اشترك
Buy Neuth France products

خلص جسمك من السموم من غير ما تموت من الجوع

0

كل يوم بنتعرض لملوثات مختلفة سواء فى الأكل أو فى الهواء أو فى الأدوية إللى بنتناولها و المواد الكيميائية المختلفة إللى بنتعامل معاها زى مستحضرات التنظيف الكيميائية ، الملوثات إللى بنتعرض لها فى النهاية بتؤدى لتراكم السموم بداخل أجسامنا و بيزيد ترسب السموم مع الضغوط النفسية إللى أصبحت شئ طبيعى بنتعرضله يوميا سواء فى المواصلات أو فى مجال العمل أو فى علاقاتنا الأسرية

اعرفوا معانا إزاى تخلصوا جسمكم من السموم من غير ما تحرموا نفسكم أو تشعروا بالضعف من قلة الأكل

تجنب اللحوم :
تناول اللحوم خصوصا اللحوم الحمراء بيضمن ليك الحصول على بعض العناصر الغذائية المهمة لجسمك زى عنصر البروتين و الحديد لكن المشكلة إن عملية هضم اللحوم بتحتاج طاقة و مجهود من جسمك أكتر من الأطعمة النباتية ، تقليل كمية اللحوم إللى بتتناولها هيساعد جسمك على التخلص من السموم بشكل أسرع مش بس كدة لكن بتقليل حصتك من اللحوم هتحسن عملية الهضم فى جسمك وهتوفر الطاقة المستخدمة لهضم اللحوم و بكدة تقدر تمارس التمارين الرياضية لوقت أطول من غير ما تشعر بالتعب ، التمارين الرياضية لها فايدة كبيرة فى تخليص جسمك من السموم و دة لأن العرق الناتج عن ممارسة التمارين الرياضية بيساعد فى تخليص جسمك من السموم

كتر من الأطعمة النباتية :
متمنعش جسمك عن كل الأكل أو تعتمد على السوائل بس عشان تتأكد إن مفيش أى سموم هتوصله ، لأنك هتعرض جسمك للشعور بالضعف والصداع و نقص فيتامينات معينة ، لكن من الأفضل إنك تستبدل اللحوم الحمراء و الأطعمة المصنعة بالفواكه و الخضروات و خصوصا الخرشوف و السبانخ و البطاطس و الفلفل الملون و الموز و التفاح و الكمثرى و الجزر ، و من الأفضل تناول الخضروات و الفواكة النيئة أو المطبوخة على البخار

اهتم بالألياف :
عدم تناول الطعام و الصيام لفترات طويلة مش بيساعد على تنظيف القولون لكن على العكس ممكن يؤدى لاضطراب فى حركة الأمعاء ، زيادة حصة جسمك من الألياف هتساعدك تتخلص من السموم الموجودة فى جسمك لأن تناول الألياف بيساعد فى تسهيل حركة الأمعاء والتخلص من الفضلات السامة ومن أكتر الأطعمة الغنية بالألياف الخضروات و الفواكه والحبوب الكاملة و البقوليات

تناول مشروبات تساعدك على التخلص من السموم :
زى تناول مشروب عصير الليمون والفلفل الحريف مع الماء ، فايدة عصير الليمون هى تحفيز الكبد على انتاج الأحماض الأمينية المهمة للتخلص من السموم فى الجسم ، فايدة الفلفل الحريف هى التخلص من المخاط المتراكم فى الجسم ، بس خلى بالك انك هتكون محتاج مناديل ورقية جنبك فى الوقت دة ! اخلط المكونات مع الماء الساخن أو الشاى الأخضر للحصول على نتيجة أفضل

ريح أعصابك :
الاهتمام بصحتك النفسية و العاطفية جزء من عملية التخلص من السموم ، الضغط العصبى بيؤدى لتراكم السموم فى الجسم أو بيصعب عملية التخلص منها و طردها ، جرب تتنفس بالراحة و ببطء و تمارس بعض تمارين الاسترخاء زى تمارين اليوجا و التأمل أو تعمل مساج خفيف لجسمك و أهم حاجة تحاول تبعد نفسك عن مصادر التوتر بقدر الإمكان

Share.

Comments are closed.