اشترك
Buy Neuth France products

ممارسة العلاقة الحميمة بشكل امن اثناء الحمل

0

السيدات الحوامل وازواجهم اكيد بتدور في دماغهم تساؤلات عن اذا كانت ممارسة العلاقة الحميمة اثناء الحمل امنة للام وللجنين ولا ممكن تضرهم وايه هي افضل الاوضاع الامنة في ممارسة العلاقة بالنسبة للام والجنين وايه هي الاوضاع اللي المفروض تجنبها للحفاظ علي صحة المرأة والطفل,في المقالة دي هتلاقوا اجابات عن اهم الاسئلة اللي بيفكر فيها الزوجين بخصوص ممارسة العلاقة الحميمة خلال فترة الحمل.

هل ممارسة العلاقة الحميمة امنة اثناء الحمل:

لو الحمل بيتطور بشكل طبيعي والام حالتها الصحية كويسة اثناء فترة الحمل يبقي مفيش مشكلة من ممارسة العلاقة خلال الحمل ومفيهاش ضرر علي الجنين لانه بيكون محمي بشكل كافي بفضل قوة عضلات الرحم بالاضافة للسائل الامينوسي .

امتي المفروض يتم التوقف عن ممارسة العلاقة اثناء الحمل:
ممكن الدكتور اللي بيتابع حالة الام الحامل ينصحها بالتوقف عن العلاقة خلال الحمل في الحالات دي:
-في حالة اصابة الزوج بمرض جنسي معدي ممكن يتنقل للام ويضر الجنين.
-في حالة اذا كانت الام معرضة للاجهاض او سبق ليها التعرض للاجهاض قبل كده.
-لو كان في احتمال ان الام تولد طفلها قبل معاده(يعني قبل الاسبوع 37 من بداية الحمل).
-اذا كانت الام عندها نزيف او تشنج مهبلي.
-لو حصل تمزق للاغشية الجنينية او نزول السائل الجنيني قبل اوانه.
-اذا كانت المشيمة وضعها مش طبيعي.
-في التلت الاخير من الحمل في حالة الحمل بتوأم .

هل الحمل له تأثير علي رغبة المرأة في ممارسة العلاقة:

الموضوع ده بيختلف من واحدة للتانية علي حسب استعدادها النفسي وعلي حسب التغييرات الهرمونية في فترة الحمل,معظم الحوامل بيحسوا بقلة الرغبة في ممارسة العلاقة في اول 3 شهور من الحمل بسبب التعب والاعراض اللي بيحسوا بيها وبسبب ان فكرهم بيكون مشغول باستقبال الطفل لكن بيقدروا انهم يستعيدوا الرغبة في ممارسة العلاقة بعد مرور اول 3 شهور,لكن في سيدات بتفضل عندهم الرغبة في ممارسة العلاقة اثناء الحمل طبيعية زي  ماكانت قبل الحمل وفي سيدات بتزيد عندهم الرغبة في ممارسة العلاقة.
ازاي تتم ممارسة العلاقة بأمان اثناء فترة الحمل:
خلال شهور الحمل بيكون مهم جدا تغيير الاوضاع خلال العلاقة علشان راحة الام بحيث ان مايكونش في ضغط علي منطقة البطن عندها يسببلها ألم وافضل الاوضاع اثناء العلاقة هو الوضع الجانبي او الخلفي لانهم مش بيشكلوا ضغط علي البطن,والمفروض ان المرأة في كل الاحوال ماتحسش بالالم اثناء العلاقة ولو حست بألم في اي وضع او حست بنزيف او نزول مية قبل معاد الولادة يبقي لازم تستشير الدكتور اللي بيتابع حالتها وتكون صريحة مع زوجها بخصوص احساسها خلال ممارسة العلاقة لان ده هيساعدها انها تكون مرتاحة اكتر.

بدايل لحياة زوجية مستقرة في حالة صعوبة ممارسة العلاقة خلال الحمل:
لو كان من الصعب ممارسة العلاقة اثناء الحمل بشكل طبيعي بسبب شعور المرأة بالالم او اذا كانت العلاقة فيها خطر علي صحتها اثناء الحمل ففي طرق تانية للحفاظ علي حياة زوجية مستقرة سعيدة خلال فترة الحمل بطرق تانية غير ممارسة العلاقة زي تعبير كل طرف للتاني عن مشاعر الود والالفة وممكن من خلال تغيير الروتين اليومي بنزهة لطيفة او عشاء في مكان جديد .

Share.

Comments are closed.