش لازم يكون شبه المكتب بتاع الشغل لأنك بكدة ممكن تشعر بالملل ، جهز المكان المناسب و المريح ليك انت زى المكتوب فى الفقرة إللى فاتت ، و خلى كل الأدوات إللى بتحتاجها أثناء المذاكرة فى مكان قريب منك علشان متضطرش إنك تقوم كل شوية و تشتت تركيزك عشان تجيب الأدوات إللى انت عايزها
  • اهتم بالإنجاز :
    حدد أفضل الطرق إللى تساعدك على الإنجاز فى المذاكرة و الواجبات إللى عليك ، مفيش طريقة واحدة تساعدك على إنجاز مهامك فى المذاكرة لكن انت أكتر واحد تقدر تحدد الطريقة المناسبة ليك ، المذاكرة زيها زى أى مهارة تانية بتحتاج وقت و مجهود وصبر ، ذاكر يوميا ومتستناش الامتحان خليك مستعد دايما بالمذاكرة و المراجعة الأسبوعية ، مهم كمان تعرف إن وقت الراحة مهم جدا زى وقت المذاكرة بالظبط  ( 10 دقايق راحة كل 30 دقيقة مذاكرة ضرورى جدا عشان تقدر تواصل مذاكرتك ) ، وفى وقت الراحة متنساش تكافئ نفسك بحاجة بتحبها
  • اعرف مفتاح ذاكرتك :
    عشان تعرف تذاكر صح لازم تعرف ذاكرتك بتشتغل إزاى ، الذاكرة دايما بتخزن المعلومات إللى بتذاكرها فى البداية والنهاية أكتر من المعلومات إللى بتذاكرها فى النص ، فلو حاولت تفتكر معلومة معينة هتلاقى نفسك لا إراديا بتفتكر النقاط الموجودة فى الأول و فى الأخر فى البداية وبعد كدة هتبدأ تفتكر باقى المعلومات بصعوبة أكتر ، دى حاجة مش هتقدر تغيرها لأن دى الطريقة إللى دماغنا بتشتغل بيها و بالتالى متحاولش تحاربها لكن استخدمها لصالحك على أساس إنك تنظم مذاكرتك بحيث إنك تذاكر المعلومات الأكثر أهمية بالنسبة فى البداية والنهاية و المعلومات الأقل أهمية فى النص
  • اهتم بالتخطيط و التنظيم أثناء المذاكرة :
    فى كل مهمة الأفضل دايما وضع خطة و دراسة الخطة كويس قبل البدء فى العمل ، دة ينطبق على مستوى الأفراد و المؤسسات و الدول كمان ، فبالتأكيد مهم جدا إنك تعمل خطة قابلة للتنفيذ و شاملة عشان تقدر تغطى كل الحاجات إللى محتاج تذاكرها ، عشان تقدر تخطط لمذاكرتك قسم المهمة الكبيرة لمهام صغيرة و حدد لكل مهمة وقت محدد مثلا لو عندك كتاب كبير المفروض تذاكره قسمه لفصول و حدد وقت معين لكل فصل ،و استخدم المهمات الصغيرة زى أحجار البناء إللى بتستخدم فى النهاية لبناء مبانى ضخمة ، الذاكرة زى البيت عشان تقدر تلاقى المعلومة أسرع لازم تخزنها بشكل منفصل عن غيرها عشان كدة حاول تقسم المواضيع المهمة على أكتر من مرحلة و يكون كل موضوع مترابط علشان تقدر تفتكره بسهولة و ممكن تستخدم كلمات مضحكة أو تلحن المعلومات عشان تقدر تحفظ أسرع و تثبت المعلومة فى ذاكرتك
  • استخدم أسلوب الخرائط الذهنية :
    الخرائط الذهنية هى عبارة عن رسوم أو أشكال و جداول توضيحية ممكن تستخدمها كمخطط يوضح كل المعلومات الأساسية فى الموضوع إللى بتذاكره ، أهمية الطريقة دى هى التعرف على تسلسل المعلومات فى الموضوع و كمان تسهيل حفظها و تخزينها فى الذاكرة ، عشان تصمم خريطة ذهنية ابدأ باستخدام العنوان الرئيسى فى الموضوع و بعده العناوين المتفرعة منه و ملاحظات بالمعلومات و النقاط المهمة تحت كل عنوان و أى معلومات تانية شايف إنها مهمة ، عمل الخرائط الذهنية سهل جدا و تقدر تنفذه بسهولة و هتكتشف قد إيه الطريقة دى هتوفر عليك تعب ووقت كتير بتقضيه فى المذاكرة بالطريقة التقليدية

Share.

Comments are closed.