اشترك
Buy Neuth France products

تخسيس منطقة الارداف

0

الدهون الزيادة في منطقة الارداف بتشكل ضيق لاصحابها وبيحسوا اكتر بالمشكلة دي في محلات الملابس وهما بيقيسوا الملابس وبيلاقوها ضيقة عليهم وبيبقوا محتارين جدا في اختيار المقاس المناسب ليهم اللي يداري العيب ده في جسمهم, وبيحسوا بإحراج كبير بين الناس خصوصا قدام شريك الحياة و في المناسبات العامة وفي الزحمة،والسيدات عرضة اكتر للمشكلة دي لكن برضه في رجالة بيشتكوا منها. لو بتعانوا من موضوع الدهون الزيادة في منطقة الارداف ومش عارفين تعملوا ايه خليكم معانا هنساعدكم بشوية نصايح انكم تظبطوا المشكلة دي.

اسباب زيادة الوزن في منطقة الارداف:
-الوراثة من الاب او الام او الاتنين مع بعض يعني لو الاب او الام عندهم دهون زيادة في الارداف ولادهم بيكونوا عرضة ليها اكتر.
-قلة الحركة ودي طبعا بسبب الرفاهية الزيادة واستخدام الاسانسير والسلالم المتحركة والاتكال علي العربية الخاصة في كل المشاوير
وكمان بسبب القعدة وقت طويل قدام التلفزيون وشاشة الكمبيوتر .كل الحاجات دي خلت الناس متهتمش انها تتحرك باستمرار زي الاول
وللاسف من اكتر المناطق اللي بتتأثر بسبب قلة الحركة هي منطقة الارداف.
-الحمل والولادة بشكل متكرر و علي فترات متقاربة بيخلي عضلات الارداف تكون اضعف وتترهل اكتر.
-كتر اكل الوجبات الدسمة خصوصا قبل النوم علي طول .

ازاي تتخلصوا من الدهون الزايدة في منطقة الارداف:
غيروا شوية من عاداتكم بالنصايح دي:
-بلاش تتكلوا علي العربية الخاصة طول الوقت ,ممكن تركنوها وتمشو شوية خصوصا في الهوا النقي.
-قللوا الاعتماد علي الاسانسير والسلالم المتحركة في الاماكن العامة واهتموا انكم تطلعوا السلم علي رجليكم لان ده هيساعدكم.
-اتجنبوا انكم تقعدوا قدام التلفزيون والكمبيوتر مدة طويلة بدون حركة وبلاش تاكلوا قدام التلفزيون لانكم مش هتقدروا تحكموا كمية
الاكل اللي بتاكلوه بسبب انشغالكم بالتلفزيون.
-ابعدوا عن التوتر واهتموا بالنوم ساعات كافية لان قلة النوم بتسبب زيادة في الهرمونات المسئولة عن زيادة الوزن.

اهتموا بممارسة الرياضة:
-ابدأوا بالمشي لمدة ربع ساعة في اليوم وزودوها مع الوقت لنص ساعة.
-ركوب العجل لمدة نص ساعة مفيد جدا لتنشيط عضلات الارداف وبيخلص الجسم من الدهون الزيادة فيهم.
-ركزوا علي تمارين الايروبيكس الخاصة بمنطقة الارداف ومارسوها لمدة 30 دقيقة .
-في تمرين مفيد ليكم جدا وهو انكم تناموا علي ضهركم وترفعوا كل رجل من رجليكم بالتبادل مع التانية وتكرروا الحكاية دي 10 مرات.
التمرين ده مفيد جدا في تنشيط عضلات الارداف.
-مارسوا رياضة الجري او نط الحبل لمدة نص ساعة لانها بتقوي عضلات الارداف وبتساعد في التخلص من الدهون الزيادة فيهم.
-كرروا التمرينات دي 5 مرات في الاسبوع ولما لياقتكم البدنية تبقي اقوي زودوها ل6 مرات وخدوا يوم راحة في الاسبوع علشان
العضلات ترتاح.

ركزوا علي العادات الغذائية الصحية:
-ابعدوا عن عادة شرب المية اثناء الاكل او بعده علي طول
-بلاش اكل قبل ممارسة التمارين الرياضية بأقل من ساعة.
-بلاش تاكلوا قبل النوم بأقل من ساعتين.
-قللوا جدا من النشويات والسكريات والحلويات والمياة الغازية خصوصا في وجبة العشا وقبل النوم.
-ابعدوا تماما عن الوجبات السريعة لانها غنية بالسعرات الحرارية.
-شرب من 8 ل 10 اكواب من المية في اليوم بعيد عن مواعيد الوجبات الاساسية بيساعد في حرق الدهون.
-ركزوا علي اللبن منزوع الدسم.
-اهتموا بالاكلات الغنية بالالياف زي الخضروات والفواكه.
-ركزوا علي الخبز البلدي لانه اقل في السعرات الحرارية.
-اللحوم المشوية مفيدة جدا وبتساعد في الحفاظ علي وزن مناسب وقليلة السعرات الحرارية بعكس المقليات الغنية بالسعرات الحرارية
ويفضل تناول اللحوم منزوعة الجلد .

Share.

Comments are closed.