اشترك
like Sofy on Facebook

علشان ضحكتك الحلوة .. اهتم بصحة اسنانك

0

مفيش شك ان كل الناس نفسهم ان اسنانهم تبقي بيضة وجميلة ومظهرها صحي وقوي وميحصللهاش تسوس ويعرفو ياكلو كل اللي نفسهم فيه من غير سنانهم ماتوجعهم وبيتمنو ان ضحكتهم تبقي جذابة بسبب جمال سنانهم ,بس للاسف مش الناس بيعرفو ازاي يهتمو كويس بصحة اسنانهم. لو كنتو فاكرين ان منظر الاسنان البيضة الجميلة المتساوية الجذابة ده موجود بس عند الفنانين اللي بنشوفهم في التلفزيون وعلي صفحات المجلات وفي اعلانات معجون الاسنان فلازم تعرفو ان انتو كمان ممكن منظر سنانكم يبقي صحي وجميل بس لو اهتميتو بيها كويس.

علشان جمال اسنانك اعمل الحاجات دي:
-استخدم الخيط قبل فرشة الاسنان:
استخدام الخيط قبل فرشة الاسنان بيساعد اكتر في تنضيف السنان من بواقي الاكل اللي بيبقي بين الاسنان بعد الاكل وكمان بينضف الاسنان من طبقة البلاك,بعد استخدام الخيط اغسل سنانك بالفرشة بالراحة وبلطف لان القوة في استخدام الفرشة بتضعف اللثة.

– استعمل المسواك:
المسواك بيساعد في التخلص من بواقي الاكل اللي بين الاسنان,بس استعمله برفق لان استعماله بقوة بيضر اللثة جدا،ومن الافضل استعمال المسواك اللي السن بتاعه رفيع ومايكونش حاد.

-اغسل سنانك باستمرار:
عادة غسيل السنان مهمة جدا مرتين في اليوم خصوصا قبل النوم لان البكتريا بتنشط اكتر بالليل وبتهاجم السنان اللي مش نضيفة ويفضل استعمال المعجون مبيض الاسنان من وقت للتاني لكن بدون مبالغة ومن الافضل استشارة الدكتور

-غير فرشة الاسنان كل فترة:
دكاترة الاسنان بينصحو بتغيير فرشة الاسنان كل 3 او 4 شهور تقريبا لان الفرشة بعد الفترة دي بتكون بدأت تقدم و مش بتكون فعالة في تنضيف السنان ,ويفضل تغطية الفرشة علشان متبقاش مكشوفة ومعرضة لاي نوع من التلوث,ولو كنت بتعاني من اي مرض اهتم بتغيير الفرشة باستمرار علشان ماتكونش مجال للعدوي .

-اهتم بالاكلات اللي بتساعد في تقوية وتبييض الاسنان:

ركز علي الاكلات الغنية بالكالسيوم زي الجبنة واللبن والزبادي والبيض والاسماك,وكمان بعض الفواكه والخضروات زي التفاح والاناناس والفراولة والجزر والكرفس و الموز الغني بمادة الفلورايد لان الاكلات دي بتساعد في بناء اسنان قوية وبتساعد كمان في تبييض السنان.

-ابعد عن مشروبات المياة الغازية:
المشروبات دي غير انها بتسبب صفار السنان كمان بتخليها تسوس ومع الوقت بتبقي ضعيفة وبيحصل الم في الاسنان اثناء اكل اي حاجة ناشفة او مسكرة,لو كنت متمسك بالنوعية دي من المشروبات فحاول تقلل منها وممكن تشرب مية بعدها لانها بتقلل من اضرارها ومن الافضل انك متغسلش سنانك بعد المشروبات دي علي طول ,استني نص ساعة اوساعة لان تفاعل المشوبات دي مع الفرشة والمعجون بيسبب ضرر لمينا الاسنان.

-اهتم بنضافة لسانك:
وانت بتغسل سنانك اهتم كمان بنظافة لسانك لانه ممكن يكون فيه بكتريا تنتشر في السنان وكمان بتعمل مشاكل في التنفس.

-اهتم بزيارة دكتور الاسنان من وقت للتاني:
يفضل زيارة دكتور السنان مرة علي الاقل في السنة علشان تطمن علي صحة اسنانك,ان كانت زيارة دكتور السنان حاجة تقيلة ورخمة بالنسبة ليك وشايف انها بتضيع وقت فممكن تاخد معاك حاجة تسليك زي كتاب او سماعات,لكن ماتكسلش ابدا علي  زيارة الدكتور.

-اشرب مية كتير:
شرب المية باستمرار بيساعد في تنضيف السنان من بواقي الاكل.

-ابعد عن التدخين:
التدخين مع الوقت بيخلي السنان لونها اصفر وغير مرغوب فيه.

-بلاش تقطم الاكلات الناشفة مرة  واحدة:
اقطم الاكلات الناشفة علي قطع صغيرة لان قطمها بقوة مرة واحدة بيسبب اجهاد للاسنان وبيضعفها مع الوقت.

-قلل من السكريات والحلويات:
كتر اكل السكريات والحلويات بيغير لون السنان وبيعرضها للتسوس علشان كده يفضل انك تقلل منها

لو كنتم متصورين ان العناية بالاسنان مجرد رفاهية وشكل جمالي بس فتفكيركم مش في محله لان صحة الاسنان من صحة الجسم كله واهمال نظافتها بيسبب الام ومشاكل كتيرة خصوصا للحوامل ومرضي السكر.

Share.

Comments are closed.