اشترك
Buy Neuth France products

طرق للحفاظ علي النظافة في الكوافير

0

مفيش شك ان كل انسان بيهتم جدا انه يعتني بمظهره الشخصي وانه يبان انيق وشيك قدام الناس خصوصا الاشخاص اللي طبيعة شغلهم وحياتهم بتخليهم يختلطوا كتير بالناس بشكل يومي,علشان كده رجال وسيدات كتير بيهتموا انهم يروحوا للكوافير من وقت للتاني بهدف العناية بالمظهر والنضافة الشخصية ,لكن للاسف مش بيركزوا علي مسألة انهم يحافظوا علي نفسهم من العدوي اللي ممكن تتنقللهم من الادوات اللي بيستعملها الكوافير,تابعونا علشان تعرفوا ازاي تحافظوا علي نفسكم من العدوي في صالونات التجميل(الكوافير).

صالونات التجميل والكوافير من الاماكن اللي بيتردد عليها ناس كتير باستمرار بهدف الاهتمام بالنضافة والمظهر الشخصي وبسبب تردد ناس كتير عليها بتعتبر من الاماكن اللي ممكن تنتشر فيها انواع مختلفة من العدوي من خلال ماكينات الحلاقة والسيشوار والفتلة والملقاط وادوات الباديكير وبتنتشر انواع العدوي اكتر بين الاشخاص اللي مش بيهتموا بنضافتهم الشخصية باستمرار.

 ازاي تهتموا بالنضافة وتتجنبوا العدوي في الكوافيرات:
-اطمنوا علي مستوي نضافة صالون التجميل اللي بتروحوه ومدي اهتمام العاملين بيه بنضافتهم ونضافة ادواتهم.
-اهتموا كويس جدا بغسيل ايديكم ووشكم وشعركم قبل ماتروحوا للكوافير لان ده بيقلل من احتمالات انتقال العدوي.
-يفضل ان كل شخص وهو رايح للكوافير ياخد معاه ادواته الشخصية لو امكن ويهتم بنضافتها باستخدام الكحول او ادوات التعقيم او يطلب من الكوافير انه يهتم بنضافة  الادوات اللي عنده  قبل مايستعملها.
-اهتموا بلفت نظر الكوافير للاهتمام بنضافة المناشف و الامشاط  والمقصات اللي عنده ونضافة الشفرات و السيشوار والمكوي لتجنب انتقال العدوي.
-من الممكن انك تلفت نظر الكوافير انه مايستعملش الات حادة او مؤلمة من اللي بتسبب جروح او قطع او تهيج للجلد خصوصا لو جلدك حساس  للالات الحادة او عندك مشاكل جلدية.
-في حالة الاصابة بأي مرض جلدي او جرح لسة مبدأش يلتئم يفضل عدم اللجوء لعمل الباديكير لان المشكلة ممكن تزيد.
-في حالة عمل الباديكير يفضل لفت نظر الكوافير انه يستعمل حوض بلاستيكي ويهتم بنضافته بعد كل استخدام.
-من الافضل في عمل الباديكير اصطحاب الادوات الخاصة بيكم زي المبرد والمقص وحجر ازالة الجلد الميت افضل من استعمال الادوات الخاصة بالكوافير.
-في حالة حدوث اي جرح او نزيف في الاصابع اثناء عمل الباديكير يفضل التوقف فورا عن عمله حتي بعد توقف النزيف لتجنب اي مشاكل جلدية.
-يفضل اثناء عمل الباديكير عدم ازالة الجلدة الزائدة الموجودة حوالين الضوافر لانها بتقي من الجراثيم والبكتريا اللي بتسبب العدوي.
-لازم تتأكدوا ان الكوافير بيستعمل مستحضرات امنة للجلد ومابتسببش مشاكل صحية.
-اهتموا جدا بنضافتكم الشخصية بعد ماترجعوا من الكوافير فورا خصوصا نضافة وشكم وايديكم ورجليكم وشعركم لان ده بيقلل من مشاكل العدوي

Share.

Comments are closed.