اشترك
Buy Neuth France products

طفلك والرياضة

0

مفيش شك ان ممارسة التمارين الرياضية حاجة مهمة جدا في حياة اطفالنا لانها بتعودهم علي سلوكيات صحية وقيم جميلة وبتجنبهم سلوكيات كتير مش كويسة ومشاكل صحية كتير في حياتهم بعد كده واهمالها ممكن يخلي الطفل يكتسب عادات سيئة خصوصا لما يكبر, وللاسف امهات كتير مش بيهتمو انهم يخلو اطفالهم يمارسو الرياضة بسبب انشغالهم واهتمامهم طول الوقت بدراسة ومذاكرة ولادهم. لو عايزين تعرفو فوايد الرياضة لاطفالكم وازاي تشجعوهم عليها وايه اضرار عدم ممارستها وازاي يمارسوها صح تابعو معانا المقالة دي.

فوايد ممارسة الرياضة للطفل:

-بتخلي حالة قلبه احسن وبتساعده يتنفس بشكل افضل
-بتقوي عضلات الطفل وده مفيد له جدا في حمل الشنطة المدرسية واي حاجة بيشيلها
-بتساهم في تقوية عظام الطفل وده بيجنبه امراض كتير
-بتنشط الدورة الدموية للطفل وده مهم جدا لانه بيقي من فقر الدم ومفيد للتحصيل الدراسي للطفل
-الرياضة الجماعية بتخلي الطفل يتعود انه يكون ايجابي واجتماعي ومتعاون وبتزود من ثقته بنفسه
-بتقي الطفل من امراض السكر والسمنة المفرطة
-بتقوي الجهاز المناعي للطفل وده مهم جدا لانه بيقيه من الاصابة بالامراض.
-بتخلي الطفل ينشغل وقت طويل عن اللعب علي الكمبيوتر ومشاهدة التلفزيون.
-بتخفف من الضغط النفسي اللي بيشعر بيه الطفل بسبب المذاكرة

ليه طفلك مبيحبش الرياضة:

للاسف ظاهرة كسل الاطفال وقلة النشاط الحركي عندهم اصبحت منتشرة جدا في الفترة دي بسبب الوقت الطويل اللي الطفل بيقضيه
قدام التلفزيون والكمبيوتر، ويمكن بسبب التعب بعد يوم طويل قضاه في المدرسة والمذاكرة عشان كده بيكسل علي ممارسة الرياضة ويمكن لان طبيعة حياة الاب والام مفيهاش اهتمام بممارسة الرياضة فالطفل مش بيهتم بإنه يمارسها،واصبح منظر الطفل البدين اللي لابس نظارة منتشر جدا بسبب عدم الاهتمام بممارسة الرياضة.

ازاي تشجع طفلك علي ممارسة الرياضة:
-اول خطوة في تشجيع طفلك علي ممارسة الرياضة هي انك انت نفسك تبدأ تؤمن بأهميتها و تهتم بيها لان طفلك بيقلدك في عاداتك
خصوصا في المراحل الاولي من حياته
-بلاش نغمة ( الرياضة تضييع وقت وكلام فاضي)لان الرياضة مهمة جدا لصحة طفلك اللي بتخلي تحصيله الدراسي افضل وبتجنبه
امراض كتير ووقت كتير هيقضيه عند الاطباء لما يكبر وفلوس كتير ممكن تتصرف علي العلاج.
-شجع طفلك انه يروح مدرسته ماشي علي رجليه لو ده متاح لان المشي في حد ذاته مهم جدا وبينشط الجسم خصوصا الصبح بدري في جو معتدل.
-لاحظ اهتمامات طفلك: يعني مثلا لو لاحظت انه بيحب الرسم خده لنزهة في الجنينة يوم الاجازة،الي جانب انه هيقضي وقت في الرسم
برضه هيتمشي في الجنينة وده شئ مفيد. لو لاحظت ان طفلك بيحب يتسلق شجعه علي رياضات التسلق
-خلي وقت الرياضة يكون ممتع لطفلك عشان يحب انه يمارسها باستمرار.
-اهتم ان وقت ممارسة الرياضة يكون بانتظام في نفس الوقت كل يوم لان ده هيعود الطفل علي ممارستها مع الوقت وهتبقي اساسية في
حياته.
-راعي دايما ان نوعية الرياضة اللي طفلك بيمارسها تكون امنة ومناسبة لسنه عشان ميحسش انها عبء عليه.
-لو كان طفلك بيلعب اي رياضة جماعية ومشترك في فريق فهمه انه ميزعلش لو خسر وان الخسارة شئ عادي ووارد المهم يتعلم منها
-خليه يشجع اصحابه اللي من سنه انهم يشتركو معاه في النشاط الرياضي اللي بيمارسه لانه الطفل بيتشجع اكتر مع اصحابه اللي بيحبهم
-لو لاحظت ان طفلك اصبح مواظب علي ممارسة الرياضة بشكل منتظم شجعه وكافأه علشان يداوم عليها .

ازاي تخلي طفلك امن وهو بيمارس رياضته المفضلة:
-بالنسبة للرياضات زي(ركوب العجل والسباحة و الجمباز)لازم تكون تحت اشراف المدرب المتخصص
-راقب طفلك وهو بيلعب بحيث انه ميحتكش بحاجة حادة او يخبط في حاجة ناشفه تصيبه.
-لو طفلك بيحب ركوب العجل فمن الافضل انه يلبس خوذة عشان تحميه من اي كدمات
-لو طفلك مش مدرب انه يتحرك كتير بلاش تخليه يمارس مجهود شاق بشكل مفاجئ بدون تمهيد لان ده ممكن يسببله الام في ركبته
وعضلاته وهيخليه مش متشجع بعد كده انه يمارس اي رياضة.
-يفضل ان الطفل يجري في مكانه لمدة 10 دقايق قبل ممارسة رياضته المفضلة علشان متحصللوش اصابات.
-ميفضلش ان الطفل يمارس رياضة فيها حركة قوية بعد الاكل مباشرة.

Share.

Comments are closed.