اشترك
Buy Neuth France products

كل اللي تحتاجيه لارضاع طفلك وانتي برة البيت

0

مسألة ارضاع طفلك رضاعة طبيعية وانتي مش في البيت اكيد بتشغل تفكيرك خصوصا لو كنتي ام لاول مرة ,وبتشغلك اكتر لو هتقضي وقت طويل برة البيت ممكن يكون ساعات طويلة بالذات لما ترجعي شغلك بعد الولادة او لو كنتي محبة للخروج والتنزه بشكل عام,وطبعا بتشيلي هم انك تخرجي وتسيبي الطفل يزن وانتي برة او انك تخرجي بالطفل ويجوع وتضطري انك ترضعيه في مكان عام،ويمكن بسبب الحكاية دي للاسف امهات كتير بيفضلوا انهم يقضوا معظم وقتهم في البيت .تابعينا علشان تعرفي ازاي تجهزي نفسك وطفلك للرضاعة وانتي برة البيت وازاي المسألة دي ماتكونش سبب قلق ليكي بالعكس تقدري تخرجي بشكل طبيعي بالطفل او من غيره

-اهتمي بشفط الحليب من الثديين بشكل الي او بشكل يدوي او باستخدام مضخة الثدي لان ده هيحميكي من احتقان الثديين بسبب افراز اللبن وكمان هينفعك وانتي  برة البيت في ارضاع الطفل وهيحللك مسألة الرضاعة لو كنتي مريضة لفترة او بتاخدي دوا ممكن يضر الطفل اثناء الرضاعة ولاحظي ان الطفل في كل الاحوال هياخد فايدة اللبن سواء انتي اللي رضعتيه للطفل او حد تاني باستخدام الببرونة.
-لازم تركزي علي نضافة الببرونة اللي بتحطي فيها اللبن للطفل وتهتمي بغسيلها وتكون مقفولة  باستمرار لان قلة نضافتها ممكن تضر الطفل وتصيبه بأمراض,تنضيف الببرونة المفروض يكون بعد كل مرة الطفل بيرضع من خلالها ولازم وانتي بتنضفيها تتخلصي من اي بقايا لللبن فيها وماتحتفظيش بيها لان اي بقايا لللبن هيكون فيها بكتريا عالقة ممكن تضرالطفل.
-الحليب اللي بيتم شفطه من الثديين ممكن الاحتفاظ بيه لمدة 4 ايام في التلاجة ولمدة 3 شهور في الفريزر ولمدة 6 شهور في الديب فريزر.

تعملي ايه لو اضطريتي تخرجي من غير الطفل:
-لو هتخرجي من غير الطفل في مشوار مدته حوالي ساعة او ساعتين فالحل الافضل بالنسبة ليكي انك ترضعيه فورا قبل ماتخرجي وبعد ماترجعي ولو كان طفلك مش جعان او لو حاسة انك هتتأخري عن الساعة او الساعتين يبقي من الافضل ليكي انك تحتفظي باللبن في ببرونة او اكتر علي حسب المدة اللي هتقضيها برة البيت او علي حسب طبيعة المشوار اللي انتي رايحاه.
-لو هتغيبي عن البيت لمدة من 3 ل 4 ساعات احتفظي باللبن لمدة 3 او 4 ايام في التلاجة ويفضل انك ماتحطيش اللبن في الميكروويف لانها بتقلل من القيمة الغذائية لللبن.

تعملي ايه لو هتقضي يوم طويل برة البيت:
في كتير من الاماكن العامة اللي بتوفرلك امكانية التواجد في مكان تحسي فيه بالخصوصية وتقومي بعملية شفط اللبن من الثديين وتخزينه باستخدام مضخة الثدي اللي لازم تكون ملازمة ليكي في شنطتك زي اي حاجة اساسية بتحطيها في الشنطة,وممكن لما ترجعي شغلك تعملي الموضوع دي في وقت الراحة بتاعك في مكان مقفول مناسب,وحاولي تحسبي هتقضي وقت اد ايه برة البيت وتشوفي طفلك هيحتاج كمية لبن اد ايه وتعملي حسابك قبل ماتنزلي.

في حاجات ممكن تحسسك بالراحة اكتر في حالة ارضاع الطفل برة البيت زي:
-انك تاخدي معاكي شال تغطي بيه جسمك اثناء الرضاعة لو معرفتيش تعملي ده في مكان مقفول.
-البسي ملابس مناسبة زي الملابس اللي فيها زراير او سوستة بتتفتح وتتقفل عادي من غير ماتضطري انك ترفعي لبسك قبل الرضاعة
وتنزليه بعدها,بالشكل ده هيبان شكلك طبيعي جدا كأنك بتضمي الطفل لصدرك.
-حاولي قدر الامكان خصوصا في المناسبات العامة والاماكن الزحمة انه يكون معاكي ناس بتثقي فيهم علشان يكونوا محيطين بيكي اثناء
عملية الرضاعة.
-يفضل في حالة زي كده انك تجهزي لبن للطفل من قبل الخروج علي حسب مدة التواجد برة البيت لان ده هيريحك اكتر.

Share.

Comments are closed.