اشترك
like Sofy on Facebook

5 فوايد للحموم بالمية الباردة

0

مفيش حد فينا الا وبيستمتع جدا بالحموم بالمية السخنة خصوصا في الايام اللي بتكون برد جدا في الشتا لدرجة ان فكرة الحموم بمية باردة في الشتا بيبقي شئ غريب جدا وصعب علي ناس كتير انها تعمل كده ,لكن في الحقيقة ان الحموم بالمية الباردة له فوايد كتيرة جدا تستحق اننا نهتم بيها.

فوايد الحموم بالمية الباردة:
1-تقوية المناعة وتنشيط الدورة الدموية:

المية الباردة بتساعد في تنشيط الدورة الدموية في الجسم وده مفيد جدا لصحة القلب  وكمان بتقوي الجهاز المناعي للجسم ضد الاصابة بالامراض.

2-مفيد للجلد وجمال الشعر:
الحموم بالمية السخنة بيسبب الجفاف للجلد والشعر,لكن المية الباردة بتحمي الجلد والشعر من الجفاف لانها بتساعد علي توازن افراز الزيوت في الجسم وده بيحافظ علي نعومة الجلد ولمعان الشعر وبيحافظ علي نضافة فروة الراس.

3-بيزود النشاط:
كتير واحنا بناخد دوش بالمية السخنة بنحس بصعوبة في انهاء الحموم بسبب استمتاعنا الشديد بالمية السخنة وبتبدأ المشكلة لما يكون جسمنا دافي اوي بسبب سخونة المية وبعدين نخرج برة الحمام للجو البارد وبتزيد احتمالات الاصابة بنزلات البرد ،لكن المية الباردة بتمد الجسم بالنشاط والطاقة لانها بتزود ضربات القلب و بتخليك تتنفس بعمق وده بيزود امتصاص الاكسجين المهم جدا للجسم.

4-بيحمي من الضغط النفسي والاكتئاب:

الحموم بالمية الباردة بيريح جدا من الشعور بالاجهاد غير كده  بيزود من مضادات الاكسدة المفيدة لصحة الجسم وكمان بيساعد في تقليل الاحساس بالاكتئاب والتوتر .

5-بيريح من الام المفاصل:
مهم جدا للاشخاص الرياضيين او اللي بيهتموا بممارسة الرياضة في روتين حياتهم اليومي انهم ياخدوا دوش بالمية الباردة بعد مايخلصوا ممارسة الرياضة لان ده بيحميهم جدا من الام والتهابات العضلات والمفاصل اللي بتحصل بعد ممارسة الرياضة .

ازاي تقدر تاخد دوش بالمية الباردة:
-ابدأ بالمية الفاترة:
حاول تعود جسمك بالتدريج علي المية الباردة بإنك تبدأ الاول بالمية الفاترة وبعدين تبرد المية مع الوقت ومش لازم المية تكون باردة جدا علشان جسمك يستفاد منها المهم انها تكون متوسطة البرودة.

-بل جسمك بالمية من تحت لفوق:
الاول ابدأ بإنك تصوب الدوش علي رجليك لانها اكتر منطقة هتستحمل المية الباردة في البداية و اطلع فوق بالدوش بالتدريج من اول البطن والدراعين لحد ماتوصل لراسك, بس خليك حريص انك ماتبلش الانف او الفم علي طول لانك هتكون بتتفس بسرعة ,واخر منطقة المفروض انك تعرضها للمية الباردة هي ضهرك بعد ماتنتهي من كل المناطق لان الضهر هو اكتر منطقة حساسة للتعرض للمية الباردة وبكده هتكون اخدت دوش بالمية الباردة.

Share.

Comments are closed.