اشترك
like Sofy on Facebook

علشان تتخلصي من الشعر الزايد بأمان

0

ازالة الشعر الزايد من الجسم هي من اكتر الحاجات اللي بتسبب متاعب للبنات والسيدات في مسألة العناية بالجمال والنضافة الشخصية وللاسف كتير من البنات والسيدات مش بيقدروا انهم يعملوا موضوع ازالة الشعر بالليزر يمكن بسبب الانشغال وصعوبة متابعة الجلسات بانتظام ويمكن علشان مش عندهم الامكانية المادية اللي تخليهم يعملوها ويمكن بسبب وجود مشكلة جلدية تمنعهم من الخضوع لجلسات الليزر,وطبعا ازالة الشعر باستخدام موس الحلاقة بتخلي لون الجلد غامق وغير مرغوب فيه غير انها مش بتزيل الشعر من جذوره والشعر بعدها بيطلع بكثافة زي الاول واكتر,علشان كده ازالة الشعر بالشمع هي الانسب لكتير من البنات والسيدات اللي برغم انها مؤلمة شوية الا انها بتخلي الجلد ناعم وبتزيل الشعر من جذوره,واحنا هنساعدكم انكم تزيلوا الشعر بالشمع من غير الم .

نصايح لازالة الشعر الزايد بدون مشاكل:
-بلاش تعملي موضوع ازالة الشعر بالشمع قرب معاد الدورة الشهرية لان الخلايا العصبية في الوقت ده بتكون حساسة جدا لاي حاجة مؤلمة ويفضل ازالة الشعر بعد انتهاء الدورة الشهرية مباشرة لان الجسم في الوقت ده بيكون اقل حساسية لاي مسبب للالم.
-قبل ماتعملي ازالة الشعر بالشمع اطمني كويس ان جسمك مفيهوش اي جروح او خدوش او التهابات لانها ممكن تزيد مع استخدام الشمع.
-لو اخدتي دوش مية دافية قبل ماتبدأي هيساعدك كتير في فتح المسام وكمان بيخفف من التهيج والاحمرار اللي بيسببه استخدام الشمع علي الجلد.
-استخدمي كريم مناسب لطبيعة جلدك قبل ماتبدأي في ازالة الشعر لانه بيسهل موضوع ازالة الشعر وكمان بيساعد في تنعيم وترطيب جلدك وبيحميه من الجفاف وبيخفف من الم ازالة الشعر.
-استعمال كريمات التخدير الموضعية الموجودة في الصيدليات بيساعد في تخفيف الالم الناتج عن ازالة الشعر وممكن تحطيها علي المنطقة اللي انتي عايزة تزيلي الشعر منها لمدة ربع ساعة او نص ساعة وبعدين تبدأي في ازالة الشعر.
-لو في مرة كنتي مستعجلة و استعملتي موس الحلاقة علشان تزيلي الشعر الزايد فبلاش تستعملي الشمع بعدها علي طول لان ده بيسبب تهيج وجروح للجلد ,ممكن تستني يوم او اتنين وبعدين تزيلي الشعر بالشمع.
-امزجي 3 معالق من السكر في كوباية مية وامشي بيها علي جلدك قبل ماتبدأي في ازالة الشعر بالشمع لانها بتساعد في تخفيف الالم.
-اطمني علي درجة حرارة الشمع قبل ماتحطيه علي جلدك بحيث انه مايكونش بارد ويخلي ازالة الشعر صعبة وبرضه مايكونش سخن بحيث انه يسببلك التهابات في بشرتك.
-لو جلدك فيه مناطق فيها شعر طويل قصيه الاول بالمقص بلطف علشان ميسببلكيش الم لما تمشي عليه بالشمع.
-وانتي ماشية علي جلدك بالشمع بلاش تستعمليه علي نفس المنطقة مرتين ورا بعض علي طول لان ده بيسبب التهاب وتهيج للبشرة،ممكن تستني شوية وبعدين ترجعي لنفس المنطقة.
-استعملي زيت اطفال او زيت زيتون علشان تتخلصي من اثار الشمع علي جلدك وكمان زيت الزيتون بيساعد في ترطيب الجلد وبيحميه من الجفاف.
-بعد ماتخلصي ازالة الشعر بالشمع بلاش تعرضي جلدك لاي مصدر للحرارة زي المية السخنة او لحرارة الشمس الشديدة لان ده بيسبب جفاف للجلد وكمان بيسبب تهيج واحمرار للبشرة وبيسببلك شعور بالحكة.
-ممكن بعد ماتنتهي من ازالة الشعر امسحي المنطقة بمية الورد لانها بتساعد في تخفيف التهيج والاحمرار.

انشرها

التعليقات مغلقه