اشترك
Buy Neuth France products

عيشوا الكريسماس في البيت بطريقة جديدة

0

احتفالات عيد الكريسماس بتكون فرصة جميلة انك تهتمي بتجميل وتزيين بيتك بشكل جميل ومختلف  يسعدك انتي واسرتك في بداية سنة جديدة ،ودي فرصة جميلة لكسر الروتين اليومي بتاعك ,وطبعا نفسك انك تزيني بيتك بطريقة غير اللي زينتيه بيها السنة اللي فاتت واللي قبلها,خليكي معانا علشان تعرفي طريقة جميلة وبسيطة تزيني بيها بيتك وكمان هنقولك ازاي تضيفي علي الاكلات اللي بتعمليها لمسة جمالية تناسب جو الكريسماس وكمان ممكن تشركي ولادك في البيت معاكي في الحكاية دي لان ده بيسعدهم.

ازاي تعملي شجرة الكريسماس في البيت:
لو مش عندك وقت او امكانية انك تشتري شجرة للكريسماس ففي طرق سريعة انك تعملي شجرة في البيت وهي :
-شوفي اي كاب يكون مخروطي الشكل او اشتري فرخ واعمليه علي شكل مخروط بحجم مناسب وزينيه بأشرطة خضرا من الزينة وحطي جواه اسلاك من النور وضيفي عليه شوية اكسسوارات بألوان متنوعة والزقي عليه اشرطة من الساتان ونجوم وكرات واجراس
-ممكن تشتري قاعدة علي شكل شجرة او مخروط بالحجم اللي يناسبك وتدخلي فيها مجموعة من خلل الاسنان وتعلقي فيها علب الازايز الكانز الفاضية اللي عندك اللي الوانها قريبة من الوان شجرة الكريسماس وتحطي قريب منها سلك من نور يديها لمعان وبريق.

افكار لتجميل بيتك في احتفالات الكريسماس:
-الشجرة:
طبعا اول حاجة بتيجي في بالنا اول مابنسمع عن الكريسماس هي شجرة الكريسماس وممكن تجمليها بالحاجات دي:
-النجوم بتدي للشجرة منظر جميل وبتزيد من جمالها خصوصا النجمة اللي في قمة الشجرة ومن اشهر الوان النجوم الدهبي والفضي وممكن النجوم تتعمل في البيت من اسلاك  اللؤلؤ الابيض  .
-الكرات الحمرا  والخضرا وغيرها من الوان الكرات الجميلة بتضيف للشجرة حيوية وحياة اكتر.
-الانوار القوية في الشجرة بتديها لمعان وبريق قوي وبتخلي منظرها مبهج اكتر.
-ممكن تعلقي قطع من الشيكولاتة الصغيرة علي اطراف  الشجرة.
-ضيفي علي الشجرة مظاهر من الطبيعة زي اوراق الصنوبر والتوت البري.
-يفضل ان مكان الشجرة يكون بعيد عن الشبابيك او اي مصادر تانية للاتربة علشان الشجرة تفضل بجمالها ورونقها اطول وقت.
-علشان بريق وجمال الشجرة يبان اكتر يفضل ان مستوي الاضاءة في البيت يكون هادي علشان ميغطيش علي جمال الشجرة.

افكار تزيين البيت في الكريسماس:
-حطي الشموع الحمرا علي الترابيزات ولو امكن علي الارفف لان اللون الاحمر من اهم الالوان في احتفالات الكريسماس غير ان الشموع بتدي لمسة جميلة لجو البيت.
-يفضل انك تحطي علي الترابيزات والكراسي مفارش بالوان الكريسماس لانها بتدي الترابيزة والكراسي شكل جمالي.
-استعملي الحاجات الموجودة عندك في البيت زي الاشرطة الساتان الحمرا والخضرا وغيرها من الالوان المبهجة واربطيها بشكل جميل زي الفيونكا او الوردة مثلا والزقيها علي  حيطان البيت والترابيزات والعواميد والابواب لانها بتدي منظر جمالي جذاب.
-علقي اشرطة من الزينة بألوان مختلفة علي الابواب والحيطان والصور لانها بتضيف للبيت جو من البهجة.
-اشتري برانيط بابا نويل او اعمليها في البيت بفرخ علي شكل مخروطي وحطيها علي الاسطح الثابتة عندك في البيت.

لتجميل اوضة النوم في الكريسماس:
-ممكن تجيبوا الملايات للسراير واكياس للمخدات من الوان الكريسماس.
-حطوا شجرة كريسماس صغيرة في اوضة النوم.

لتجميل ابواب بيتك في الكريسماس:
-حطي اكاليل من الزهور بشكل دائري علي الابواب لانها بتخلي منظر الابواب جذاب وجميل خصوصا وقت استقبال ضيوف في البيت.
-الزقي علي الابواب قطع من الورق علي شكل تلج لان ده بيعيشك اكتر في جو الكريسماس.
-علقي افرع خضرا صغيرة اواشرطة حمرا علي شكل فيونكا ومعاها اجراس علي الابواب .

ازاي تعملي فكرة اكل جديدة مناسبة لاحتفالات الكريسماس:
ممكن تشتري قاعدة صغيرة او مجموعة قواعد علي شكل شجرة او علي شكل مخروط وتثبتي فيها مجموعة من خلل الاسنان وتهتمي بنضافتهم كويس وتحطي في الخلل دي الخضروات او الفواكه اللي انتي عايزاها او المتاحة ليكي في وقت الكريسماس واللي الوانها زي الوان شجرة الكريسماس وممكن تشركي اسرتك في الحكاية دي, يعني مثلا ممكن تحطي فيها الاكلات اللي اسرتك بتحبها زي قطع الجبنة مع الطماطم او الخيار او خضروات زي الطماطم والخيار والفلفل والبروكلي والخس والجزر والزيتون او مجموعة من الفواكه الموجودة في الشتا زي التفاح الاحمر او الاخضر والرمان والبرتقال والموز,وممكن تنظمي الاكلات في الطبق علي شكل شجرة الكريسماس .هتلاقي ان كلها افكار جديدة وجميلة ومختلفة وكمان هتشجع اسرتك علي الاهتمام بالاكلات الصحية وممكن لو عجبتك انتي واسرتك تستمروا عليها حتي بعد الكريسماس.

 

Share.

Comments are closed.