اشترك
like Sofy on Facebook

شفايف زى الورد

0

كل سيدة وكل بنت اكيد بتحلم ان منظر شفايفها يكون صحي وجميل وناعم زي منظر شفايف النجمات اللي بنشوف صورهم علي النت وعلي صفحات المجلات وعلي شاشة التلفزيون وكمان في اعلانات مستحضرات الشفايف,ومفيش شك برودة الجو في فصل الشتا بتأثر علي الشفايف وبتخليهم احيانا تحصل فيهم تشققات وبيحصللهم جفاف.ماتفتكروش ان مظهر الشفايف الجميلة الناعمة مش موجود غير بس عند النجمات اللي بتشوفوهم في التلفزيون لا انتو كمان ممكن تتمتعو بمنظر شفتين جميل وصحي. لو عايزين تعرفو شوية نصايح سهلة وبسيطة تساعدكم علي الحفاظ علي مظهر شفايفكم جميل وناعم ووردي وتعرفو ليه الشفايف بيحصل فيها جفاف تابعو معانا المقالة دي.

اسباب جفاف الشفايف:
-كتر تبليل الشفايف بلعاب الفم بيخلي الشفايف يحصللها جفاف.
-العنف في مسح وازالة المكياج من علي الشفايف.
-التعرض لبرودة الجو او الخروج من جو حر لجو برد بدون تمهيد.
-التعرض للشمس مدة طويلة .
-وجود ضعف عام في الجسم او انيميا او سوء التغذية.

عشان مظهر شفايفكم يبقي صحي وجميل اعملو الحاجات دي:

-استعملوا مرطب الشفاة:
اكيد شفايفكم بتكون معرضة اكتر انه يحصللها جفاف في الشتا وكمان التعرض وقت طويل لاشعة الشمس ممكن يسبب جفاف للشفايف علشان كده يفضل استعمال مرطب للشفايف يكون بيحتوي علي واقي ضد الشمس ان كنتو بتتعرضو للشمس وقت طويل.

اتجنبو العطور القوية:
اتجنبو استعمال العطور اللي ريحتها قوية لانها بتسبب جفاف الشفتين واستبدلوها بمستحضرات تكون فيها مرطبات للشفايف زي
الجلسرين والزيوت المعدنية.

السكر والعسل لشفايفكم:
كتير بنهتم بعمل ماسك لبشرتنا لكن مين فكر ان الشفايف برضه محتاجة ماسك؟ ممكن تخلطو شوية عسل صغيرين مع شوية سكر
وتدلكو شفايفكم بيهم بلطف بحركة دائرية,الحكاية دي بتحافظ علي الشفايف نضرة وبتخليها تحتفظ بمادة الكولاجين وبتأخر علامات العجز في الشفايف،بعد كده امسحو شفايفكم بقطعة قماش مبلولة وبعدين استعملو مرطب للشفايف.

-استعمال البلسم للشفايف:
ادهنو شفايفكم بالبلسم قبل الخروج لان ده بيساعد علي حماية الشفايف من الجفاف خصوصا في فصل الشتا وكررو الحكاية دي خلال
اليوم علشان تحافظو علي نضارة شفايفكم.

-فرشة الاسنان الناعمة:
اختارو فرشة اسنان تكون ناعمة علي شفايفكم ومرروها علي الشفايف بلطف لان ده بيخلي الشفايف مظهرها صحي ونضر وجميل.

-استعملو مستحضرات تساعد علي تنشيط الدورة الدموية:

زي المستحضرات اللي بتحتوي علي القرفة لانها بتساعد علي تنشيط الدورة الدوية في الشفايف وده بيخليها نضرة اكتر.

-شرب المية باستمرار والتغذية السليمة بتساعد في الحفاظ علي الشفايف وبتخليها صحية وجميلة وبتحمي من الجفاف.

-ابعدو عن التدخين نهائي:
معروف ان التدخين بيخلي خلايا الجلد كلها بما فيها الشفايف طبعا تعجز بدري وتفقد كمية كبيرة من مادة الكولاجين المسئولة
عن الحفاظ علي خلايا الجلد نضرة ,غير ان التدخين بيخلي لون الشفايف غامق وداكن ودي اكيد حاجة غير مرغوب فيها.

-بلاش عادة تبليل الشفايف بلعاب الفم:
العادة دي بتخلي الشفايف تنشف اكتر, ممكن تستعملو كريم غني بمادة الجلسرين علشان ترطبو شفايفكم.

Share.

Comments are closed.