اشترك
Buy Neuth France products

المضادات الحيوية سلاح ذو حدين

0

المضادات الحيوية من أنواع الأدوية المشهورة جدا و كتير مننا استخدمها سواء بروشتة دكتور أو بإرشاد من الصيدلى خصوصا فى حالات الإصابة بالبرد والإنفلونزا أو إلتهابات الجيوب الأنفية أو الجروح الملوثة وبيكون ليها نتيجة فعالة ، لكن التناول المفرط للمضادات الحيوية ممكن يكون ليه تأثير سلبى على جسمنا

إيه هى المضادات الحيوية ؟

المضادات الحيوية هى نوع من الأدوية بيستخدم فى قتل البكتيريا زى بكتيريا الحلق ، عدوى الأذن ، التهابات المسالك البولية والتهابات الجيوب الأنفية

فى أنواع مختلفة من المضادات الحيوية كل نوع بيشتغل بطريقة مختلفة إلى حد ما وبيكون فعال على أنواع معينة من البكتيريا ، الدكتور هو الشخص إللى بيكون قادر على تحديد نوع المضاد الحيوى المناسب للعدوى

هل المضادات الحيوى بتعالج كل أنواع الالتهابات ؟

المضادات الحيوية هى أدوية قوية وفعالة لكن مش بتشتغل مع كل أنواع الالتهابات ، المضادات الحيوية بتكون غير فعالة فى التعامل مع الأمراض الناتجة عن عدوى فيروسية ، المضاد الحيوى غير فعال فى علاج بعض الأمراض زى :

  • نزلات البرد الطبيعية
  • الأنفلونزا
  • معظم حالات التهابات الشعب الهوائية
  • التهابات الحلق الناتجة عن التهابات غير بكتيرية
  • حالات رشح الأنف
  • معظم حالات إلتهابات الأذن

معظم الحالات دى بتتحسن تدريجيا مع مرور الوقت بدون استخدام المضادات الحيوية ، ممكن تستشير الدكتور بتاعك عن أفضل الطرق إللى تساعدك على التحسن

أنواع المضادات الحيوية :

فى أنواع كتير للمضادات الحيوية ، لكن معظمهم ممكن يتم تصنيفه ل 6 مجموعات رئيسية :

-البنسلين   -السيفالوسبورين  -الأمينوغليكوزيد  -التتراسكلين  -الماكروليدات  -الكينولون

 

إيه هى الطريقة الصحيحة لتناول المضاد الحيوى ؟

المضاد الحيوى ليه أشكال مختلفة :

  • ممكن يكون على شكل أقراص أو كبسولات أو شراب تؤخذ عن طريق الفم
  • موضعى زى الكريمات أو الإسبريهات أو القطرات
  • بالحقن عن طريق إبرة يتم حقنها فى العضلات

من المهم جدا اتباع الإرشادات اللازمة لتناول المضاد الحيوى بطريقة سليمة لتجنب حدوث أى ردات فعل غير مستحبة .

اتبع النصائح المكتوبة فى النشرة الخاصة بالدواء فيما يتعلق بدواعى الإستعمال والجرعة والتحذيرات ، و من الممكن إنك تستشير الصيدلى لو كان عندك أى سؤال إضافى

بعض المضادات الحيوية لازم تاخدها مع كوب من اللبن أو بعد الأكل والبعض ممكن تكتفى فيه بشرب كوب من الماء

تناولك للمضاد الحيوى بطريقة خاطئة ممكن يقلل من امتصاص المضاد الحيوى داخل جسمك أو يقلل من فاعليته

من المهم جدا كمان إنك تعرف إزاى تخزن الدواء بطريقة صحيحة ، معظم المضادات الحيوية الخاصة بالأطفال يفضل يتم تخزينها فى الثلاجة والبعض يفضل تخزينه بدرجة حرارة الغرفة

من المهم جدا كمان إنك تكمل الكورس الخاص بالمضاد الحيوى ومن الخطورة إنك توقف تناول المضاد الحيوى بمجرد شعورك بالتحسن ، فى حالة عدم استكمال الكورس الخاص بالمضاد الحيوى هيتم القضاء على البكتيريا بصورة جزئية و ليس نهائية وبالتالى تصبح البكتيريا أكثر مقاومة للمضاد الحيوى مما يؤدى إلى احتمالية إصابتك بالمرض مرة تانية لكن بصورة أشد

الأعراض الجانبية للمضادات الحيوية :

من الممكن للمضاد الحيوى إنه يسبب بعض الأعراض الجانبية ومن أكثر الأعراض الجانبية شيوعا الأسهال وحدوث اضطراب خفيف فى المعدة

ويوجد بعض الأعراض الجانبية غير الشائعة و إللى لازم تطلب مساعدة طبية عند حدوثها زى :

  • القئ
  • الإسهال والمغص الشديد
  • رد فعل تحسسى (ضيق فى التنفس – طفح جلدى – تورم فى الشفايف أو الوجه أو اللسان – الإغماء )
  • حكة مهبلية
  • بقع بيضاء على اللسان

فى حالة وجود حساسية سابقة من أحد المضادات الحيوية لازم تقوم بإخبار الطبيب أو الصيدلي ، ويجب عمل فحص للحساسية، من هذا المضاد قبل تعاطيه، يجب عدم إعطاء المضاد الحيوي لأي شخص تانى غير المريض، و دة لأن الدواء بيكون فعال ضد بكتيريا معينة وفي حالة خاصة، وممكن يكون غير مناسب لحالة مريض آخر

Share.

Comments are closed.