اشترك
Buy Neuth France products

تربية الحيوانات الاليفة في المنزل

0

كتير من الناس بيحبو انهم يربو حيوانات اليفة او طيور عندهم في البيت ومفيش شك ان الحكاية دي مسلية ومفرحة وبتدخل نوع من التفاؤل والبهجة علي جو البيت  بس بيخافو من مسألة انها تكون بتنقل عدوي او بتتسبب في اي مشاكل صحية خصوصا للاطفال الصغيرين لان مناعتهم اضعف واستعدادهم للعدوي اكتر من اي حد. لو عايزين تعرفو فوائد تربية حيوان او طائر اليف في البيت وازاي تعتنو بيه صح وازاي تحمو نفسكم والطفالكم من العدوي تابعو معانا المقالة دي.

  • فوائد تربية حيوان اليف في البيت:
    -بتعطي احساس بالبهجة والتفاؤل وبتكون مسلية خصوصا لكبار السن اللي كتير منهم بيعانو من الوحدة والفراغ.
    -بتخلي  الانسان يتعود انه يحنو علي كائن اخر اصغر واضعف منه ويهتم باحتياجاته وده شئ مهم جدا خصوصا للاطفال الصغيرين لانه
    بيعودهم علي تحمل المسئولية من الطفولة وبيقيهم من الانانية وحب التملك وبيساهم في علاج مرض التوحد غير انه بيشغل الطفل لمدة
    طويلة عن الجلوس قدام التلفزيون وشاشة الكمبيوتر.
    -بيعود الانسان علي الحركة من مكان لاخر وده مفيد جدا لصحة القلب وبيقي من السمنة اللي بيسببها الجلوس لفترة طويلة.
    -تربية حيوان حجمه كبير زي الكلب مثلا في البيت بيساهم في تقوية عضلات صاحبه لانه بيحتاج انه يتحرك حوالي ساعة في اليوم
    بصحبة الشخص اللي مربيه.
  • كيفية العناية بالحيوان الاليف:
    -لابد من الاهتمام بإن الحيوان يتم اعطاؤه التطعيمات الخاصة بيه في الوقت المناسب وده بيكون حوالي شهرين للقطط والكلاب علشان
    نتفادي ان الحيوان يصاب بأي مرض معدي ومن الممكن انه ينتقل لصاحبه .
    -الاهتمام بنظافة  الحيوان باستمرار وخصوصا اسنانه واظافره  ويفضل تغطية اظافره لانها اكبر ناقل للامراض ولاحظ ان الحيوان
    بيحتاج انواع خاصة من المنظفات.
    -الاهتمام بنظافة الاكل اللي بيتم تقديمه للحيوان لانه ممكن يكون ناقل للامراض لو نظافته مش مضمونة.
    -يفضل الحفاظ علي  الحيوان من الاختلاط بالحيوانات الموجودة في الشوارع لان نظافتها مش مضمونة وممكن تنقل امراض لحيوانك
    المنزلي.
    -لاحظ ان الحيوان كائن حي بيشعر زي الانسان بالظبط يعني راعي انك متعرضوش لتيارات هواء متغيرة بسرعة لانه ممكن يصاب
    بنزلات البرد وممكن يعديك.
    -لازم تراقب الحيوان الاليف باستمرار وتاخد بالك من اي اعراض صحية غير طبيعية تظهر عليه زي صعوبة او كثرة التبول او ضعف
    الشهية او الشعور بأي ضعف او شحوب في لونه لان ده ممكن يكون مؤشر لبداية اصابته بأي مرض.
    -لو شعرت ان حيوانك الاليف مصاب بأي مرض بلاش تتسرع وتديله الدواء الخاص بيه غير بعد استشارة الطبيب المختص في نوع
    الدواء والجرعة المناسبة لحالة الحيوان ولاحظ ان الحيوان بيحتاج انواع خاصة من الادوية ويفضل استشارة الطبيب البيطري.
    -اهتم بنظافة المنزل والمكان اللي فيه الحيوان علشان ميكونش ناقل لاي مرض.
  • العناية بالطيور المنزلية:
    -بلاش تحط القفص اللي فيه الطائر في الاماكن الاكتر عرضة لتيارات الهواء لان الطائر في الحالة دي بيكون معرض للاصابة بالامراض ونزلات البرد وممكن يعدي صاحبه.
    -اهتم بنظافة الاكل اللي بيتقدمله
    -اهتم بنظافة القفص اللي فيه الطائر علشان ميصابش بالامراض.
  • العناية بأسماك الزينة:
    -الاحواض الزجاجية افضل من البلاستيكية لانها اقوي.
    -مراعاة ان الحوض يكون في مكان مناسب بعيد عن النوافذ ومصادر نور الشمس لان ارتفاع درجة الحرارة بيؤثر علي السمك.
    -بلاش غسل الحوض بمواد كيميائية لانها بتشكل خطر علي الاسماك ويفضل بعد تغيير المياة انه يتم غسل الحوض بملح بلدي مع ماء
    ساخن لقتل الميكروبات.
    -لازم تهتم بنظافة الاكل اللي بتقدمه ليها
    -بلاش وضع نوع شرس من الاسماك مع نوع هادئ لانها هتلتهمها.
    -الحوض الكبير مفضل عن الحوض الصغير لان في الحوض الكبير عدوي انتقال الامراض بين السمك بتكون اكبر غير انه مش بيتلوث
    بسهولة زي الحوض الصغير.
    -لو لاحظت ان السمكة عندها قشعريرة او اي تغير في لونها ده دليل علي حالة مرضية لازم تهتم بيها وتستشير الطبيب المختص.
    -لازم تعزل اي سمكة مريضة عشان ماتكونش معدية لبقية السمك وتكون معدية ليك وانت بتنظف حوض السمك.
    يفضل اجراء الفحص الدوري علي حيوانك الاليف كل 6 اشهر عشان تطمئن عليه ويفضل مصدر بهجة للبيت.
  • هل القطط تسبب مشاكل صحية للبنات:
    كتير بنسمع الجملة دي وفي الحقيقة هي مش دايما صح. ممكن  القطط تسبب العقم للبنات في حالة اصابة القطة بعدوي التكسوبلازما
    اذا البنت لمست براز القطة في حالة اصابة القطة بالمرض ده. عشان كده اذا كنتو بتحبو تربية القطط متخافوش انها تسبب العقم للبنات
    لان ممكن تفادي المسألة دي اذا البنت تجنبت انها تلمس براز القطة بإيديها اذا كانت القطة مصابة بمرض التكسوبلازما.
  • كيفية الوقاية من انتقال الامراض من الحيوان لصاحبه:
    -اعتني بالنظافة الشخصية ليك ولاطفالك خصوصا غسيل اليدين بعد كل تعامل مع الحيوان.
    -يفضل ابتعاد الاطفال والحوامل عن اماكن براز الحيوان لانها بتنقل الامراض.
    -يجب  في حالة مرض الحيوان ان الطفل و المرأة الحامل يبتعدو عنه تماما لان احتمال انتقال المرض ليهم اكبر
    -خاللي بالك ان طفلك ميلمسش ايده او انفه او فمه بعد التعامل مع الحيوان غير بعد مايغسل ايده.
    – الاهتمام بنظافة اماكن تواجد الحيوان
    -عدم لمس براز الحيوان ابدا باليد ويفضل استعمال قفاز والتخلص منه فورا
    -لو كنت بتعاني انت او احد الاشخاص في البيت من مرض بيسبب نقص المناعة يفضل عدم تربية حيوان في البيت علشان ميكونش
    سبب لنقل العدوي.
  • ازاي تتفادي ان طفلك تحصلله عضة من الكلب؟
    -مش اي كلب تجيبه البيت غير لما تتأكد انه يناسب طبيعة حياة اسرتك
    -ماتخليش طفلك يزعج الكلب وهو نايم
    -راقب طفلك وهو بيتعامل مع الكلب
  • تعمل ايه لو الكلب عض طفلك:

-غسل مكان العضة بماء بارد ووضع مطهر علي العضة
-اذا كانت العضة شديدة ونتج عنها قطع في جلد الطفل لابد انك تاخده علي المستشفي فورا
-بلاش تدي طفلك اي اكل او شرب غير بعد استشارة الطبيب

  • اسأل نفسك واسرتك:

-قبل ماتربي حيوان اليف في البيت لازم تعرف ان دي مسئولية عن كائن حي له احتياجات صحية ونفسية زيك بالظبط وانه مش مجرد وسيلة تسلية للوقت ليك ولاطفالك علشان كده لازم تسأل نفسك واسرتك شوية اسئلة قبل ماتقرر انك تربي حيوان اليف في بيتك زي:
-هل عندك وعند اسرتك الوقت الكافي للاعتناء بيه (لان الحيوان بينزعج لو حس بالاهمال مدة طويلة)
-هل فكرت في ميزانية اكل وشرب الكائن ده ومصاريف علاجه والاهتمام بنظافته
-ياتري عندك في بيتك شخص ضعيف المناعة او حد بيعاني من مشكلة صحية ممكن تزيد لو حصلتله عدوي من الحيوان
-هل عندك المكان المناسب والمساحة الكافية بحيث ان الحيوان مايكونش سبب ضيق ليك وهو كمان ميحسش بضيق

Share.

Comments are closed.