اشترك
Buy Neuth France products

كبر دماغك

0

عايز تسافر و تشوف بلاد و حضارات مختلفة ، نفسك يرجع بيك الزمن و تشوف أحداث تاريخية حصلت زمان ، زهقت من الأحداث إللى بتحصل من حواليك و نفسك تعيش فى واقع تانى و حياة تانية حتى لو كام ساعة بس
يبقى تكبر دماغك أيوة بالظبط كدة كبر دماغك و اقعد فى مكان هادى و استمتع بقراءة كتاب تاريخى أو علمى أو رواية شيقة

فوايد القراءة :

  • القراءة بتقوى ذاكرتك و تخلى عقلك شباب:
    القراءة بتمرن عقلك لأن زى ما جسمك محتاج لتمرينات عشان يكون قوى و مرن ، عقلك كمان محتاج تمرينات عشان يزيد تركيزك و ذكائك ، القراءة بتساعد على تنشيط ذاكرتك أكتر من أى وسيلة تانية زى مشاهدة التليفزيون أو الاستماع للراديو،

و انت مركز فى كتاب معين عقلك بيجدد نشاطه و بيحافظ على شبابه ، بحسب دراسة حديثة الأشخاص إللى بيقضوا وقت         فى ممارسة أنشطة ذهنية أو عقلية بيحافظوا على صحة عقلهم و بيحموا نفسهم من حدوث تدهور معرفى و بيكونوا أقل           عرضة للإصابة بمرض الزهايمر

  • القراءة تخفف من الضغوط النفسية :
    استمتاعك بقراءة كتاب مفيد أو رواية ممتعة بيقلل من مستوى الهرمونات المسئولة عن الشعور بالقلق و التوتر
  • القراءة بتحسن مفرداتك اللغوية :
    تقدر تستخدم هواية القراءة كوسيلة علشان تزود حصيلة الكلمات عندك و تحسن مفرداتك اللغوية ، وبالتالى  تقدر تتكلم مع الناس بلباقة أكتر و تعبر عن إللى عايز تقوله بطريقة الناس تفهمها و تستوعبها كويس
  • القراءة بتزود من شعورك بالتعاطف مع الناس فى المواقف المختلفة :
    القراءة بتغير وجهة نظرك عن الحياة و بتوسع أفكارك ، بتساعدك تتفهم أفكار و مشاعر الناس أكتر ، لأنك لما بتقرا رواية بتتقمص شخصيات أبطالها و بالتالى بتعيش فى حالات نفسية وعاطفية مختلفة ، و دة إللى بيساعدك بعد كدة على تفهم مشاعر و أفكار الأخرين
  • القراءة تحفزك على تحقيق أهدافك :
    قراءة سيرة ذاتية لشخصية معروفة و معرفة الصعوبات إللى مرت بيها و إزاى تغلبت عليها بيديلك حافز و حماس قوى لتحقيق أهدافك الشخصية ، كلما زادت معرفتك وخبرتك بظروف و تحديات شخصية ناجحة كلما زادت رغبتك فى النجاح و تحقيق أهدافك
  • القراءة ممكن توفر فلوسك :
    من الممكن تستبدل الذهاب للسينما أو الملاهى أو الذهاب لمطاعم الوجبات السريعة بالقراءة فى بعض الأحيان ، تمضية حوالى 5 ساعات فى قراءة كتاب لا يتعدى ثمنه 50 جنيه هى طريقة رخيصة نسبيا للتسلية ، ومتنساش المكتبات العامة و الكتب القديمة وكمان الكتب الإلكترونية

لو مش بتحب القراءة أو بتزهق بسرعة تقدر تعود نفسك عليها بالطرق دى :

  • اختار نوع الكتب المفضل بالنسبة لك وممكن تبدأ بقراءة القصص و الروايات بسبب عامل التشويق و الجذب الموجود فى القصة عموما
  • خصص مكان مريح للقراءة زى حديقة هادية أو مكان هادئ فى البيت
  • اتعرف على ناس بيحبوا القراءة عشان يشجعوك على ممارسة الهواية دى و يعرفوك على الكتب المفيدة و الممتعة و يحصل بينكم تبادل للمناقشات و الأفكار
  • تعلم فن القراءة السريعة عشان تقدر توفر وقتك لو كنت مشغول ووقتك
  • احتفط بدفتر صغير تدون فيه النقاط و الأفكار المفيدة فى كتاب استمتع بقرائته

Share.

Comments are closed.