اشترك
like Sofy on Facebook

طنين الاذن مشكله مش تهيؤات

0

طنين الاذن ده حالة بتسبب مشكلة مزعجة عند بعض الناس ومش بيكونو عارفين سببها ايه ولا ازاي تتحل ويزيد شعورهم بالمشكلة دي لما بيكونو قاعدين لوحدهم خصوصا في الهدوء . تابعو معانا المقالة دي علشان تعرفو ايه هو طنين الاذن وايه هي اسبابه وايه هي اعراضه وازاي بيتم علاجه.

  • ايه هو طنين الاذن:
    طنين الاذن هو عبارة عن حالة  بتكون عبارة عن سماع اصوات بيكون الشعور بيها مقصور علي الشخص اللي عنده الحالة دي وبيشعر بيها علي هيئة سماع اصوات ممكن تكون شبيهة بجرس التليفون او صفارة متواصلة او زن حشرات وممكن الشعور ده يكون مستمر وممكن يكون متقطع لكن حالة سماع الاصوات دي في الاذن بتزيد اكتر في الهدوء او لما بيكون الشخص اللي عنده الموضوع ده لوحده.
  • ايه هي اسباب الشعور بطنين الاذن:
    -التعرض لضوضاء مستمر
    -التقدم في العمر
    -وجود اضطراب في الاذن الداخلية او الوسطي
    -وجود خلل في الدورة الدموية قرب الاذن
    -انسداد الاذن بسبب كثرة افراز الشمع فيها
    -حدوث اصابة في منطقة الراس او الرقبة ممكن يسبب خلل في الاذن
    -بعض الادوية والمضادات الحيوية.
    -كثرة استخدام سماعات الموبايل بالنسبة للشباب ممكن يسبب طنين الاذن
  • ايه هي اعراض طنين الاذن:
    الشعور بضوضاء في الاذن زي سماع صوت صفارة او جرس بشكل مستمر او متقطع.في معظم الوقت الشخص اللي عنده الطنين هو بس اللي بيسمع الاصوات دي لكن في بعض الحالات ممكن الطبيب يسمع الاصوات دي لو وضع سماعة طبية في اذنه.
  • امتي بيكون ضروري انك تلجأ لطبيبك في حالة طنين الاذن:
    -ممكن الشعور بطنين الاذن يكون مؤشر لاصابتك بمرض تاني زي ارتفاع ضغط الدم او مشاكل في الغدة الدرقية.
    -لو كان الطنين مصحوب بالام او جفاف في الاذن ممكن في الحالة دي يكون في مشكلة كبيرة في الاذن.
    -لو كان طنين الاذن مصحوب بالشعور بدوخة ممكن يكون مؤشر للاصابة بمرض منيير.
    في الحالات دي لازم تستشير الطبيب.
  • مضاعفات طنين الاذن:
    -صعوبة في التركيز
    -ضعف في الذاكرة
    -الشعور بالتعب والاجهاد
    -القلق والاكتئاب
    -مشاكل في النوم.
  • علشان تتفادي الشعور بالمضاعفات دي لازم تستشير الطبيب اول ماتحس ان طنين الاذن بيجيلك بشكل مستمر لان كل العلاج ماكان بدري كل ماكان افضل واسهل.
  • علاج طنين الاذن:
    في معظم الحالات مش بيكون في سبب محدد لطنين الاذن لكنه بيكون سبب لمشكلة تانية محتاجة علاج ويفضل قبل بدء العلاج استشارة طبيب اذن وحنجرة.
    -علشان تبدأ في علاج مشكلة طنين الاذن لازم الاول تعرف ايه هو مصدر المشكلة بالنسبة ليك ،علشان كده لازم تصارح طبيبك بكل  الادوية اللي بتتناولها لان بعض الادوية والعقاقير المخدرة ممكن تسبب مشكلة طنين الاذن،لو طبيبك اكتشف ان احد الادوية اللي بتتناولها هي  اللي بتسبب المشكلة دي فلازم تغير الدوا اللي بتتناوله بدوا تاني ميكونش بيسبب نفس المشكلة الصحية.
    -لو طنين الاذن سببه هو وجود شمع بالاذن ممكن طبيبك يقوم بإزالة الشمع ده باستخدام المكحت او الماء الدافئ.
    -التدخل الجراحي ممكن يكون ضروري في حالة وجود ورم او تصلب بالاذن.
    -لو كان عندك مشكلة(متلازمة المفصل الصدغي الفكي) ممكن طبيبك ينصحك باللجوء لطبيب اسنان لان ده بيساعد في حل مشكلة الطنين
  • ازاي تساعد نفسك في علاج طنين الاذن:
    -اهتم بنظافة اذنيك من الشمع كل يومين
    -ابعد عن القلق والتوتر لانه بيسبب  زيادة افراز شمع الاذن وبيزود مشكلة الطنين.
    -ابعد عن اي سبب لارتفاع ضغط الدم زي اكل الموالح او المنبهات او القلق الزائد
    -بلاش استعمال سماعات الموبايل لانها بتزود مشكلة الشعور بالطنين.
    -بلاش تناول اي ادوية او عقاقير غير بعد استشارة الطبيب اللي بيتابع معاك موضوع طنين الاذن.
    -ممارسة الرياضة بانتظام بتساعد في تنظيم الدورة الدموية وبتسهل حل مشكلة طنين الاذن

Share.

Comments are closed.