اشترك
Buy Neuth France products

نوبات الأكل العاطفى .. إزاى تتعامل معاها

0

هل الضغوط إللى بتقابلها و مشاعر الغضب أو الحزن بيخلوك عايز تاكل أكتر من المعتاد ؟ هل بتحس برغبة فى الأكل و انت زهقان ؟ كتير من الناس بيعملوا كدة ، لكن لو كنت بتاكل معظم الوقت عشان أسباب عاطفية مش بسبب شعور حقيقى بالجوع فدى مشكلة عندك ولازم تحاول تحلها و متنكرهاش ، اعرف معانا إزاى تتغلب على مشكلة الأكل العاطفى

الاستجابة لإلحاح الجوع عليك هى طريقة مؤكدة لاكتساب وزن زايد و المشكلة دى بتكون أخطر فى حالة الإصابة بمرض السكر أو السمنة أو ارتفاع ضغط الدم ، لكن الخبر الكويس إنك تقدر تتحكم فى الشعور دة لأن الموضوع مش مرتبط بالشعور بالجوع و الأكل بقدر ارتباطه بالحالة النفسية

إيه العلامات إللى تبين إن عندك اضطراب الأكل العاطفى ؟

  • إنك تكون بتاكل طول الوقت لحد ما تحس بالتخمة و الامتلاء و عدم الراحة ، دى إشارة إن فى حاجة غلط فى نظام أكلك
  • إنك تكون بتكتسب وزن زايد بدون ما تعرف السبب الحقيقى زى مثلا انك بطلت تمارس التمارين الرياضية أو إنك بتكبر فى السن أو معدل حرق الدهون بيقل فى جسمك أو بتاخد أدوية بتسببلك السمنة ، فى الوقت دة حاول تشوف حالتك النفسية عاملة إزاى و هل فعلا فى حاجات مضايقاك هى إللى بتخليك تاكل أكتر أو لأ

إزاى تتعامل مع اضطراب الأكل العاطفى ؟

  • متكونش قاسى على نفسك :

بمجرد إدراكك بوجود مشكلة ، أول حاجة المفروض تعملها هى إنك تاخد وقت ترتاح فيه ، رحمة النفس و حبها و الاهتمام بها من الأمور المهمة لصحتك النفسية و هتساعدك تتغلب على مشكلات كتيرة مش بس الأكل العاطفى  ، لكن لو لمت نفسك على الأمر دة هتشعر بالضغط و الغضب و بالتالى شعورك بالجوع هيزيد و المشكلة هتتفاقم بشكل أكبر .

لاحظ الأفكار والمشاعر إللى بتحس بيها قبل ما تبدأ فى الأكل لأنك كل ما هتكون قادر تتعرف على أفكارك و مشاعرك كل ما هتكون قادر تتعامل معاها و تسيطر عليها

  • دور على الحلول :

حل مشكلة الأكل العاطفى مش متعلق بالأكل فى حد ذاته بقدر تعلقه باضطرابات فى المشاعر ، ممكن تبدأ بخطوة بسيطة و هى إنك تكتب قائمة بالأمور إللى مسببالك ضغوط فى حياتك و تخطط إزاى هتتعامل مع الأمر دة .

لو تقدر تغير الأمر إللى بيضايقك و تتجنبه أو متتعاملش معاه اعمل كدة ، و لو المشكلة خارجة عن نطاق سيطرتك ممكن تتحكم فى الطريقة إللى بتفكر بيها فى المشكلة ، لأنك فى حالة معرفتك لسبب الضغوط فى حياتك هتقدر تتعامل معاها بشكل أحسن من قبل معرفتك بالأسباب

ممكن تطلب مساعدة من شخص متخصص لمساعدتك على فهم نفسك بشكل أكبر و طريقة التعامل مع الضغوط و مشاعر الغضب أو الحزن إللى عندك

  • خد وقت قبل ما تاكل :

من الخطوات إللى ممكن تساعدك هى إنك متاكلش بمجرد شعورك بالجوع لكن تستنى فترة قبل ما تفكر تاكل ، بكدة انت بتاخد فرصة تفكر و تراجع نفسك قبل ما تاخد خطوة الأكل نفسها ، لما تبدأ تشعر بالرغبة فى تناول قطعة كيك مثلا بسبب الشعور بالملل أو التوتر أو الحزن ، افتكر ان فى امكانية إنك تأجل خطوة الأكل لوقت تانى و قل لنفسك ( أنا هاكل لكن كمان شوية ) ، لو نفذت الفكرة دى هتدى لنفسك وقت كفاية عشان متاكلش و حتى لو أكلت هتكون ساعدت نفسك على التحكم فى الشعور بالرغبة فى الأكل العاطفى

  • اتحرك شوية :

لما تشعر بالرغبة فى الأكل لأسباب عاطفية ، جرب تتحرك شوية أو تقوم بأى نشاط يشتت انتباهك عن الجوع ، ممكن تمشى شوية أو تعمل تمارين ، أى نشاط  جسمانى هتقوم بيه هيساعدك فى صرف انتباهك عن الجوع و هيديلك شعور بالنشاط لأنك هتستبدل الشعور بالجوع بحاجة مختلفة

  • اتعامل مع الأمر بواقعية :

الحقيقة إن مش كل نوبات الأكل العاطفى هى حاجة غلط و لازم تحاربها ، من الطبيعى جدا انك من وقت للتانى تكون عايز تحتفل مع أسرتك أو أصحابك عن طريق الأكل أو يكون عندك رغبة فى الأكل بسبب شعورك بالكأبة أو التوتر ، الأكل العاطفى بيكون مشكلة لما بيصبح عادة متكررة بتأثر على صحتك خصوصا فى حالة وجود أمراض تانية

Share.

Comments are closed.