اشترك
like Sofy on Facebook

5  طرق سهلة لتحسين نظامك الغذائى

0

لو قررتى إنك تتبعى نظام غذائى معين عشان تخسى هتلاقى أنظمة ريجيم مختلفة وكتيرة جدا فى رحلة بحثك عن النظام الغذائى الأمثل ليكى ، وكل نظام غذائى بيوعدك بإنه يفقدك عشرات الكيلوجرامات ويوصلك للوزن المثالى إللى بتحلمى بيه ، دة غير النظريات و الأراء المختلفة حول العناصر الغذائية المهمة إللى جسمك محتاجها و الأطعمة إللى تديكى إحتياجك من العناصر الغذائية المختلفة وكمان النسبة الأمثل للسعرات الحرارية إللى إنتى محتاجاها . أحيانا مع إختلاف الأراء و الأفكار إللى بتسمعيها بخصوص أفضل نظام غذائى يساعدك على التخسيس وإللى يساعدك على الحصول على كل العناصر الغذائية إللى جسمك محتاجها ممكن كل دة يصيبك بالتوتر والتردد حول معرفة أى رأى هو الأصح و الأفضل بالنسبة ليكى

فى المقالة دى هنساعدك بخطوات بسيطة على تحسين نظامك الغذائى من غير ما تحسى بتعب أو إرهاق نظم الريجيم المعتادة و كمان إزاى تبدأى وتكملى نظامك الغذائى بطريقة صحيحة

حقيقتين مهمين عن نظامك الغذائى :

الحقيقة الأولى هى إن اتباع نظام غذائى صحى مش شئ معقد أبدا

و الحقيقة التانية إن أهم شئ للحصول على صحة جيدة وفقدان وزن بطريقة صحية هو إنك تتعودى على إكتساب العادات الصحية بصورة تدريجية وكمان إنك تكونى محتفظة بدافع قوى جواكى يساعدك على اكتساب العادات الصحية و الاستمرار فيها

عشان تستمتعى بصحة جيدة و وزن مثالى إنتى مش محتاجة إنك تتبعى نظام غذائى قاسى أو تعملى تمارين شاقة بالنسبة لك . تحسين نظامك الغذائى ممكن جدا بل يجب إنه يكون تدريجى وسهل . لأن سهولة النظام الغذائى وقابليته للتنفيذ هو أكتر شئ ممكن يساعدك على الإستمرار فيه .

خلى بالك إن صحتك هى نتاج عاداتك مع الوقت ، ممكن تاكلى قطعة كيك أو شيكولاتة مرة فى الشهر من غير ما نظامك الغذائى يبوظ أو تحسى بالذنب ، ممارسة رياضة المشى مرة أسبوعيا ممكن يقلل من التأثير الضار للوجبات السريعة على جسمك .ممكن متحسيش بتغيير كبير فى نظامك اليومى لكن خطوات بسيطة ممكن تعمل فرق كبير فى صحتك مع الوقت

 

  • ابدأى يومك بشرب المياه :

أول ما بتصحى من النوم جسمك بيكون فى أشد احتياج للمياه . شرب المياه مهم جدا للعديد من العمليات الحيوية فى الجسم ، ومن أهم العمليات الحيوية فى جسمك إللى بتعتمد على المياه :

  • شرب المياه يساعد فى عملية الهضم
  • يساعد فى تحسين وظائف الدماغ
  • يساعد فى توصيل العناصر الغذائية المهمة لجسمك و طرد السموم من الجسم
  • يساعد فى تنظيم الإشارات العصبية من و إلى الدماغ
  • شرب المياه فى الصباح يساعد فى تحسين عملية الحرق ويساعدك على بداية يوم جديد وجسمك نضيف من السموم والشوائب الناتجة عن العمليات الحيوية إللى بتحصل أثناء النوم
  • ضيفى ثمرة خضار أو فاكهة فريش لكل وجبة بتاكليها :

مرة تانية مش لازم فجأة تتحولى من نظامك الغذائى المعتمد على الوجبات السريعة والمعلبات لأنك تكونى إنسانة نباتية أو بتتبعى عادات غذائية صارمة . تناولك لثمرة خضروات أو فاكهة مع كل وجبة هيساعدك على الحصول على كمية أكبر من الفيتامينات ، اشربى 2/1 لتر من المياه يوميا

  • قللى من توترك و إحساسك بالضغط :

لو أكلتى وإنتى مضغوطة جدا دة مش هيساعدك على تنظيم عملية الهضم فى جسمك وبالتالى مش هتقدرى تحصلى على كل القيمة الغذائية من أكلك ، لما بتكونى متوترة ومضغوطة بتقل عملية إنتاج اللعاب و بالتالى بتبطئ عملية الهضم فى جسمك ويقل إفراز إنزيمات الهضم فى جسمك و دة بيخليكى عايزة تاكلى أكتر و أسرع

  • احتفظى بجدول يبين محتويات وجباتك إللى أكلتيها طول الأسبوع :

زيادة وعيك بصحتك من المفاتيح الهامة للوصول لهدف الصحة الجيدة والوزن المثالى ، أوقات كتير بنخدع نفسنا وبنقنع نفسنا إننا ماشيين على نظام غذائى مظبوط بس فى الحقيقة بنكون بنرتكب أخطاء كتيرة جدا من غير ما ناخد بالنا ، التزامك بكتابة محتويات وجباتك كل يوم هيساعدك تعرفى كام مرة أخليتى فيها بنظامك الغذائى طول اليوم ، كام مرة أكلتى بواقى الأكل بتاعة ولادك و كام مرة أكلتى قطعة شيكولاتة أو قطعة كيك ، اهتمامك بمعرفة محتويات وجباتك وقرايتها كويس مش غرضه إنك تحسى بالذنب لكن علشان تقدرى تاخدى بالك أكتر من اختياراتك اليومية فى الأكل

  • ضيفى قبل ما تشيلى :

أخيرا ، متركزيش على أنواع الأكل إللى المفروض تتوقفى عن تناولها أو تقلليها ، لكن ركزى على أكلات و وصفات لذيذة و صحية تشجعك على الاستمرار فى نظامك الغذائى الجديد . تركيزك على الامتناع عن الأكلات غير المفيدة هيزود احساسك بالحرمان و دة شعور خطير جدا ممكن يقلل من التزامك بالنظام الغذائى

أفكار تساعدك على كسر الروتين فى نظامك الغذائى :

  • جربى أنواع مختلفة من عصاير الفواكه الطبيعية
  • اخترعى أنواع سلطات و تتبيلات مختلفة ومميزة بالنسبة لك
  • دورى على الانترنت أو اشترى كتب طبخ مهتمة بالأكل الصحى و طبقى وصفات جديدة

حاولى انك تقرنى نظامك الغذائى الصحى بأكلات و وصفات لذيذة و مع الوقت هتبدأى تحسى بإنك مبسوطة بنظامك الجديد وهيكون من الصعب عليكى انك ترجعى لنظامك الغذائى القديم

Share.

Comments are closed.