اشترك
Buy Neuth France products

جمال شفايفك وضوافرك في الشتا

0

الاستمتاع بشفايف ناعمة وضوافر قوية بيعتبر من اهم عناوين الجمال عند كل سيدة وكل بنت,لكن بسبب البرد الشديد في فصل الشتا ولان الشفايف والضوافر من الصعب حمايتها من برودة الجو فبيكون مظهر الشفايف والضوافر الصحي حلم صعب التحقيق في الشتا خصوصا بالنسبة للنساء اللي بيتعرضوا بشكل مستمر للجو البرد,بس الشتا ده هتستمتعي بمظهر جميل وجذاب لشفايفك وضوافرك لو اهتميتي بيهم بشوية افكار بسيطة تقدري تعمليها في البيت من غير وقت او مجهود او اي تكلفة مادية.

وصفات من الطبيعة لجمال وترطيب شفايفك:
-الالوفيرا:
الالوفيرا بيساعد في حماية شفايفك من التشقق والجفاف ,جربي زيت الالوفيرا علي شفايفك قبل ماتنامي بالليل او قبل ماتخرجي وتتعرضي للبرودة.

-زيت الجوجوبا:
من افضل الزيوت المغذية للجلد وللشفايف وبيدي شفايفك النعومة والترطيب اللي بتحتاجهم في الشتا.

-اكياس الشاي الاخضر:
من اقدم العلاجات المنزلية لعلاج تشقق وجفاف الشفايف,استعملي كيس مستعمل من اكياس الشاي الاخضر وحركيه علي شفايفك لمدة 4 دقايق بشكل يومي قبل ماتنامي.

-عصير الليمون:
اخلطي 3 قطرات من عصير الليمون مع معلقة لبن وحطيهم في التلاجة لمدة ساعة,وبعدين حطي الخليط علي شفايفك وكرري الحكاية دي لمدة 3 ايام هتحسي بتحسن كبير في مظهر شفايفك.

وصفات للعناية بضوافرك:
-زيت الزيتون:
اخلطي معلقة من زيت الزيتون مع 2 صفار بيضة في طبق صغير وبعدين حطي ضوافرك في الخليط لمدة 10 دقايق وبعدين اشطفيهم كويس واعملي كده مرتين في الاسبوع علشان ضوافرك تبقي اقوي.

-عصير البرتقال:
حطي ايديكي في عصير البرتقال لمدة 10 دقايق وبعدين اشطفيهم ،عصير البرتقال غني بحمض الفوليك اللي بيساعد علي تقوية الضوافر.

-العسل:
امزجي معلقة عسل مع ربع كوباية لبن مع 2 بياض بيضة في طبق صغير وحطي ضوافرك في الخليط لمدة ¼ ساعة وبعدين اشطفيهم كويس,الكالسيوم والبروتين في اللبن والبيض هيخلوا ضوافرك قوية جدا.

-خلطة زيت اللوز مع زيت الزيتون:
اخلطي معلقتين من زيت اللوز مع معلقتين من زيت الزيتون وحطي فيهم قطنة وبعدين امشي علي ضوافرك بالقطنة اللي فيها الخليط وسيبيها لمدة 5 دقايق وبعدين امسحي الخليط من علي ضوافرك بفوطة نضيفة.

 

Share.

Comments are closed.