اشترك
like Sofy on Facebook

الضعف الجنسي عند السيدات

0

بعض السيدات بيشتكو من مسألة الضعف او العجز الجنسي وبتعمللهم مشكلة كبيرة في حياتهم الزوجية وفي كتير من الاحيان بتكون سبب في الانفصال بين الزوجين,لو عايزين تعرفو ايه هو الضعف الجنسي عند السيدات وايه هي اسبابه وافضل طرق علاجه تابعو معانا المقالة دي.

ايه هو الضعف الجنسي:
هو عبارة عن مشكلة بتحصل في اي مرحلة من مراحل دورة الاستجابة الجنسية خلال العلاقة الخاصة وممكن تحرم احد الطرفين او بتحرم الطرفين مع بعض من الشعور بالسعادة او الاشباع من خلال العلاقة الخاصة ,ودورة الاستجابة الجنسية دي بتتقسم ل 4 مراحل:
الاثارة,الهضبة,النشوة والقرار,ومن المعروف ان نسبة السيدات اللي بيشتكو من الضعف الجنسي اكبر من نسبة الرجالة اللي بيشتكو منه,وده موضوع ناس كتير ممكن تتردد او تخجل من انها تتكلم فيه,بس لحسن الحظ في حالات كتيرة من العجز الجنسي بتكون قابلة للعلاج علشان كده يفضل انك تشارك الطرف الاخر وطبيبك المعالج في اي حاجة تشعر بيها.

ايه هي اسباب العجز الجنسي:
بعض اسباب العجز الجنسي ممكن تكون جسدية(صحية) وبعضها ممكن تكون نفسية
كتير من المشاكل الصحية بتأثر علي القدرة الجنسية وبتؤدي للعجز الجنسي ، من المشاكل دي مرض السكر وامراض القلب والامراض العصبية والنفسية او وجود بعض الاختلال في الهرمونات او انقطاع الدورة الشهرية عند المرأة وبعض الامراض المزمنة وامراض الكليتين والفشل الكلوي وادمان الكحوليات وتعاطي المخدرات,الي جانب بعض الادوية ومضادات الاكتئاب اللي ممكن تسبب العجز الجنسي.
ومن الاسباب النفسية اللي ممكن تسبب العجز الجنسي ضغوطات العمل والاكتئاب والقلق او وجود مشكلة في العلاقة بين الطرفين او المرور بصدمة جنسية سابقة زي التعرض لعنف او اعتداء جنسي.

مين هم الاشخاص المعرضين للعجز الجنسي:
الرجال والسيدات معرضين للعجز الجنسي,المشاكل الجنسية بتحصل للاشخاص البالغين في اي عمر وفي اي سن,لكن الاشخاص المتقدمين في العمر بيكونو اكتر عرضة للمشاكل الجنسية بسبب الظروف الصحية المصاحبة لكبر السن.

ايه هي اسباب العجز الجنسي عند المرأة:
من اكتر المشاكل الجنسية اللي بتواجه المرأة هي ضعف الرغبة الجنسية او عدم الاستمتاع بممارسة العلاقة مع الطرف الاخر, ومن اسباب ضعف الرغبة الجنسية اختلال الهرمونات وبعض الادوية والعقاقير الطبية زي علاج السرطان والعلاجات الكيميائية والاكتئاب والضغط العصبي والحمل والشعور بالاجهاد غير الملل من الروتين في العلاقة الجنسية اللي بيضعف الشعور بالرغبة الجنسية غير الضغوطات التانية زي العمل والاهتمام بالابناء في البيت.
ومن الامور اللي بتسبب للمرأة عدم الشعور بالاثارة خلال العلاقة جفاف المهبل بالاضافة للشعور بالقلق او عدم وجود تحفيز كفاية ,بالاضافة لكده بعض الباحثين بيشوفو ان وجود خلل في الدورة الدموية ممكن يؤثر علي اثارة المهبل والاعضاء المحيطة بيه واهمها البظر.
ومن الامور اللي بتخلي المرأة ماتشعرش بذروة الاثارة الجنسية اللي بتسمي(رعشة الجماع)هي الكبت الجنسي وعدم الخبرة او عدم المعرفة وبعض العوامل النفسية زي التعرض لانتهاك او عنف جنسي قبل كده.
ممكن الشعور بألم خلال العلاقة يكون من اسباب الضعف الجنسي ومن اسباب الشعور بالالم :وجود التهابات في المهبل او مشاكل في منطقة الحوض او بطانة الرحم او وجود مرض اتنقل ليها من خلال العلاقة الجنسية , او وجود حالة من التشنج في العضلات المحيطة بالمهبل ودي بتؤدي للشعور بالم عند ادخال اي حاجة في المهبل وبتسبب للمرأة اللي بتشتكي منها حالة من الخوف من العلاقة الجنسية.

ازاي بيتم تشخيص حالة المرأة اللي بتعاني من الضعف الجنسي:
اول خطوة في التشخيص هي ان الطبيب بيعمل فحص طبي علشان يبدأ يشوف الاعراض،ممكن الطبيب يجري اختبار لمنطقة الحوض علشان يقيم صحة الاعضاء التناسلية وكشف علي عنق الرحم لتقييم اي تغيرات في الخلايا او اي بداية لورم سرطاني,وممكن الطبيب يطلب اي تحاليل للكشف عن اي امراض او مشاكل صحية ممكن تكون ليها علاقة بالضعف الجنسي.
لازم المرأة اللي بتعاني من الضعف الجنسي تصارح الطبيب اللي بيتابع معاها بأي عقاقير طبية بتاخدها او اذا كانت مدمنة للكحوليات او اي اسباب نفسية زي وجود نفور بينها وبين الطرف الاخر او الخوف من العلاقة او اي انتهاك جنسي اتعرضتله قبل كده لان معرفة الطبيب بالامور دي بتساعد في العلاج المناسب.

كيفية علاج الضعف الجنسي عند المرأة:
علاج الضعف الجنسي بيبدأ بعلاج السبب اللي ادي للضعف الجنسي سواء كان السبب ده نفسي او جسدي,ومن الحاجات اللي ممكن تساعد المرأة في العلاج هي المعرفة من مصدر محترم و موثوق منه عن كيفية التصرف والاستجابة اثناء العلاقة لان ده بيساعدها في التغلب علي القلق خلال ممارسة العلاقة,وبرضه من الحاجات اللي بتساعد المرأة في التغلب علي الملل والبرود الجنسي والشعور بروتين اثناء العلاقة هي محاولة تجربة اشياء جديدة خلال العلاقة وممكن ده يحصل بالمشورة مع الطرف الاخر,بالنسبة لحالة المرأة اللي بتشعر بالالم خلال ممارسة العلاقة فممكن انها تعمل شوية تمرينات لتقوية عضلات الحوض وممكن تاخد دوش مية دافئ قبل ممارسة العلاقة لان ده بيساعدها علي ارتخاء عضلاتها وبيخفف من الشعور بالتقلصات والالام,غير ان التغلب علي القلق والاكتئاب بيساعد علي علاج الضعف الجنسي.

ازاي الهرمونات بتتحكم في موضوع الضعف الجنسي عند المرأة:
مع التقدم في العمر عند المرأة بيقل افراز هرمون الاستروجين المسئول عن تنظيم مواعيد الدورة الشهرية,وقلة افراز الهرمون ده بتسبب جفاف المهبل والعوامل دي بتضعف الرغبة الجنسية عند المرأة .
هل استئصال الرحم له دور في اضعاف الرغبة الجنسية عند المرأة:
المرأة اللي بتخضع لجراحة استئصال الرحم بتحس بعد كده بضعف في الرغبة في ممارسة العلاقة غير ان الخلايا الدموية والعصبية المسئولة عن العلاقة الجنسية بتكون انتهت.
امتي المفروض تستشيري طبيبك لما تحسي بالضعف الجنسي:
لما بتكون المسألة دي متكررة اكيد بتعمل مشاكل في العلاقة بين الزوجين ,علشان كده المفروض لما تحسي ان الحالة دي بتجيلك كتير تستشيري طبيبك في العلاج المناسب.

Share.

Comments are closed.