اشترك
Buy Neuth France products

عادات تساعدك علي الاقلاع عن التدخين

0

كتير من المدخنين نفسهم انهم يبطلوا التدخين ومؤمنين جدا بأضراره الكتيرة علي صحتهم وصحة المحيطين بيهم ونفسهم يتخلصوا من ادمان العادة دي ويعيشوا حياة صحية بس للاسف مش عارفين ازاي يعملوا كده ولا يبدأوا منين وطبعا بيخافوا انهم يبدأوا ومايقدروش يكملوا ويرجعوا اسوأ من الاول.تابعونا لو عايزين تعرفوا شوية خطوات بسيطة تساعدكم علي الاقلاع عن التدخين.

-لازم تقتنع بفوايد الاقلاع لصحتك:
اكيد انت تعرف كويس اضرار التدخين علي صحتك وصحة الناس من حواليك اللي التدخين بيضرهم اكتر ما بيضرك واقتناعك انك بالاقلاع عن التدخين هتعيش حياة صحية سعيدة طبعا هيساعدك غيراحساسك ان تقدر تتحكم في نفسك بعد السيجارة ماكانت بتتحكم فيك وفي مزاجك .

-حفز نفسك ان حياتك هتتغير للاحسن:
التعود علي التدخين اكيد خلي شفايفك لونها غامق وسنانك لونها اصفر و تحت عينك بقي في سواد وطبعا زهقت من رائحة النفس الكريهة والنهجان كل ماتطلع سلم غير الكحة اللي ملازماك علي طول واحساسك بالعصبية لانك مش قادر تدخن في مستشفي او مكان مقفول ممنوع فيه التدخين,لو اقتنعت ان كل ده هينتهي بمجرد ماتبطل تدخين اكيد حياتك هتبقي احسن وهتكون محفز اكتر انك تبطل.

-استشير طبيب مختص:
في بداية توقفك عن التدخين هيقل افراز مادة النيكوتين في جسمك وده هيخليك تحس بضيق,علشان كده يفضل انك تستشير دكتور مختص في الحاجات اللي تساعدك علي تنظيم افراز مادة النيكوتين في جسمك علشان ماتحسش بالضيق والعصبية وترجع تاني للتدخين.

قول للناس من حواليك انك هتبطل:
لو قلت لاهلك واصحابك انك عايز توقف التدخين هتلاقي منهم تشجيع هيساعدك اكتر في محاولات الاقلاع وهيزود من فرص نجاحك في الموضوع ده.

-ابعد عن اي مسببات للتدخين:
من المعروف  ان التدخين بيساعد في افراز مادة النيكوتين المسئولة عن الشعور بالراحة والاسترخاء علشان كده لو عايز توقف التدخين لازم تدور علي بدايل تحسسك بالراحة زي سماع مزيكا هادية او دوش دافي او اي حاجة بتسعدك زي الرياضة او اي نشاط حركي او نزهة في مكان مفتوح, ومن الافضل ليك في الفترة الاولي من الاقلاع عن التدخين انك تبعد عن اي مسببات للضغط العصبي اللي بيخليك تفكر في التدخين،ولو ليك اصحاب اومعارف هما اللي شجعوك علي التدخين حاول تبعد عنهم او تشركهم معاك في التفكير في الاقلاع لو لقيت عندهم الاستعداد.

-غير من عاداتك:
لو كنت متعود انك تشرب سيجارة بعد ماتصحي من النوم او بعد الاكل ممكن تستبدلها بحاجة تانية زي انك تغسل سنانك او تمضغ لبانة.

-انسي اي حاجة تفكرك بالسيجارة:
نضف الارض من اثار السجاير القديمة واهتم بنضافة ملابسك من ريحة السجاير واستعمل معطر الجو واهتم بتهوية الاماكن اللي دخنت فيها قبل كده لان اي اثر للسيجارة بيفكرك بيها وبيخليك تفكر في التدخين وبيفشل كل محاولاتك في التوقف عنها.

افتكر الفلوس اللي هتكسبها لو وقفت تدخين:
افتكر كنت بتصرف فلوس اد ايه من مرتبك او مصروفك كل يوم علي السجاير وشوف هتكسب اد ايه لو ماصرفتش الفلوس دي علي السجاير وصرفتها علي اي حاجة مفيدة او حوشتها لمستقبلك انت واسرتك,اكيد ده هيخليك مستقر نفسيا اكتر.

 

Share.

Comments are closed.