اشترك
Buy Neuth France products

نصائح للتغذية فى فترة الامتحانات

0

العقل السليم فى الجسم السليم جملة بنسمعها كتير وهى أثبتت صحتها خصوصا فى وقت الامتحانات ، فمع بداية الامتحانات كتير من الطلبة بيهملوا فى تغذيتهم إما بسبب ضيق الوقت أو بسبب التوتر النفسى وعدم القدرة على الأكل . لو كنت بتعمل كدة لازم تعرف إن مش بس المذاكرة هى إللى بتساعدك على النجاح والتفوق لكن نجاحك وتفوقك ليه علاقة بأكلك كمان ، نوعية الأكل إللى بتاكله ممكن يساعدك على تحصيل أكتر و ذاكرة أقوى و مزاج أحسن أو يؤدى لتحصيل أقل و ذاكرة أضعف و قلق و توتر، تابع معانا النصايح الجاية عشان تعرف أكتر

اهتم بوجبة الإفطار :

أيا كان الوقت إللى بتصحى فيه ، أول حاجة لازم تفكر فيها هتاكل إيه ، ببساطة دماغك محتاجة طاقة عشان تقدر تشتغل كويس ، انت محتاج بمجرد ما تبدأفى المذاكرة انك تكون مركز على المعلومات إللى بتذاكرها مش على جوعك . مينفعش تضيع مجهودك بإنك تفوت على نفسك وجبة الإفطار قبل الإمتحان بعد مجهود كبير بذلته فى فترة التجهيز للإمتحانات و بالتالى متقدرش تؤدى أحسن ما عندك أثناء تأدية الإمتحان . لو كنت حاسس إنك متوتر جدا ومش قابل أى نوع من الأكل يدخل معدتك ممكن تكتفى بعصير فواكه طبيعى أو مخفوق الزبادى بالفواكه

ابعد عن الأكلات المضرة لذاكرتك :

فى فترة الامتحانات ابعد عن المخبوزات و الحلويات المصنوعة من الدقيق الأبيض لأنها بتحتاج وقت أكتر عشان جسمك يقدر يهضمها ، كمان متكترش من الأكل المليان بالسكريات زى الشيكولاتة و الحلويات .  تناول النشويات زى الأرز و المكرونة بكميات محددة عشان متحسش بالتقل والتخمة

تناول مشروبات تحسن ذاكرتك :

اشرب كميات مياه كافية فى فترة الامتحانات ، ممكن كمان تشرب شاى لكن متحطش سكر كتير. عدم شربك لكميات كافية من الماء ممكن يفقدك تركيزك و يضيع طاقتك

ابتعد عن المشروبات المضرة بذاكرتك زى المشروبات الغازية و المشروبات المحتوية على الكافيين فهى ممكن تزود التوتر و القلق قبل الإمتحانات

خلى أكلك خفيف و متوازن :

كل إللى يكفيك لكن متاخدش فوق كفايتك عشان تتجنب الإحساس بالتخمة و الإمتلاء ، طاقة جسمك هتكون مركزة على هضم الطعام إللى انت أكلته أكتر من المذاكرة نفسها لكن فى نفس الوقت دماغك محتاجة طاقة كافية عشان تقدر تساعدك على التركيز و الاستيعاب ، ممكن تجرب وجبة خفيفة زى صدر فرخة و طبق سلطة

ممكن تستعين بالمكملات الغذائية :

معظم الشباب والمراهقين بيعتمدوا على الوجبات السريعة ، وبالتالى جسمهم بيكون مفتقر لكتير من الفيتامينات و المعادن الأساسية . أقراص المكملات الغذائية ممكن تساعدك على الحصول على بعض الفيتامينات إللى جسمك محتاجها

أهم الأطعمة المفيدة للذاكرة :

الأسماك :

لأنها غنية بالأوميجا 3 الأسماك بتساعدنا على التركيز و الاستيعاب بصورة أفضل

المكسرات :

لأنها تحتوى على الدهون المفيدة فالمكسرات ممكن تساعد دماغك على العمل بكفاءة و هى غنية بالحديد وبتساعد على توصيل الأكسجين للدماغ وبالتالى تقدر تكون منتبه ومتيقظ أثناء المذاكرة وكمان تزود قدرتك على الاحتفاظ بالمعلومات

الحبوب الكاملة :

تناول الحبوب الكاملة زى الفريك ، البليلة و الشوفان والخبز الأسمر مهم جدا فى وقت الامتحانات لأن الحبوب الكاملة بتحسن من عملية التذكر وبتحارب الشعور بالكسل والنعاس

التفاح :

سمعنا كتير المثل إللى بيقول تفاحة واحدة فى اليوم تغنيك عن عيادة الدكتور ، مش بس كدة التفاح بيساعد على تحسين أدائك الدراسى ، قشرة التفاح تحتوى على مضادات أكسدة ومواد لديها القدرة على تحسين قدراتك فى التذكر

السبانخ :

تناول السبانج بيحسن من كفاءة و قدرة دماغك على التركيز لأنها تحتوى على الفوليك أسيد

البصل :

البصل معروف من زمان عن قدرته على تحسين عمليات التركيز والتذكر. البصل الأحمر خصوصا ممكن يساعدك على الحصول على درجات أعلى ، البصل يحتوى على مواد تحارب الإصابة بمرض الزهايمر

الشيكولاتة الغامقة :

مش أى نوع شيكولاتة مفيدة ليك فى فترة الامتحانات لكن تناول الشيكولاتة الغامقة على وجه التحديد يساعد على تغذية الدماغ و زيادة تدفق الدم لها وبالتالى دة بيحسن من قدرتك على التذكر والاستيعاب ، كل ما كانت الشيكولاتة أغمق كل ما زادت الفايدة إللى هتحصل عليها

و من الأكلات التانية المهمة فى فترة الإمتحانات : الجزر والليمون والروزمارى و الأناناس والتوت و الجنزبيل و الكمون و الكرنب و البروكلى و العسل الأسود

Share.

Comments are closed.