اشترك
Buy Neuth France products

10طرق للتغلب علي ضغوطات العمل

0

مفيش انسان بيشتغل الا وبيحس في وقت من الاوقات انه مضغوط نفسيا وعصبيا خصوصا لو كان لسة جديد في الشغل او لو طبيعة شغله فيها ضغط عصبي ومسئوليات كبيرة او شغله فيه نظام الورديات الليلية اللي اكيد بتأثر علي الساعة البيولوجية للجسم,طبعا كل العوامل دي بتأثر علي الصحة العامة للانسان وكمان بتأثر في علاقته باللي حواليه تأثير سلبي بالذات لو كان مسئول عن اسرة,تابعنا لو عايز تعرف ازاي تتغلب علي ضغوطات العمل وتقدر تكون مبسوط في شغلك وصحتك وعلاقاتك باللي حواليك يكونوا افضل.
1-بلاش قلق:
بمجرد مايخلص وقت الشغل بتاعك ماتقعدش تفكر في هتعمل ايه بكرة في الشغل او تسترجع اي موقف سخيف حصل في الشغل النهاردة,سيب شغل بكرة ليوم بكرة واستمتع بالباقي من يوم النهاردة ,لاحظ ان القلق والتفكير في بكرة مش هيغيره للاحسن لكن هيتعبك وهيحرمك من الاستمتاع بحياتك.

2-فكر بإيجابية:
حاول تشوف ايه هي المميزات اللي في شغلك وتفكر فيها واتجنب انك تتأثر بكلام الزمايل السلبي عن بعضهم وعن المديرلان مش دايما كلام زمايلك هيكون صح ويمكن انت تشوف الامور بشكل مختلف عن غيرك.
3-اتجنب مبدأ:انا هعمل كل حاجة صح:
بلاش تنقد نفسك بقسوة علي كل غلطة تعملها في الشغل لان لومك لنفسك بزيادة مش هيصلح الغلط بالعكس ممكن يزود المشكلة,لاحظ ان الغلط اللي بتعمله مرة بيحسن من قدرتك علي التصرف بعد كده لانه بيديك خبرة.

4-رفه عن نفسك بعض الوقت:
شئ جميل انك تكون مخلص وجد في عملك لكن مش عيب ابدا انك من وقت للتاني تضحك وترفه عن نفسك من غير مبالغة ولو في وقت الراحة لان ده مهم جدا لصحتك وادائك لعملك.

5-عيش حياتك:
ماتخليش شغلك هو كل حياتك,خلي ليك اهتمامات تانية في حياتك الخاصة زي هواية مفضلة بالنسبة ليك او وقت تقضيه مع ناس بتحبهم,كل ده مهم جدا لصحتك البدنية والنفسية وهيساعدك انك تنجز في شغلك.

6-اسمع مزيكا:
سماع الموسيقي الهادية بيهدي الاعصاب وبيدي شعور بالسعادة وبيريح الجسم من الاحساس بالاجهاد .
7-نام كويس:
مهما كان يومك مشغول اوعي تحرم جسمك من انه ينام عدد ساعات كافي يعني حوالي 7 او 8 ساعات,واللي هيساعدك علي النوم المتواصل هو انك تقلل من شرب المنبهات والفرجة علي التلفزيون قبل النوم وكمان النوم والصحيان في مواعيد ثابتة كل يوم.

8-مارس الرياضة:
ممارسة الرياضة مهمة جدا لكل الاشخاص اللي بيشتغلوا لانها بتحمي من زيادة الوزن خصوصا للناس اللي طبيعة شغلهم فيها قعدة لفترة طويلة وغير كده كمان الرياضة مفيدة للصحة النفسية لانها بتخلص الانسان من الشحنات السلبية والاحساس بالغضب او التوتر.


9-لازم تاكل كويس
:
ماتخليش انشغالك بالشغل مهما كان ينسيك انك تاكل,بلاش تفوتك اي وجبة خصوصا الفطار لانه مهم جدا لتركيزك طول اليوم في الشغل.

10-استمتع بيوم الاجازة:
اوعي تفكر في اي حاجة ليها علاقة بالشغل يوم الاجازة,استمتع بيه علي قد ماتقدر وجدد نشاطك وحاول كل اسبوع في اليوم ده تعمل حاجة جديدة تغير بيها من مودك لان ده هيساعدك انك تنجز في شغلك افضل.

Share.

Comments are closed.