اشترك
Buy Neuth France products

نوع ذكائك إيه؟

0

أوقات كتير بنسأل نفسنا يا ترى أنا ذكى أو لأ ؟ طيب إيه أكتر المهارات إللى أقدر أتعلمها و أكون متميز فيها ؟ أو إيه هى المادة المفضلة بالنسبة لى ؟ وغيرها كتير من الأسئلة إللى بتحيرنا و بتخلينا نحاول نقضى وقت فى أنشطة مختلفة عشان نكتشف إحنا متميزين فى إيه

مبدئيا لازم تعرف إن ربنا خلقك ذكى و متميز فى حاجات معينة أكتر من غيرها يعنى مفيش انسان ذكى و انسان غبى لكن فى إنسان ذكى فى الرياضيات و المسائل الحسابية و إنسان ذكى فى الغناء و العزف على الألات الموسيقية و إنسان ذكى فى الأعمال و المهارات اليدوية ، فى المقالة دى هنعرفكم على أشهر أنواع الذكاء بحسب ما قسمهم العالم هوارد جاردنر

الذكاء اللغوى :
الأشخاص إللى بيتمتعوا بالذكاء اللغوى بيكون عندهم قدرة أكبر على التعبير عن نفسهم شفويا أو عن طريق الكتابة ، بيكونوا شاطرين فى الحفظ وتعلم اللغات الجديدة وعندهم قدرة على التحدث أكتر من غيرهم ، بيحبوا القراءة و المطالعة و التلاعب بالألفاظ بالكلمات ، ممكن تلاقيهم حافظين أمثال و أقوال مأثورة كتير أو بيتكلموا بالفصحى

الذكاء المنطقى أو الرياضى :
أصحاب الذكاء الرياضى أو المنطقى بيستمتعوا بالتعامل مع المسائل الحسابية و المعادلات الرياضية ، وممكن بنظرة سريعة يقدروا يحلوا المشاكل الصعبة و المعقدة ، بيحبوا حل الألغاز و الألعاب إللى فيها فكر ، ينفعوا يشتغلوا ضباط فى المباحث ! بسبب قدرتهم على تحليل الحقائق و المعطيات

الذكاء الحركى :
الذكاء الحركى مرتبط بالقدرة على تحريك الجسم و مرونته ، و وجود توافق و انسجام بين أوامر العقل و حركات الجسم ، الشخص إللى بيقدر يقوم بحركات صعبة ومعقدة بسهولة بيتمتع بذكاء حركى ، الرياضيين و الجراحين و أصحاب الحرف اليدوية بيكونوا من أكتر الأشخاص المتميزين فى الذكاء الحركى

الذكاء الفراغى أو المكانى :ا
الأشخاص إللى بيمتلكوا النوع دة من الذكاء بيكون عندهم القدرة على تخيل و تصميم الأشكال والصور ثنائية و ثلاثية الأبعاد فى الفراغ ، بيحبوا  الألوان و الكتب المصورة ، عندهم القدرة على قراء الخرائط و تحليل الأشكال الهندسية أو البيانية المعقدة ، بيكونوا متميزين فى العمارة و التصميم و قيادة السيارات و الطائرات و البواخر

الذكاء الموسيقى :
أصحاب الذكاء الموسيقى بيتمتعوا بالقدرة على التعرف على الأنماط و النوتات و الإيقاعات الموسيقية  بسهولة ، فى الأغلب بيكونوا متقنين للعزف على ألة موسيقية أو لديهم صوت جميل أو حتى أصحاب أذن موسيقية و بيحفظوا كثير من الأغانى و المقطوعات الموسيقية المختلفة

الذكاء الاجتماعى :
بنسمع كتير إن بعض الأشخاص ولدوا ليكونوا قادة ، الأشخاص دول بيتمتعوا بنسبة عالية من الذكاء الاجتماعى ، أصحاب الذكاء الاجتماعى هم أشخاص عمليين و لديهم شعور قوى بالمسئولية ، يتميزوا بالهدوء و القدرة على التحكم فى الأعصاب ، هم مستمعين جيدين و عندهم قدرة على التأثير فى الناس و بيتمتعوا بكاريزما و قبول عند الأخرين ، أصحاب الذكاء الاجتماعى بيقدروا يفهموا غيرهم كويس و يستغلوا طاقاتهم و مواهبهم

 الذكاء الفردى :
الذكاء الفردى هو الخاصية المميزة للشخص المتصالح مع نفسه ، عادة بيكون شخص متحفظ  ولكن فى نفس الوقت بيحظى بإعجاب زملائه فى الدراسة أو العمل ، هو شخص يعرف نقاط قوته ونقاط ضعفه بشكل جيد ، بيفضل يقضى وقت طويل فى التأمل و التخيل و ممكن يكون بيقضى وقت فى كتابة مذكراته ، عميق الصلة بذاته و مهتم بمعرفة كل شئ عنها ، بيصلح إنه يكون فيلسوف أو مشير نفسى أو قائد دينى أو شخص يعمل فى مجال التنمية البشرية ومهارات الحياة ، الذكاء الفردى هو النوع الأندر بين كل أنواع الذكاء المختلفة

دلوقتى تقدر تعرف نوع ذكائك إيه ؟!!

Share.

Comments are closed.