اشترك
like Sofy on Facebook

ضعف خصوبة الرجل وطرق الحل

0

بالرغم من ان في ناس كتير بتتصور ان ضعف الخصوبة وتأخر الانجاب هو مشكلة خاصة بالمرأة لوحدها الا ان في بعض الحالات بيكون سبب تأخر الانجاب مسئولية الرجل و في اسباب مختلفة لضعف الخصوبة عند الرجال ,تعالوا نعرف ايه هي وازاي تتعالج.

مدي تأثير عامل السن علي خصوبة الرجل:
للرجال تحت سن ال40 بتكون نسبة الخصوبة حوالي 60% وبعد السن ده بتقل ل50% وبتقل جدا بعد سن ال60 .

اسباب لضعف الخصوبة عند الرجل:
-بعض انواع العدوي اللي بتتنقل من خلال العلاقة الجنسية زي الكلاميديا والسيلان ممكن تسبب مشاكل في الخصوبة.
-بعض الرجال بيكونوا مولودين بانسداد او مشكلة  في الخصية  او التعرض لكدمة جسدية في الخصية او البروتساتا او مجري البول.
-مرض السكر او ارتفاع ضغط الدم او امراض القلب او التعرض لجراحة في البروتساتا اوالمثانة او مجري البول .
-وجود اصابة سابقة بمرض الغدة النكافية مع التأخر في علاجها.
-بعض الحالات النادرة زي مشاكل الجينات او الكروموسومات وبعض الامراض الجينية الموروثة زي التليف الكيسي(انسداد الانابيب اللي بتنقل الحيوانات المنوية).
-وجود اختلال في الهرمونات في الغدة النخامية او الدرقية.
-ضعف الانتصاب وسرعة القذف.

علاج ضعف الخصوبة عند الرجل:
-لو حالة ضعف الخصوبة سببها عدوي الكلاميديا او السيلان فعلاج حالة ضعف الخصوبة بيتم من خلال علاج العدوي.
-لو حالة ضعف الخصوبة سببها امراض الغدة الدرقية او النخامية يبقي علاجهم بيساهم في علاج حالة العقم.
-العلاج بالمنشطات اللي بتساعد علي زيادة عدد الحيوانات المنوية وعلاج تشوهاتها والاسراع من حركتها والاستجابة له بتختلف من حالة للتانية.
-العلاج الجراحي اللي بيساعد علي توصيل الحيوان المنوي للبويضة علشان يحصل الاخصاب بشكل صحيح.
-علاج ضعف الانتصاب من خلال حقن القضيب او اجراء جراحة طبية.
-علاج حالات مشاكل القذف من خلال استعمال الادوية اللي بتساعد في تحسين  مستوي القذف او اجراء جراحة لاصلاح عملية القذف.

طرق تقوية الخصوبة عند الرجل:
-البعد عن العادات الغير صحية زي التدخين والكحوليات ولبس البنطلونات الضيقة ووضع اللاب توب علي الارجل والبعد عن التوتر والضغط العصبي لانه بيضعف الرغبة الجنسية وفي بعض الحالات بيسبب ضعف الانتصاب.
-تناول الاكلات والمشروبات الغنية بمضادات الاكسدة الموجودة في فيتامين C  زي البرتقال والليمون والبقوليات والبروتين والمأكولات البحرية.
-الحفاظ علي وزن مناسب لان الزيادة الشديدة او النقصان الشديد في الوزن بيسبب مشاكل في الحيوانات المنوية.

Share.

Comments are closed.