اشترك
Buy Neuth France products

عشان تحافظوا على الرومانسية فى علاقتكم الزوجية

0

أوقات كتير بنكون عايزين علاقتنا الزوجية ناجحة و مليانة بالرومانسية واننا نرجع العواطف بتاعة زمان و نحافظ على علاقتنا الزوجية من المشكلات و الفتور إللى بيظهر مع مرور الوقت ومسئولية الأولاد والمصاريف ، فى المقالة دى هنقدملكم بعض النصايح والاقتراحات لمساعدتكم على الحفاظ على علاقة زوجية ناجحة ومليانة بالحب والرومانسية :

  • استمع لشريك حياتك باهتمام فى المواضيع المهمة بالنسبة له حتى لو كانت مالهاش أهمية عندك ، اظهرله تفهمك و اهتمامك وتعاطفك معاه لو الموقف محتاج
  • دور على أنشطة مشتركة ما بينكم زى ممارسة رياضة بتحبوها أو مشاهدة الأفلام والمسلسلات المفضلة بالنسبة لكم أو الخروج فى رحلة أو مجرد التمشية فى جو جميل أو القيام بزيارات عائلية مع بعض ، دى أفكار سهلة و بسيطة لكن هتفرق فى حياتكم الزوجية
  •  عشان تحسن علاقتك أكتر مع شريك حياتك ، اهتم بأنشطته المفضلة حتى لو مكنتش بتحبها، لو كان مشترك فى نشاط للغناء أو المسرح لازم تكون موجود عشان تتفرج عليه و لو كان بيحب يتفرج على ماتشات كرة أو أخبار الفنانين اتفرج معاه و اهتم باللى بيشوفه أو لو كان بيحب نوع معين من الموسيقى اسمعها معاه و حسسه باعجابك بذوقه ، اقرا فى المجالات إللى بتهمه زى الفن أو السياسة أو الدين واتناقش معاه فيها
  • كل العلاقات بين المتزوجين بيحصل فيها مشاكل واختلافات فى وجهات النظر ، متخليش أولويتك هى إثبات صحة وجهة نظرك لكن حاول إنك تتفهم رأى شريك حياتك وتحط نفسك مكانه ، وقتها هتقدر تتنازل عن بعض أرائك وتقدر موقفه أو تحاولوا مع بعض إنكم توصلوا لحل وسط
  • ممكن تكون كلمات الحب و الإعجاب أو المساعدة فى بعض المهام هى أكتر الطرق إللى بتحسسك بحب وتقدير شريك حياتك ليك لكن مش شرط إن الطرق دى تكون هى نفس الطرق إللى بتسعد شريك حياتك ، ممكن شريك حياتك يفضل إنك تسمعه باهتمام ، أو إنك تصدق أحلامه وتؤمن بيه أو إنك تشجعه على التغلب على تحديات معينة ، اعرف مفتاح شريك حياتك وخصصله الاهتمام الأكبر
  • اهتم بممارسة العلاقة الحميمة مع شريك حياتك مهما مر من وقت على زواجكم ، ممارسة العلاقة الحميمة بالإضافة لفوايدها الصحية زى تقليل القلق و التوتر و تحسين ضغط الدم لكن كمان هتساعدكم إنكم تقربوا من بعض أكتر و هيزود الحميمية إللى بينكم
  • متخليش التفاصيل الصغيرة تفوتك : بلاش تكون كلمات زى لو سمحت ، شكرا ، أسف ، تسلم ايدك بتقولها للضيوف أو زمايلك فى الشغل بس ، شريك حياتك محتاج يسمع منك كلمات من النوع دة وهتشوف إزاى هتفرق فى علاقتك بيه
  • جربوا فكرة تبديل الأدوار : الملل و الروتين أحيانا بيكون بسبب تكرار نفس الأعمال و المهام الروتينية كل يوم ، جربوا فكرة تغيير الروتين ، يعنى لو متعود انك إنت إللى بتعمل المشاوير و تجيب طلبات البيت جرب تبدل المهمة دى مع شريك حياتك بمهمة تانية ولو انتى متعودة على تحضير الأكل والوقوف فى المطبخ كل يوم ممكن تبدلى المهمة دى مع شريك حياتك وهكذا ، فايدة الاقتراح دة انه هيساعدكم على الاندماج مع بعض أكتر وتقدير كل طرف لواجبات الطرف التانى و المجهود إللى بيبذله عشان يحافظ على النظام و السعادة جوة البيت
  • أفراد العيلة إللى بياكلوا مع بعض بيفضلوا مع بعض و بيزيد تمسكهم ببعض ، متستهنش بالنصيحة دى لأن من أسباب تماسك العلاقات الزوجية والعائلية زمان هى تخصيص وقت للأكل يتجمع فيه كل أفراد العيلة عشان تكون فرصة يسألوا على بعض و يعرفوا أخبار بعض ، خصصوا ترابيزة للأكل فى البيت و استغلوا الفرصة دى عشان تزودوا التواصل بينكم

 

Share.

Comments are closed.