اشترك
Buy Neuth France products

نصائح لمساعدتك على النجاح فى الإنترفيو

0

كلنا عندنا طموح إننا نشتغل فى وظيفة مرموقة نستغل فيها إمكانياتنا وقدراتنا ويكون عائدها المادى مرضى لينا لكن بتقابلنا عقبات كتير فى سبيل الوصول للحلم دة و من العقبات دى مقابلة العمل أو الإنترفيو ، اتعرفوا معانا على أهم النصايح إللى ممكن تساعدكم على النجاح فى مقابلات العمل المختلفة

  • اهتم بالانطباع الأول :

حيى الشخص إللى هيجرى معاك المقابلة بابتسامة و المصافحة باليد فقط ، و حافظ على وجود تواصل بالعين بينك وبين الشخص إللى هيجرى المعاك المقابلة لأن دة هيسيب إنطباع بالثقة فى النفس ، من المهم جدا الانطباع إللى هتسيبه مع المدير فى أول 30 ثانية

  • استعد للمقابلة :

اقرا السى فى مرة تانية وعدله بحسب أحدث الإنجازات أو الشهادات إللى حصلت عليها و الخبرات إللى اكتسبتها ، واهتم إنه يكون مناسب للوظيفة إللى هتقدم فيها ، كمان اقرا إعلان الوظيفة مرة تانية و خد فكرة عن أنشطة الشركة و تاريخها و المعلومات الأساسية عنها

  • مترغيش كتير :

خلى اجاباتك على الأسئلة مختصرة وفى صلب الموضوع ، إنك تاخد ثوانى للتفكير فى الإجابة أفضل من إنك تجاوب بسرعة إجابات غير مناسبة وتندم بعد انتهاء المقابلة

  • اسأل نفسك ليه المفروض يوافقوا علي تعيينك فى الوظيفة دى :

معظم إعلانات الوظايف بتتضمن المؤهلات و المهارات المطلوبة لشغل الوظيفة زى القدرة على العمل مع الفريق ، أو التعامل مع العملاء أو حسن المظهر  ، حاول تظهر مهاراتك المتعلقة بالوظيفة أثناء إجراء المقابلة ، جهز على الأقل 3 أسباب تقدر تذكرهم أثناء المقابلة لاثبات جدارتك فى الحصول على الوظيفة

  • خليك إيجابى :

لو كنت بتشتغل فى وظيفة تانية قبل كدة ، مينفعش أبدا إنك تكون بتتكلم على مديرك و زملائك السابقين بطريقة سلبية ، أخر شئ يتمناه أى مدير أو زملاء فى العمل هو إنك تتكلم عليهم بطريقة سيئة من ورا ضهرهم ، لكن على العكس حاول تظهر احترامك للغير وحماسك للشغل و روح التحدى و المسئولية

  • اهتم بحركات جسمك :

أثناء الإنترفيو طريقتك فى الحديث ليها نفس أهمية محتوى الحديث نفسه ، يعنى مينفعش تتكلم و إنت مربع إيديك أو إنك تتكلم وإنت باصص فى الأرض ، اجلس فى وضع مستقيم وحافظ على وجود تواصل بالعين مع الشخص إللى بيعمل معاك الِإنترفيو ، وممكن تستخدم إيديك فى حركات بسيطة عشان تعبر عن أفكارك ، معظم الناس مش بتقدر تتحكم فى حركات جسمها أثناء الحديث ودة الشئ إللى هتكون محتاج تدرب نفسك عليه

  • توقع الأسئلة الصعبة :

الشخص إللى بيسألك فى الإنترفيو ممكن يسألك أسئلة تخدعك ، طبعا من الصعب إنك تتوقع كل الأسئلة الصعبة زى إيه رأى زمالك فى الشغل فى شخصيتك ؟ ، وأيا كانت صعوبة السؤال احتفظ بهدوئك وبثقتك فى نفسك ، وحاول تجاوب على السؤال بأفضل طريقة ممكنة

  • حافظ على ثقتك بنفسك :

اظهر طاقتك و روح المرح عندك وحماسك تجاه الوظيفة لكن بدون تكلف أو مبالغة

 

  • اسأل عن أى سؤال مش فاهمه أو اطلب تكرار السؤال لو محتاج :

لو مكنتش متأكد من غرض السؤال أو الاجابة المطلوبة منك متتحرجش إنك تطلب تكرار السؤال مرة تانية أو يعاد صياغته بطريقة مختلفة

  • اتبع قواعد الأصول و الإتيكيت :

اهتم بأنك تذكر للشخص إللى بيجرى معاك المقابلة عن سبب اهتمامك بالشركة و بأنشطتها و ليه قررت التقدم للوظيفة دى على وجه الخصوص ، اطلب كارت العمل و ابعت ايميل يوضح أد إيه استفدت و استمتعت بالمقابلة

Share.

Comments are closed.