اشترك
like Sofy on Facebook

تمارين الكارديو وتمارين رفع الاثقال

0

مفيش شك ان كل انسان بيتمني ان شكل جسمه يكون صحي وجميل وقوي ومفيهوش ترهلات,علشان كده ناس كتير بيهتمو بممارسة انواع مختلفة من التمرينات الرياضية,واحنا هنعرفكم ايه هو الفرق بين تمارين الكارديو(التمارين الهوائية زي الجري والوثب)وبين تمارين رفع الاثقال وايه هو هدف كل نوع منهم وهنعرفكم ازاي تمارسو التمارين دي بشكل صحي .
تمارين الكارديو:
ودي زي المشي والجري ونط الحبل والسباحة وركوب العجل وكرة القدم وكرة السلة وكرة اليد والتنس,النوع ده من التمارين مش بيحتاج اكتر من نص ساعة في اليوم وممكن ممارسته في اي مكان مفتوح.

ازاي تمارس تمارين الكارديو صح:
-لازم ممارستها في هوا نقي من الدخان والتلوث علشان متحصلش مشاكل صحية.
-يفضل عدم ممارستها اكتر من 5 او 6 مرات في الاسبوع علشان الجسم ميخسرش كتلته العضلية.
-يفضل ان مدة ممارستها ماتزيدش عن ساعة الا تلت في المرة الواحدة علشان ميحصلش اجهاد للجسم والعضلات تضعف.
-متمارسش التمارين علي معدة فاضية،كل حاجة خفيفة تديك طاقة قبل بداية التمارين,بس متاكلش وجبة تقيلة لانها ممكن تصيبك بالخمول
وتكون صعبة الهضم .
-علشان يتم حرق الدهون من خلال التمارين دي من الافضل التنويع فيها كل فترة يعني مثلا لو الاسبوع ده هتمارس رياضة الجري
استبدلها بعد فترة برياضة السباحة او غيرها من الرياضات زي ركوب العجل مثلا.
-الانتظام في ممارسة التمارين دي مهم جدا لان التوقف عن ممارستها فترة بيسبب زيادة الوزن.

ايه هي فوايد تمارين الكارديو للجسم:
-بتنشط الدورة الدموية للجسم.
-بتقوي عضلة القلب.
-بتساعد في تقوية الجهاز المناعي ضد الامراض المختلفة.
-بتأخر علامات الشيخوخة زي التجاعيد.
-بتقي من زيادة الوزن وبتساعد في التخلص من الدهون الزايدة لو اتمارست صح.
-بتدي طاقة ايجابية وبتخلص من الكابة والتوتر.

تمارين رفع الاثقال:
ودي بيكون هدفها هو بناء عضلات قوية لكنها مش بتساعد في التخلص من الدهون الزايدة الا لو مارست معاها تمارين الكارديو.

فوايد تمارين رفع الاثقال:
-بتساعد في الحصول علي عضلات قوية وجسم ممشوق.
-بتقي من مرض هشاشة العظام.
-بتساعد مع تمارين الكارديو في حرق الدهون.

ازاي تمارس تمارين رفع الاثقال صح:
-من الافضل عدم ممارستها قبل سن ال18 سنة علشان بناء العضلات والاعصاب يكون اكتمل
-يفضل قبل التمرين تناول قطعة حلويات صغيرة تدي للجسم الطاقة اللي بيحتاجها.
-بلاش تاكل وجبات دسمة قبل التمرين علي طول علشان ده بيدي الجسم خمول وبيصعب الاستمرار في التمرين.
-اهتم بالتغذية الصحية المتوازنة بين البروتينات والكالسيوم والكربوهيدرات.
-بلاش تمارس رفع الاثقال كل يوم لان العضلات بتحتاج راحة علشان متضعفش.

-من الافضل انك متبدأش علي طول بتمارين رفع الاثقال لكن ابدأ بتمارين الاحماء لمدة 10 دقايق او ربع ساعة زي المشي او الجري
وبعض التمارين الخفيفة للظهر والذراعين لتجنب اي اصابات اثناء حمل الاثقال.
-راعي ان وضعك اثناء ممارسة رفع الاثقال يكون صح بحيث ان ضهرك يكون مفرود.

Share.

Comments are closed.