اشترك
Buy Neuth France products

تقدري تباني جميلة بدون مكياج

0

نسبة مش قليلة من السيدات والبنات بيشوفوا ان عمل المكياج الكامل بشكل ميضرش بشرتهم حاجة مكلفة ماديا ليهم غير انها بتاخد كتير من وقتهم الصبح والمكياج الكامل ممكن يبان مصطنع وكمان في عوامل بتأثر علي جماله خلال اليوم زي الاكل والشرب غير طبعا البرودة والحرارة , و مش ضروري انك تعملي مكياج كامل بشكل يومي وانتي رايحة شغلك او مكان دراستك علشان تباني جميلة بالعكس ممكن بحاجات بسيطة تعمليها تبقي زي القمر وكمان هتبقي واثقة في نفسك ومش مصطنعة.

-ركزي علي نضافتك الشخصية:
خدي دوش مرة علي الاقل يوميا واغسلي وشك مرتين او تلاتة في اليوم لان ده مهم جدا لحماية جسمك من تأثير التراب والتلوث واستعملي المستحضرات اللي تناسب طبيعة بشرتك وشعرك وبلاش تعتمدي في اختيارك علي ريحة الشامبو والصابونة او الشاورجيل اللي بتشدك لكن ركزي علي المستحضر اللي بيمد جسمك باحتياجاته الاساسية وبلاش تزودي من اي مستحضر لان الافراط في اي حاجة ممكن يضرك ولما تكوني بتاخدي دوش اهتمي جدا بنضافة الاماكن اللي مش باينة لانها من اكتر الاماكن اللي الاهمال في نضافتها بيسبب روايح مش محببة ولو زادت عن حدها اكيد هتحرجك.

-اهتمي بترطيب جسمك:
شرب المية مهم جدا لترطيب وجمال بشرتك وجلدك,واستعملي اللوشن اللي يناسب طبيعة بشرتك يعني مثلا لو بشرتك دهنية يبقي اختاري لوشن مفيهوش زيوت علشان يحمي بشرتك من الحبوب والرؤوس السودة ولو بشرتك جافة اختاري لوشن مرطب يحمي بشرتك من التشقق والجفاف.

-اهتمي بشعرك:
شعرك من اهم اسرار جمالك علشان كده اختاري شكل تسريحة شعرك اللي تناسب وشك وتبين جماله واختاري الشامبو والمستحضرات اللي تناسب طبيعة شعرك يعني لو شعرك دهني اختاري شامبو للشعر الدهني وابعدي عن الزيوت اللي بتزود افراز الدهون في شعرك ولو شعرك جاف اختاري شامبو للشعر الجاف واستعملي الزيوت اللي بتساعد في تغذية الشعر وحمايته من الجفاف.

-استعملي لوشن ريحته حلوة:
لو مش عايزة تستعملي برفان او اسبراي ممكن تستعملي لوشن او شاور جيل يخلي ريحتك حلوة .

-اختاري ملابسك بشكل مناسب:
اختيار الملابس اللي تبينك جميلة مش بالضرورة يكون من خلال الملابس الغالية والماركات لكن مهم جدا ان ملابسك تكون مناسبة لطبيعة المشوار اللي انتي رايحاه يعني اللي يناسب الشغل او مكان الدراسة اكيد غير اللي يناسب المناسبات الرسمية غير طبعا لبس النادي وممارسة الرياضة ,وطبعا اللي يناسب الصيف غير اللي يناسب الشتا .

اختاري الاحذية كويس:
مهم جدا في الحذاء انه يكون مريح ومقاسه مناسب علشان يدي فرصة للرجلين انها تتنفس جواه ويكون مناسب لالوان لبسك وشنطتك ويناسب طبيعة المشوار اللي انتي رايحاه وطبعا مهم انه يكون عندك حذاء بكعب  للمناسبات الرسمية ويفضل انه يكون مريح علشان ميتعبكيش ولازم يكون عندك حذاء مريح يناسب المشاوير اللي فيها مشي كتير وطبعا مهم في اختيار الحذاء انه يكون مناسب لحالة الجو.

-ابتسمي:
ابتسامتك بتخلي منظر وشك جميل ومريح جدا للناس اللي بيشوفوكي لكن علشان ابتسامتك تبان مشرقة يبقي لازم تغسلي سنانك كويس وتهتمي ان ريحة فمك تكون كويسة وممكن تقفي قدام المراية وتشوفي ايه هي اجمل تعبيرات وشك اللي بتخليكي جميلة,وكمان ثقتك بنفسك بتضيف ليكي جمال وجاذبية في التعامل مع الناس من حواليكي علشان كده خليكي فخورة بنفسك وحاولي تطوري شخصيتك للاحسن لان ده من عناوين جمالك.

Share.

Comments are closed.