اشترك
Buy Neuth France products

سنة جديدة بعادات جديدة

0

نهاية سنة وبداية سنة جديدة بتشكل مناسبة مفرحة عند ناس كتير,لكن علشان نفرح ببداية سنة جديدة وتكون سبب فرح لينا كلنا ياريت نبدأها بعادات صحية مفيدة لينا في حياتنا،وعلي فكرة مش لازم تغير نظام حياتك كله علشان تبدأ تتبع عادات صحية كويسة لكن ممكن بشوية حاجات بسيطة تعملها تستمتع بحياة صحية سعيدة وده اللي هنساعدك انك تعمله بشوية حاجات بسيطة.

عادات صحية للسنة الجديدة:
-حاول انك تنام عدد ساعات كافي:

البعد عن الاجهاد الزيادة والنوم عدد ساعات كافي من 7 ل8 ساعات مهم جدا للصحة لانه بيحمي من زيادة الوزن وامراض القلب وبيساعد جدا في تقوية الجهاز المناعي للجسم وبيحمي من امراض كتيرة.

-اهتم بالعادات الصحية في الاكل:
بلاش تفوتك اي وجبة من الوجبات الرئيسية لان الاهتمام بيها مهم جدا لانه بيدي الجسم الطاقة اللي بيحتاجها علشان يقوم بنشاطاته وحاول ان وجباتك الرئيسية تكون متكاملة وفيها كل العناصر الغذائية اللي جسمك بيحتاجها.

-اهتم بغسيل ايديك وسنانك:
غسيل الايدين بيحمي من امراض كتيرة جدا ممكن تتنقلك زي نزلات البرد في الشتا ,اغسل ايديك بعناية قبل الاكل وبعده وقبل ماتخرج من البيت وبعد ماترجع وبعد ماتلمس اي سطح او اي حاجة معرضة ان ناس كتير تلمسها وتكون مصدر عدوي ليك,كمان ماتنساش غسيل سنانك مرتين في اليوم لانه بيحميها من التسوس والالم والاصفرار ومن مشاكل صحية كتير واتعود علي كده في السنة الجديدة.

-خلي عندك وعي بنوعية الامراض الوراثية في عيلتك:

ممكن جدا يكون في عيلتك مرض بيتنقل من جيل لجيل عن طريق الجينات(بالوراثة)زي مرض السكر او سرطان الثدي او السكر او بعض انواع الاكتئاب,معرفتك بحاجة زي كده وخضوعك للفحوصات الطبية هتخلي عندك الوعي بمسألة انك تتفادي الاصابة بالمرض ده او علي الاقل تقلل احتمالات اصابتك بيه.

-حاول تستمتع بكل حاجة بتعملها:
لو بتاكل استمتع بطعم الاكل,وانت بتشتغل حاول تحب الشغل وتنبسط بيه وانت بتعمله,استمتع بكل حاجة بتعملها,بلاش تضيع وقتك في القلق من بكرة وشيل الهم لان ده بيحرمك من الاحساس بالسعادة اللي هو ضروري جدا للصحة النفسية.

-ماتنساش تساعد الناس:
ماتخليش يوم يعدي عليك في السنة الجديدة من غير ماتساعد اي حد محتاج للمساعدة سواء تعرفه او ماتعرفوش,اكيد هتلاقي في حياتك ناس محتاجين لمساعدتك سواء في بيتك او بين قرايبك او صحابك او حتي في الشغل والشارع والمواصلات,احساسك انك ساعدت حد محتاجك ده هيسعدك جدا وهيحسسك ان ليك دور فعال جدا في المجتمع.

-اهتم ان يكون ليك علاقات اجتماعية قوية:
السنة الجديدة فرصة جميلة انك تتصالح مع اي حد انت زعلان منه,بلاش تخلي السنة الجديدة تبدأ وانت مخاصم حد او زعلان مع حد,اهتم ان يكون ليك روابط قوية بالناس حواليك لان الحياة من غير ناس بتحبهم وبيحبوك ملهاش معني ولاحظ ان الشخص اللي بيقضي اغلب وقته لوحده بيكون معرض اكتر للاكتئاب لانه بيحس ان ملوش دور في حياة الاخرين,حاول تحب الناس وتقرب منهم هتلاقي ان هما كمان حبوك وقربوا منك,واللي هيساعدك في ده اكتر انك تنضم لنادي او تمارس انشطة خيرية.

-حاول من وقت للتاني تكسر روتين حياتك:
خلي السنة الجديدة فرصة انك من وقت للتاني تجرب حاجة جديدة زي انك تروح مكان مرحتوش قبل كده او تمارس رياضة جديدة او تتعرف علي ناس جدد عليك,هتحس ان كل دي حاجات بتسعدك ومفيدة جدا لصحتك النفسية.
-اهتم بممارسة الرياضة وشرب المية:
لو كنت مش بتهتم بإنك تمارس رياضة وتشرب مية باستمرار ياريت تتعود علي كده في السنة الجديدة لان العادات دي مفيدة جدا للصحة وبتحمي من الشيخوخة المبكرة وزيادة الوزن والتجاعيد ومن امراض كتيرة.

-حاول تنسي الذكريات المؤلمة:
بلاش تخلي السنة الجديدة تبدأ وانت زعلان من حاجة مرت بيك قبل كده,ابدأ السنة الجديدة بشكل جديد,استبدل التفكير السلبي في الحاجة اللي مزعلاك بتفكير ايجابي زي :انا بكرة عايز اعمل حاجة جديدة او خطط لمستقبلك وحط له اهداف موضوعية.

-خلي ليك هواية مفضلة:
حاول في السنة الجديدة تكتشف حاجة تكون بتحب تعملها باستمرار زي العزف علي الة موسيقية او الرسم او الكتابة او اي حاجة مفيدة تفرغ فيها طاقتك وتسعد بيها اللي حواليك.

Share.

Comments are closed.