اشترك
Buy Neuth France products

تطور المشي عند الاطفال

0

بيعتبر المشي من اهم الخطوات اللي بيخطيها الطفل في حياته وطبعا كل اب وام بيكونوا مستنيين ان طفلهم يبدأ يمشي ومتشوقين انهم يعرفوا ده هيحصل امتي,لكن في الحقيقة ان توقيت بداية المشي عند الاطفال بيختلف من طفل للتاني،اعرفي ايه  هي علامات استعداد طفلك للمشي وازاي تساعديه انه يتعلم المشي وتخليه امن وهو بيبدأ خطواته الاولي في المشي.

امتي بيقدر الطفل انه يمشي:
معظم الاطفال بيبدأوا يخطوا خطواتهم الاولي في عمر السنة تقريبا وغالبا معظم الاطفال بيبدأوا يمشوا من سن 9 شهور لسن سنة ونص ومفيش داعي للقلق لو طفلك مبدأش يمشي بعد عيد ميلاده,الحكاية دي بتختلف من طفل للتاني علي حسب استعداده النفسي للمشي وقوة عضلاته والتوافق العصبي عنده.

ايه هي مراحل تطور طفلك في المشي:
-في البداية الطفل بيبدأ يتعلم انه يقعد لوحده وبعدين بيدخل في مرحلة الحبو وبعدين مرحلة الوقوف لحد مابيتعود انه يمشي لوحده,لكن مش كل الاطفال بيدخلوا في مرحلة الحبو وبيتنقلوا علي طول من مرحلة انهم يقعدوا لمرحلة الوقوف والمشي علي طول علشان كده مفيش داعي للقلق لو طفلك مبدأش يحبي .
-في بداية الشهر السادس او السابع الطفل بيقدر انه يقعد لوحده ويتدحرج و ينط لو خليتيه يقف علي رجليكي ويثبت رجليه عليهم وده هيكون نشاط ممتع ليه خلال الشهرين اللي جايين.
-مع بداية الشهر التاسع او العاشر طفلك هيبدأ يتعلم انه يتني ركبته ويقف بس بالاستناد علي ايد الكرسي او الترابيزة علشان كده لازم وطفلك بيحاول يقف تطمني كويس ان في اسطح ثابتة في طريقه هتساعده .
-في الشهر ال11 الطفل هيتعلم انه يقف لوحده ويتني ركبته بدون مساعدة ومع بداية الشهر ال 12 هيقدر يمشي بالاستناد علي سطح ثابت او بالاستناد عليكي وفي اطفال في الوقت ده بيمشوا عادي بدون الاستناد علي اي حاجة ,لكن لو طفلك استمر علي المشي بالاستناد لحد سن سنة وشهر فده معناه ان خطوة المشي لوحده ممكن تتأخر شوية وفي اطفال بيبدأوا يعتمدوا علي نفسهم تماما في المشي مع سن سنة و نص تقريبا ولاحظي ان المشي زيه زي اي قدرات تانية الطفل بيكتسبها يعني في اطفال ممكن يتأخروا شوية في المشي بس يقدروا يكتسبوا قدرات تانية اسهل واسرع والعكس بالعكس.
-في سن حوالي 15 او 16 شهر  طفلك هيتحسن جدا في قدرته علي المشي وممكن يقدر انه يطلع وينزل السلم او يشوط كورة لكن ممكن مايقدرش يطلع وينزل السلم لوحده من غير مساعدتك لحد مايكمل سن السنتين.

ازاي تساعدي طفلك علي المشي:

-بلاش تعوديه علي المشاية لانها مش هتخليه يمشي بدري بالعكس هتبطأ من قدرته علي المشي لانها مش هتساعده في تطور عضلاته المهم جدا للمشي ومش هتخليه يقدر يتوازن لوحده في وقت بدري وهو بيحاول يمشي.
-لما طفلك يبقي سنه 5 او 6شهور امسكيه من تحت دراعاته وخليه يقف علي رجليكي لان ده هيقوي عضلات رجليه وهيخليه يمشي اسرع,وكمان علميه ازاي يتني ركبته لان ده هيخليه يقف ويقعد احسن.
-شجعي طفلك كل يوم انه يقف ويقعد بالاستناد عليكي او علي اي سطح ثابت لان ده مهم جدا لتقوية عضلاته وهيخليه يحس بالتوازن لما يبدأ يمشي.
-ساعديه انه يمشي في اماكن مختلفة لان الطفل هيفرح بكده وهيحس انها فسحة بالنسبة له جنب تعليم المشي وهيكون مبسوط اوي لو جرب المشي علي الرملة او في الجنينة,بس طبعا اطمني ان المكان امن بحيث ان الطفل رجله ماتتخبطش في حاجة وهو بيحاول يمشي.
-لو لاحظتي ان طفلك بيتطور احسن في قدرته علي المشي شجعيه وامدحيه لان ده هيخليه يستمر ويتحسن اسرع في المشي.
-خاللي بالك ان طفلك بيحاول يكتسب مهارات تانية في حياته غير تعليم المشي زي انه بيحاول يتعلم الكلام ويميز الدنيا من حواليه علشان كده بلاش تقلقي لو طفلك اخد فترة راحة من المشي و رجع تاني لمرحلة الحبو ,فترة الراحة دي ممكن تستمر لمدة اسابيع قليلة ويمكن شهر,حاولي تشجعيه بصبر انه يرجع يمشي تاني.
-بلاش تقلقي من الوقعات البسيطة اللي بيقعها الطفل وهو بيحاول يمشي لان ده طبيعي طالما البيت مناسب ومفيش مجال للتعرض للكدمات وبلاش اول مايقع تجري عليه,شجعيه انه يقوم لوحده بعد مايقع.
-لاحظي ان الاطفال في مرحلة تعليم المشي بيناموا وقت اطول وبيحسوا بالجوع اكتر ودي كلها حاجات كويسة ومهمة للنمو.

امتي تقلقي لو طفلك مبدأش يمشي:
لو طفلك مبدأش يمشي لحد سن سنة ونص يبقي لازم تاخدي رأي الدكتور ولاحظي ان الاطفال اللي بيتولدوا قبل معادهم بيمشوا في وقت متأخر عن الاطفال اللي بيتولدوا بشكل طبيعي,وغالبا الاطفال بيطلعوا زي الاب والام في توقيت المشي يعني لو الام او الاب اتأخروا شوية في المشي يبقي في احتمال كبير ان الطفل يبقي كده.

 حاجات مهمة للطفل في مرحلة المشي:
-مهم جدا ان الطفل يتعرض لاشعة الشمس المعتدلة علشان جسمه يستفاد من فيتامين(د) الضروري جدا لتقوية عظامه.
-التركيز علي الاكلات الغنية بالكالسيوم زي اللبن والجبنة لتقوية عظام الطفل.

Share.

Comments are closed.