اشترك
Buy Neuth France products

6 افكار مش صح لازم تغيرها

0

كل انسان في الدنيا بيكون عنده افكار ومعتقدات وعادات بيفكر فيها وبيؤمن انها صح وعادية,لكن في الحقيقة مش كل الافكار والعادات اللي بنؤمن بيها وبنعملها  بتكون صح,و بعضها بيكون مش مظبوط وللاسف بتأثر بشكل سلبي علي نفسيتنا واحيانا علي حياتنا ككل علشان كده المفروض اننا نحاول نعالج الافكار الغلط دي ونصلحها.

افكار غلط المفروض نصلحها:

1-الحاضر اللي احنا عايشينه دايما دليل علي المستقبل:
كتير من الناس لما بيكونوا مش راضيين عن حاجة في الحاضر اللي بيعيشوه بيتصوروا ان المستقبل هيكون اسوأ,لكن الغريب انهم مش بيفكروا بنفس المنطق لو الامور في الحاضر ماشية كويس,علشان كده لازم لما تصادفك في الواقع بتاعك حاجة مش مريحاك حاول انك ماتسترجعش كتيرالموقف اللي مش مريح اللي حصل و احاسيسك السلبية تجاهه لانك لو فضلت تفكر كده المستقبل مش هيتغير للاحسن بالعكس جايز نظرتك السلبية دي تأثر علي مستقبلك تأثير سلبي.

2-لسة بدري علي ماقدر اعمل تغيير:
التفكير ده مش صح ابدا لان الحياة مش بتمشي علي وتيرة واحدة او جدول زمني محدد, والحقيقة ان الضغوطات اللي بنقابلها في البيت والشغل والمجتمع بتأثر علينا جدا بالسلب علشان كده لو حسيت ان في حاجة في اسلوب حياتك في شغلك او علاقاتك او اي حاجة في حياتك بتضغط عليك بشكل بيفوق طاقتك وبيأثر علي صحتك بلاش تأجل التغيير,لازم تعرف انك تقدر تغير ظروفك للاحسن لو انت عايز ويكون عندك الشجاعة انك تعمل ده والا هتفضل عمرك كله في معاناة.

3-الوحدة مشكلة:
المنطق ده غلط جدا لان ومش مفروض ابدا انك تتعامل مع اشخاص مش مريحين ليك بسبب الخوف من الوحدة,علشان كده لازم يكون عندك حكمة في اختيار الناس اللي بترتبط معاهم بعلاقات سواء كانت العلاقات دي صداقة او حب او اي نوع من العلاقات وترتبط بالاشخاص اللي يكونوا مناسبين ليك ويقدروا يسعدوك ويغيروا فيك للاحسن,ولاحظ انه مش عيب ابدا انك تكون لوحدك بالعكس وجودك لوحدك فترة بيخليك تقدر تعرف نفسك افضل وتحدد انت عايز ايه في حياتك وتاخد قراراتك بشكل يناسبك مش تحت ضغط من حد.

4-انك تتصور انك تقدر توصل للكمال:
الحقيقة ان مفيش حاجة ولا حد في الدنيا كامل ومناسب ليك 100% طول الوقت علي مستوي الشغل والصداقة والحب ومكان السكن,ممكن اوي تكون منبهر في البداية بشغلك او اصحابك او حبيبك لكن مع الوقت وكتر التعامل تكتشف ان شغلك واصحابك وحبيبك مش هيكونوا كاملين 100% طول الوقت,اكيد مع الوقت والتعامل هتكتشف فيهم عيوب لكن مع شوية صبر وحكمة وتفهم هتقدر تتعايش معاهم .
5-الاعتقاد ان تصرفات الناس معاك دايما رد فعل لتصرفاتك:
انت بتغلط غلط كبير في حق نفسك لما بتفتكر ان تصرفات اللي حواليك معاك باستمرار ليها علاقة بتصرفاتك,في الواقع ان تصرفاتهم معاك مش بتبين تفكيرك وكلامك وتصرفاتك انت قد مابتبين تفكيرهم وخبراتهم وتجاربهم هما,لكن ده مش معناه انك ماتهتمش بفكرة الناس عنك وتفتكر انك خالي من العيوب لا لكن معناه انك ماتخليش طريقة تعامل الناس معاك تشغلك بزيادة وتكون محور حياتك  لان ده سبب تعب وحيرة ناس كتير,افضل حاجة انك تخلي تعاملات الناس معاك تبنيك وتخليك تتطور من نفسك من غير ماتفقد سلامك وهدوئك ونظرتك الايجابية لنفسك وللحياة.
6-تصور انك لازم تبقي سعيد وناجح باستمرار:
التصور ده هو سبب احساسك بالتعاسة,في الحقيقة ان السعادة والنجاح مش بيفضلوا علي طول وبرضه الحزن والفشل مش بيستمروا,علشان كده بلاش تقارن مرحلة من حياتك كنت فيها سعيد او ناجح بمرحلة مريت فيها بإحباطات, ولاحظ ان الاحباطات دي عبارة عن خبرات هتساعدك في حياتك واعرف انه لولا الحزن والفشل مش هتحس بقيمة النجاح والسعادة والصحة.

Share.

Comments are closed.