اشترك
Buy Neuth France products

5 اسباب لقلق الاطفال بالليل

0

ان الطفل ينام نوم هادي ومتواصل بالليل بشكل طبيعي ده حلم عند كل ام لكن للاسف بيكون صعب انه يتحقق طول الوقت لان في عوامل كتيرة احيانا بتأثر علي نوم الطفل بانتظام بالليل وطبعا ده بيعمللك مشكلة في نظام يومك وبتحسي بإرهاق في بعض اوقات اليوم علشان مانمتيش بانتظام بالليل,اعرفي معانا شوية اسباب بتخلي طفلك يقلق بالليل وايه هو الحل للمشكلة دي.

اسباب صحيان الاطفال بالليل:
1-النوم في مواعيد مش مناسبة:
احيانا الطفل ممكن ينام في وقت بدري  خلال اليوم  وده بيخليه مش بينام بعمق بالليل,لو عايزة تعالجي الموضوع ده خليه ينام كل يوم متأخر ولو نص ساعة هتلاقي ان قلقه بالليل بيقل بالتدريج,وساعديه يقلل وقت النوم بتاع فترة بعد الضهر لان ممكن يكون ده السبب اللي بيخليه يقلق بالليل,ممكن تقللي من وقت نومه فترة الضهر بإنك تفتحي الستاير وتدخلي النور او تعملي صوت عالي جنب الاوضة علشان ميطولش في النوم في المعاد ده.

2- الاحساس بالجوع:
حتي لو طفلك كبر علي الرضاعة فهو برضه لسة بينمو بسرعة شديدة عن الكبار وده بيخلي نشاط المخ عنده اكتر من الكبار,مخ الاطفال بيحتاج نسبة جلوكوز اعلي مرتين من اللي بيحتاجوها الكبار علشان كده الاطفال يصحوا بالليل,لو طفلك بيصحي بالليل بسبب الجوع ممكن تديله وجبة خفيفة او مكسرات او زبادي لان دي حاجات هتساعده ينام بتواصل اكتر,اهتمي دايما ان طفلك ياكل كويس خلال اليوم علشان يحصل علي السعرات الحرارية اللي بيحتاجها لان حرمان جسمه من السعرات الحرارية بيخليه يقلق بالليل.

3-المرض:
ممكن طفلك يكون مصاب بمرض هو اللي بيسببله القلق بالليل زي الكحة اللي ممكن تكون مؤشر للاصابة بالحساسية او انقطاع النفس اثناء النوم اللي اكيد بيقلقه بالليل,لو هو ده السبب يبقي لازم تستشيري دكتور اطفال بخصوص حالة طفلك.

4-العوامل الخارجية:
في عوامل خارجية خاصة بظروف الاوضة اللي بينام فيها الطفل ممكن تأثر علي انتظام نومه بالليل زي مثلا وجود جيران بيعملوا دوشة او اذا كانت اوضة الطفل بتبص علي شارع عمومي وده مصدر الازعاج او اذا كان في مروحة شغالة في الاوضة عاملة صوت عالي او اذا كانت درجة حرارة الاوضة مش مناسبة,علشان كده حاولي تخلي جو الاوضة هادي ومناسب لنوم الطفل.

5- الانفصال في اوضة لوحده:
لما طفلك بيكبر شوية وبيتعدي المرحلة اللي بينام فيها معاكي وبيبدأ ينام لوحده اكيد ده بيخليه يحس بخوف من تغييرالروتين اللي اتعود عليه انه ينام وميلاقيكيش جنبه,المرحلة دي بتحتاج منك شوية صبر لحد ماطفلك يبدأ يتعود علي الوضع الجديد وممكن في بداية نومه في اوضة لوحده تخلي باب اوضته مفتوح علشان يحس انك قريبة منه وهتجيله وقت مايحتاجك.

 

Share.

Comments are closed.