اشترك
Buy Neuth France products

رايح تتقدم لعروسة ؟ .. اقرا المقالة دى الأول

0

رايح تتقدم لعروستك و عايز تسيب انطباع كويس عن نفسك قدام عيلتها ؟ لازم تهتم جدا بالإنطباع إللى هتسيبه قدام عروستك و أهلها سواء كنت تعرف العروسة أو أول مرة تشوفها
يوم التقدم لشريكة حياتك المستقبلية هيكون ذكرى مهمة جدا فى حياتك فلازم تهتم بإنه يكون يوم مميز

تعمل إيه قبل ما تروح بيت عروستك ؟

  • لو كنت تعرف البنت من قبل كدة لازم تديلها فرصة إنها تقول لأهلها عشان يكون عندهم فكرة مبدئية
  • بعد الخطوة دى لازم حد من العيلة يكلم والد العروسة زى الأب أو الأخ الأكبر وفى حالة عدم وجود الأب أو الأخ ممكن إللى يقوم بالإتصال الخال أو العم
  • فى حالة إنك هتشوف العروسة لأول مرة ممكن والدتك تكلم والدة العروسة أو أختها لتحديد الميعاد
  • مينفعش إن أهل العريس يحددوا ميعاد الزيارة ، تحديد ميعاد الزيارة لازم يكون متروك لأهل العروسة عشان يقدروا يجهزوا نفسهم
  • مينفعش تلبس لبس كاجوال وانت رايح بيت عروستك يفضل تلبس طقم مكون من قميص كلاسيك و جاكت كلاسيك لكن متلبسش كرافت لأنك مش رايح حفلة
  • اختار هدية مناسبة و بسيطة وانت رايح تزور العروسة فى أول مرة زى الشيكولاتة أو جاتوه أو بوكيه ورد شيك

تعمل إيه فى وقت الزيارة ؟

  • لا يفضل إنك تكون لوحدك فى أول زيارة لبيت العروسة ، يفضل إن يكون معاك حد من عيلتك زى الأب أو الأخ و لازم يكون فى حضور والد العروسة و الشخص إللى قام بالإتصال بأهل العروسة
  • خليك واثق من نفسك وبشوش و افتكر دايما إن انت فى جلسة تعارف مش فى امتحان
  • سيب بداية الكلام للشخص المرافق ليك و بعد كدة ابدأ بتقديم نفسك بشكل محترم و إيجابى و تجنب ذكر السلبيات فى التعارف الأول لأن الانطباعات الأولى بتدوم
  • لو كنت بتشوف العروسة لأول مرة تقدر تبص على وشها لأن دة حقك لكن مش من الذوق إنك تحسسها إنك مركز قوى فى شكلها أو تحسسها إن نظراتك مش مريحة ليها ، كمان متخليش عينيك تحوم كتير فى المكان خصوصا لو فى بنات تانيين موجودين غير العروسة
  • ممكن تستأذن إنك تقعد مع العروسة فى مكان هادى فى البيت عشان تتعرف عليها أكتر
  • ابعد عن المواضيع السياسية أو أى نوع من المواضيع ممكن يؤدى لاحتداد المناقشة

تعمل إيه بعد انتهاء الزيارة ؟

  • فى حالة إعجابك بالعروسة وحدوث قبول من الطرفين ممكن تطلب من والد أو والدة العروسة رقم تليفونها عشان يحصل تعارف أكتر أو تحددوا ميعاد لمقابلة تانية عن طريق التليفون

.فى حالة عدم اعجابك بالعروسة ممكن تتصل بوالدها أو تخلى شخص من العيلة يتصل بوالد أو بوالدة العروسة يعتذر بأسلوب          لطيف بدون تجريح فى شخص أو فى مظهر العروسة أو حد من عيلتها

Share.

Comments are closed.