اشترك
Buy Neuth France products

10 طرق تساعدك على زيادة معدل الحرق

0

زيادة معدل الحرق أكتر حاجة بيفكر فيها الأشخاص المهتمين بالتخسيس ، لكن سرعة الجسم فى حرق الدهون و السعرات الحرارية بيعتمد على عوامل مختلفة ، بعض الأشخاص بيكون معدل الحرق عندهم أسرع من غيرهم ، و بصفة عامة معدل الحرق عند الرجال بيكون أكبر منه عند السيدات ،عند معظم الناس معدل الحرق بيقل تدريجيا بعد بلوغ ال 40 ، و على الرغم من إنك متقدرش تتحكم فى عمرك أو جنسك أو جيناتك الوراثية ، لكن تقدر تحسن من معدل الحرق عندك لو اتبعت الطرق إللى فى المقالة دى

  • ابنى عضلات :

جسمك بيحرق دهون طول الوقت حتى و انت قاعد من غير حركة ، لكن معدل الحرق بيزيد عند الأشخاص إللى عندهم عضلات ، كل باوند عضلات بيستخدم 6 سعرات حرارية فى حين إن كل باوند من الدهون بيستخدم 2 سعر حرارى فقط يوميا ، الفرق الصغير دة هيفرق معاك جدا مع الوقت ، بعد ممارستك لتمارين بناء العضلات عضلاتك هتنشط فى جسمك كله و هتزود معدل الحرق عندك

  • زود ممارسة التمارين الرياضية :

تمارين الأيروبكس مش بتخليك تبنى عضلات لكن بتساعدك على زيادة معدل الحرق خصوصا فى الساعات التالية لممارسة التمارين ، كل ما زاد وقت و كثافة التمارين كل ما زادت سرعة الحرق عندك

  • اشرب مياه كتير :

جسمك محتاج للمياه عشان يقدر يحرق الدهون ، لو جسمك محتاج مياه معدل الحرق هيقل تلقائيا ، فى دراسة كشفت إن الأشخاص إللى بيشربوا أكتر من 8 أكواب مياه يوميا معدل الحرق عندهم أكبر من الأشخاص إللى بيشربوا 4 أكواب ، عشان تحصل على نسبة المياه إللى إنت محتاجها ، اهتم انك تشرب كوب مياه قبل كل وجبة أو سناك ، جرب تخلى السناكس بتاعتك عبارة عن فواكه و خضروات لأنها بتحتوى على كميات كبيرة من المياه بدل المعجنات أو البطاطس المقلية

  • جرب مشروبات الطاقة :

بعض مشروبات الطاقة بتحتوى على بعض المكونات إللى بتساعد على زيادة معدل الحرق ، مشروبات الطاقة بتحتوى على كافيين بنسبة كبيرة جدا و دة بيزود من معدل الطاقة إللى بيستهلكها الجسم و بالتالى بيزيد معدل الحرق ، لكن فى نفس الوقت بتؤدى لحدوث بعض المشكلات التانية زى ارتفاع ضغط الدم و مشكلات فى النوم و قلق و مش بينصح بيها للأطفال و المراهقين

  • اختار وجباتك الخفيفة بعناية :

تناول الأكل على فترات متقاربة بيساعد على زيادة معدل الحرق ،لو أكلت وجبات قليلة بكميات كبيرة و قعدت ساعات طويلة من غير ما تاكل حاجة ، معدل الحرق هيقل فى الفترة بين الوجبات ، اهتم بتناول وجبة خفيفة كل 3 أو 4 ساعات عشان تزود معدل الحرق كمان تناول الوجبات الخفيفة هيديلك شعور بالشبع و بالتالى هتاكل كميات أقل فى وقت الوجبة الرئيسية

  • جرب الشطة فى الأكل :

الأكل الحراق بيحتوى على مواد طبيعية ممكن تزود معدل الحرق بشكل كبير جدا ، استخدام معلقة صغيرة من الشطة فى الأكل أو استخدام الفلفل الأخضر الحامى ممكن يحسن من معدل الحرق ،و على الرغم من إن التأثير بيكون مؤقت لكن لو انت من محبى الأكل الحراق هتستفيد جدا من استخدامك للشطة فى أكلك

  • زود حصتك من البروتين :

الجسم بيستخدم سعرات حرارية أعلى أثناء عملية هضم الطعام المحتوى على بروتين ، كجزء من النظام الغذائى الصحى استبدل جزء من حصتك من الكربوهيدرات بالبروتينات الموجودة فى اللحوم الحمراء و لحم الديك الرومى و الدواجن و الأسماك و البيض و منتجات الألبان قليلة الدسم و المكسرات و البقوليات

  • اشرب فنجان قهوة :

لو كنت من محبى القهوة فأكيد بتستمتع بطعمها و ريحتها و كمان التركيز و الطاقة إللى بتحصل عليها بعد تناولك لفنجان القهوة ، واحدة من فوايد القهوة هى زيادة معدل الحرق لفترة بسيطة ، الكافيين بيساعد على تخفيف التعب و الإجهاد و بيزود تحملك أثناء ممارسة التمارين الرياضية

  • جدد طاقتك بكوب من الشاى الأخضر :

شرب الشاى الأخضر أو الشاى الصينى بيديلك مزيج من فوايد الكافيين و مضادات الأكسدة ، شرب الشاى الأخضر بيحسن معدل الحرق لمدة ساعتين ، الدراسات كشفت إن شرب من 2 – 4 كوب من الشاى الأخضر يوميا بدلا من الشاى العادى بيزود معدل الحرق بنسبة 17% لكن بشرط ممارسة الرياضة

  • تجنب أنواع الريجيم الضارة :

جسم المرأة بيحتاج أقل من 1200 سعر حرارى ، وجسم الرجل بيحتاج أقل من 1800 سعر حرارى فى اليوم الواحد ، لازم نظامك الغذائى أو الريجيم إللى بتتبعه يكون بيوفرلك السعرات الحرارية إللى جسمك محتاجها ، أنواع الريجيم الضارة مش بس هتأذى جسمك و هتحرمك من العناصر الغذائية الضرورية لكن كمان هتقلل معدل الحرق و بمجرد توقفك عن الريجيم جسمك هيكتسب وزن زايد أكتر من الأول

Share.

Comments are closed.