اشترك
Buy Neuth France products

جهز نفسك للامتحانات

0

فترة الامتحانات بتعتبر فترة مهمة جدا عند كل الطلاب لان شكل وملامح مستقبلهم بتتحدد من خلالها ,لكن للاسف كتير من الطلبة بتجيلهم مشاعر سلبية زي الضيق والقلق والتوتر والانعزال في الفترة دي بسبب الضغط النفسي اللي بيتعرضوا ليه,لكن احنا النهاردة هنساعدكم بشوية خطوات بسيطة انكم تستعدوا للامتحانات وتعدوها بشكل عادي من غير قلق وتوتر وتقدروا تنتجوا وتركزوا احسن.

-ذاكر في مكان مناسب:
اهتم انك تذاكر في مكان مرتب ونضيف وهادي لان ده بيساعدك انك تركز احسن,حاول تشيل من قدامك اي حاجة مش ضرورية للمذاكرة وممكن تشتت تركيزك في وقت المذاكرة زي الموبايل.

-ركز علي الاضاءة والتهوية:
انك تذاكر في اوضة مستوي الاضاءة فيها مش قوي ده بيتعب عينك وممكن يصيبك بالصداع,علشان كده مهم جدا انك تفتح الشباك ولو شوية صغيرين علي الاقل بالنهار يدخللك الهوا والنور المهمين جدا لصحتك وتركيزك.

-حاول تبعد عن اي مصدر للدوشة:
التلفزيون والمزيكا العالية اثناء المذاكرة بتشتت التركيز لكن الحكاية دي بتختلف من حد للتاني يعني لو كنت من النوع اللي بيركز اكتر في المذاكرة لو سمعت مزيكا يبقي اعمل كده لكن يفضل انها تكون مزيكا هادية.

-ماتنساش صحتك:
مهم جدا انك تدي لنفسك فترات من الراحة خلال وقت المذاكرة،ممكن تاخد راحة لمدة 10 دقايق كل ساعة او كل 50 دقيقة تجدد فيها نشاطك او تتحرك من مكانك لان القعدة وقت طويل بدون حركة بتسبب الم في المفاصل وكمان بتسبب زيادة في الوزن.

-لازم تنام كويس:
ماتخليش الانشغال والضغط العصبي ينسيك انك تنام ساعات كافية,مهم جدا انك تنام 7 او 8 ساعات وحاول تتجنب السهر لساعات طويلة بالليل لان ده بيضعف مناعتك وبيضر جهازك العصبي وبيسبب شيخوخة مبكرة,افضل وقت للنوم في فترات الامتحان هو من الساعة 10 بالليل ل6 الصبح لان ده غير انه مفيد لصحتك كمان بيعود جسمك علي الصحيان في ميعاد الامتحان.

-اختار افضل وقت للمذاكرة:
افضل وقت للمذاكرة هو اول ماتصحي من النوم لان ذهنك بيكون صافي ومستعد لاستقبال المعلومات،ويفضل انك تبدأ بالمواد الصعبة وانت بكامل تركيزك علشان تستوعبها اسرع.

-بلاش تذاكر نفس نوعية  المواد في وقت واحد:

يعني بلاش تذاكر مادتين فيهم حفظ او مادتين عملي ورا بعض علي طول, حاول تنوع في طبيعة المواد اللي بتذاكرها يعني لو هتذاكر مادة نظري ذاكر بعدها مادة عملي وبلاش تذاكر مادتين صعبين ورا بعض لان ده هيجهد مخك.

-ذاكر بطريقة السؤال والجواب:
يعني كل جزء بتذاكره اسأل نفسك كويس جدا هو السؤال في الامتحان هييجي في الجزئية دي ازاي,الطريقة دي بتجهزك اكتر للامتحان

-حاول تحب اللي بتذاكره:

بلاش تذاكر دايما بإحساس انك بتغصب علي نفسك طول الوقت,حاول تذاكر بفهم وحب واستمتاع علشان تركز اكتر.

-اطلب المساعدة:
لو في جزء معين او مادة معينة انت مش قادر تهضمها اسأل حد من المدرسين او حد من زمايلك تكون بتثق فيه.

-خليك ايجابي:
ماتخليش وقت الامتحانات ده عبارة عن توتر وقلق,فكر بإيجابية في اللي انت عايز توصلله او في هدف مفيد ليك لان ده بيحفزك اكتر علي المذاكرة,استبدل جملة(انا خايف اسقط)بجملة(انا هتعب واذاكر علشان انجح واتفوق)

Share.

Comments are closed.