اشترك
Buy Neuth France products

زيادة الوزن المناسبة للأم اثناء فترة الحمل

0

من الطبيعي جدا خلال الحمل انه تحصل زيادة في وزن الام نتيجة نمو الجنين جوة الرحم خلال 9 شهور الحمل،ومهم جدا لكل أم حامل انها تعرف ايه هو الوزن المناسب اللي المفروض تزيده خلال فترة الحمل علي حسب وزنها لان ده بيجنبها كتير من الامراض والمشاكل الصحية هي وطفلها خلال فترة الحمل وبعد الولادة،اعرفي معانا ايه هي الزيادة المناسبة لوزنك اللي المفروض تزيديها خلال فترة الحمل وايه اهمية ده لصحتك انتي وطفلك وازاي تقدري تحافظي علي وزن مناسب اثناء الحمل.
*اهمية الحفاظ علي وزن مناسب اثناء الحمل:
اكتساب الحامل وزن زايد عن معدل الزيادة الطبيعي خلال فترة الحمل ممكن يسببلها مشاكل صحية زي:
-ارتفاع ضغط الدم.
-سكر الحمل.
-بتزيد احتمالات الولادة القيصيرية.
-زيادة احتمال ولادة طفل حجمه كبير وممكن يصاب بالسمنة.
زيادة الوزن الاقل من الطبيعية خلال فترة الحمل بتزود احتمالات ولادة الطفل قبل المعاد.

*ايه هو معدل زيادة الوزن المناسبة للأم خلال الحمل:
ده بيعتمد علي وزنك ومؤشر كتلة جسمك قبل الحمل,(مؤشر كتلة الجسم هو(وزنك بالكيلوجرام/(طولك بالمتر في نفسه))
-لو مؤشر كتلة جسمك اقل من 18.5 يبقي انتي نحيفة يعني المفروض تزيدي خلال الحمل من 13-18 كيلوجرام.
-لو مؤشر كتلة جسمك من 18.5 ل25 يبقي انتي وزنك طبيعي والمفروض تكتسبي خلال الحمل من 11-16 كيلوجرام.
-لو مؤشر كتلة جسمك من 25-29 يبقي انتي عندك وزن زايد والمفروض تزيدي خلال الحمل من6-11 كيلوجرام.
-لو مؤشر كتلة جسمك اكتر من 30 يبقي كده عندك سمنة والمفروض ماتزيديش خلال الحمل اكتر من 5-8 كيلوجرام.
لاحظي ان في حالة الحمل بتوأم او اكتر اكيد وزنك هيزيد اكتر من كده.

*الوزن الزايد ده بيتكون من ايه:
-وزن الجنين من 3-3.6 كيلوجرام.
-وزن المشيمة 0.7 كيلوجرام.
-السائل الامنيوسي حوالي 1 كيلوجرام.
-وزن الثدي بيزيد حوالي 1 كيلوجرام.
-حجم الدم والسوائل 1.8 كيلوجرام.
– حجم الرحم 1 كيلوجرام.
-الدهون في الجسم من 2.5 ل 4 كيلوجرام.

*ازاي تقدري تحافظي علي وزن مناسب اثناء الحمل:

-اتبعي نظام غذائي صحي وحاولي تقللي من النشويات والسكريات والدهون.
-اسألي الدكتور اللي بتتابعي معاه عن امكانية ممارسة تمارين رياضية خفيفة اثناء الحمل.
-اهتمي بالخضروات والفواكة الغنية بالالياف بين الوجبات الاساسية.
-قللي من كمية الاكل في كل وجبة وزودي عدد الوجبات ل5 او 6 وجبات خفيفة في اليوم لان ده بيخليكي ماتحسيش كتير بالجوع
وبيسهل عملية الهضم .
-لاحظي ان جسمك مش بيحتاج سعرات حرارية كتير خلال اول 3 شهور من الحمل،في الشهور من الرابع للسادس جسمك بيحتاج 340
سعر حراري زيادة،في الشهور من السابع للتاسع جسمك بيحتاج 450 سعر حراري زيادة.

*تعملي ايه لو كان عندك وزن زايد عن الطبيعي خلال الحمل:
مش بيفضل خلال فترة الحمل انك تتبعي حمية قاسية تحرم جسمك من احتياجاته الاساسية لان ده بيضرك انتي والطفل لكن ممكن تحافظي علي وزن مناسب من خلال ممارسة تمارين رياضية مناسبة تحت إشراف الدكتور اللي بيتابع حالتك و البعد عن الاكلات اللي بتسبب السمنة واستبدالها بالخضروات والفواكه والمكسرات وشوفي خبرات امهات قدروا خلال فترة الحمل انهم يحافظوا علي وزن مناسب من خلال عادات صحية.

*تعملي ايه لو كان وزنك اقل من الطبيعي اثناء فترة الحمل:
لازم تمشي علي نصايح الدكتور اللي بتتابعي حملك معاه بخصوص اتباع نظام غذائي صحي يمد جسمك بكل احتياجاته علشان تكتسبي وزن مناسب لان ده مهم جدا لتجنب ولادة طفل قبل معاده .

Share.

Comments are closed.