اشترك
like Sofy on Facebook

طرق لتعليم طفلك الاتيكيت

0

علشان ولادك هما مرايتك اللي الناس بيشوفوكي من خلالها فأكيد انتي بتتمني ان مرايتك تبقي جميلة علشان تظهرك قدام الناس بأجمل صورة , واكيد طبعا نفسك ان ولادك يتصرفوا قدام الناس بشكل سوي ومشرف ليكي ,وكتير من الاباء والامهات بيحملوا هم انهم ياخدوا ولادهم معاهم في الزيارات المنزلية او في المناسبات العامة خصوصا اللي فيها عدد كبير من الاغراب بسبب خوفهم من ان الاطفال الصغيرين يتصرفوا بشكل مش محسوب يسبب مشاكل واحراج للاب والام قدام الناس,خليكي معانا علشان نعرفك ازاي تساعدي ولادك انهم يكتسبوا السلوكيات المتحضرة ويشرفوكي قدام الناس وماتحمليش هم انك تاخديهم معاكي في اي مكان.

الاتيكيت اثناء الاكل:
-عودي طفلك باستمرار انه يغسل ايديه كويس جدا قبل الاكل وبعده وخلي العادة دي روتين بالنسبة له لانه لو اتعود عليها في البيت  هيتعود عليها برة البيت.
-فهمي طفلك بلطف انه ميعملش اصوات عالية اثناء شرب اي حاجة او اثناء اكل اي حاجة سخنة.
-اهتمي دايما انك تنضفيله فمه وسنانه وهو بياكل وخليه يتعود علي كده علشان نضافة ملابسه وعلشان يتعود انه يهتم بمظهره.
-عرفيه كويس ان الاكل له احترامه ومايصحش ابدا انه يعلي صوته اثناء الاكل او يخبط علي الاطباق او الترابيزة .
-لو لاقيتي انه بيتصرف تصرف مش مظبوط بلاش نغمة عادي ده طفل لانه بكده هيتمادي وحاولي تلفتي نظره بأسلوب كويس انه ميعملش كده.
-مهديله قبل الاكل ان ياكل من اللي هيتقدمله حتي لو مش عاجبه علشان ميصدرش اصوات عالية بسبب ضيقه من نوعية الاكل.
-لو لاحظتي ان طفلك شبع واخد كفايته من الاكل بلاش تغصبيه انه يقعد علي الترابيزة علشان كده ممكن يحس بملل ويبدأ يعمل اصوات مزعجة.سيبيه يواصل نشاطه بس خلي عينك عليه علشان ميتصرفش تصرف مش محسوب.

اتيكيت التعامل مع الناس:
-عودي طفلك دايما انه يرحب بالزوار في البيت بأسلوب لطيف ومهذب ويسلم عليهم كويس.
-الفتي نظره دايما انه ينادي الكبار باللقب قبل الاسم علشان يتعود علي كده .
-خليه دايما يتعود من صغره علي الالفاظ المهذبة زي حاضر و متشكر ومن فضلك .
-عرفيه كويس ان الاعتذار مش عيب ولا ضعف وانه لو عمل حاجة غلط يقول متأسف من غير جدال لانه الطفل العنيد بيكون سبب  ضيق للي حواليه.
-علميه انه ميقاطعش غيره ابدا اثناء الكلام .
-فهميه ان لو حد جابله هدية او اداله حاجة انه ياخدها منه ويشكره بأدب و بابتسامة لطيفة حتي لو مش عجباه .
-لو حسيتي ان الزوار دول مش بيعرفوا اوي يتعاملوا مع الاطفال او لو القعدة دي مفيهاش حاجة تشد انتباه طفلك فبلاش تخليه يقعد معاهم طول الوقت لانه ممكن يزهق ويبدأ يتصرف بشكل مش محسوب,خليه يمارس حياته بشكل طبيعي بس بصي عليه من وقت للتاني.

اتيكيت الكلام:
-كلميه بذوق وباحترام وبلاش توبخيه بشدة او تتكلمي قدامه بصوت عالي لانه بيتعلم منك وبيقلدك في التعامل مع الناس.
-بلاش تقوليله كلام زي انت غبي وانت مابتفهمش لانه كده بيكتسب سلوك عدواني لكن قوليله تصرفك ده غلط وهاكون مبسوطة منك لو ماعملتش كده تاني.
-بلاش تتكلمي قدامه في اسرار البيت لان الطفل مش بيعرف يفرق في الكلام وممكن يفتش الاسرار دي من غير مايقصد ولو لاحظتي انه بيعمل كده الفتي نظره انه مايتصرفش كده تاني.
-بلاش تشتمي او تكذبي قدام الطفل لانه بيحب يقلدك وممكن يتصرف زيك وحاولي تعرفي كويس نوعية اصحابه لانه بيتعلم منهم ولو لاحظتي ان طفلك بيشتم وبخيه بدون عنف.
-خبطي عليه قبل ماتدخلي اوضته علشان يتعود انه يعمل كده.
-بلاش تسألي في حاجات ماتخصكيش لان طفلك بيقلدك وممكن يتصرف زيك.
-لو لاقيتي ان طفلك توقف عن اي سلوك مش كويس اهتمي بتشجيعه علي كده علشان يستمر.
-عرفيه كويس قيمة انه يتعامل مع الناس باحترام وان ده هيخليه محبوب بين الناس.

انشرها

التعليقات مغلقه