اشترك
Buy Neuth France products

خلي شغل البيت ممتع ليكي ب 7 طرق

0

الامهات وربات البيوت بيقضوا وقت طويل اوي من يومهم في اعمال وشغل البيت اللي مش بيخلص من تنضيف وطبخ وغسيل وتوضيب وشراء طلبات البيت وحاجات كتير اوي بتعتبر اعمال شاقة بالنسبة لمعظم السيدات خصوصا اللي ملهاش حد يساعدها او اللي بتشتغل وبترجع مرهقة وكمان اللي عندها اطفال صغيرين مايقدروش يستغنوا عنها وطبعا ميعرفوش يساعدوها في اي حاجة في البيت,اعرفي شوية افكار بسيطة تخليكي تقضي وقت شغل البيت بشكل ممتع وماتحسيش بالزهق والتعب وانتي بتعملي شغل البيت.

1-اسمعي مزيكا بتحبيها:
لو كنتي بتعملي حاجة مش محتاجة منك تفكير فممكن انك تشغلي مزيكا بتحبيها علي موبايلك او جهاز الكمبيوتر او اللاب توب لو تقدري تخليه قريب منك,هتلاقي انك نسيتي تعب شغل البيت وقضيتي شوية من الوقت في سماع الحاجة اللي بتحبيها.
2-شغلي التلفزيون:
لو كنتي بتشتغلي في مكان في البيت قريب من التلفزيون فممكن انك تشغلي فيلم او مسلسل بتنبسطي لما بتشوفيه وممكن تخليه وقت مفيد ليكي في انك تتفرجي علي برنامج يفيدك ويضيف لخبراتك ومعلوماتك,هتحسي ان ده افضل ليكي اوي من انك تفضلي منعزلة طول الوقت في شغل البيت اللي مش بيخلص ومش بتستمتعي بوقتك ولا بتضيفي لشخصيتك وفكرك حاجة جديدة.
3-اتكلمي مع صديقة ليكي:
اذا كنتي تقدري انك تتكلمي مع والدتك او واحدة صاحبتك في التليفون وانتي بتعملي شغل البيت فده هيساعدك وهيخليكي تحسي ان وقت شغل البيت عدي بسرعة من غير ملل وهتلاقي انها كانت فرصة حلوة انك كلمتي حد بتحبيه واكيد كلامك مع الحد ده هيسعدك وهيديكي طاقة ايجابية تخليكي تنجزي شغل البيت بحب وبسرعة.
4-خليكي قريبة من ولادك:
مهما كنتي مشغولة في شغل البيت فمهم جدا ان ليكي ولولادك انك تكوني قريبة منهم ولو بعض الوقت وتشاركيهم في اللي بيعملوه لان ده هيسعدكم جدا افضل من ان ولادك يحسوا انك مشغولة عنهم معظم اليوم ولو كان سنهم يسمح انهم يساعوكي فممكن تشركيهم معاكي,ده هيفيدك في ان شغل البيت يخلص اسرع وهيفيدهم في انهم يعتمدوا علي نفسهم وعلشان تحفزيهم ان كانوا صغيرين فممكن تقوليلهم ان دي لعبة هتلعبوها مع بعض .
5-قضي وقت في التأمل:
ممكن تستغلي شوية من وقت شغلك في البيت في انك تدي فرصة لفكرك انه يتأمل وممكن تشغلي فكرك بالصلاة والدعاء ولو في سرك اثناء شغل البيت,صلي علشان بيتك وعلشان الناس اللي بتحبيهم وعلشان المجتمع ككل,هتحسي انك شغلتي فكرك بحاجة مفيدة ومريحة وانتي بتعملي شغل البيت.
6-شغلي عداد الوقت( التايمر):
اظبطي التايمر كل 30 دقيقة وانتي بتعملي شغل البيت ولاحظي انتي بتعملي كل مهمة من اللي وراكي في مدة اد ايه علشان الوقت مايسرقكيش في حاجة معينة وتنسي بقية الحاجات اللي وراكي وتضطري تعمليها باستعجال من غير ماتديها حقها.
7-شجعي نفسك:
طبيعي اوي انك تحسي بالملل وانتي بتعملي شغل البيت خصوصا الحاجات اللي فيها مجهود بدني شديد علشان كده لازم تحفزي نفسك, فلو في مرة من المرات عملتي الحاجات اللي وراكي اسرع وبشكل احسن فمن حقك انك تشجعي نفسك بإنك تعملي حاجة بتحبيها او تاكلي حاجة بتحبيها, وانتي بتشتغلي حفزي نفسك انك لما هتخلصي شغل البيت هتعملي الحاجة دي.

 

 

Share.

Comments are closed.