اشترك
Buy Neuth France products

السرطان مش نهاية الحياة

0

مرض السرطان هو مرض من أمراض العصر ، كل الناس بتخاف منه جدا بسبب خطورته و الألام النفسية و الجسدية إللى بيسببها المرض للمريض ، بمجرد سماع المريض لخبر إصابته بالمرض الحياة بتبقى سوداء فى عينيه وكل أحلامه و حياته بتتحطم قدامه ، عايزين نطمنك إن دايما فى أمل فى قدرة الله و فى تقدم العلم و فى قدرة النفس القوية على التغلب على المرض و مواصلة الحياة بشكل طبيعى

فى المقالة دى هنعرفك إزاى تتعامل مع المرض و إزاى تقدر تساعد نفسك عشان تعدى المرحلة دى وانت سليم و معافى بإذن الله

  • خد وقت عشان تستوعب الأمر :

من الطبيعى جدا فى البداية إنك تشعر بصدمة وعدم استيعاب و غضب من الحادث دة ، لكن متخليش الصدمة تسيطر على تفكيرك ، لانك محتاج تكون قوى فى الوقت دة أكتر من أى وقت تانى فى حياتك

  • دور على حافز يديلك دافع للحياة :

دور على أهم أهداف أو أشخاص فى حياتك و قرر إنك عايز تتعالج وتخف علشانهم وانك مش هتفقد الأمل ومش هتستسلم للمرض ، ممكن يكون الهدف هو مساعدة ناس و رعايتهم أو تنمية للمجتمع إللى حواليك و ممكن يكونوا أشخاص مهمين فى حياتك زى أولادك أو والدك ووالدتك أو شريك حياتك

  • اعرف عن مرضك و طرق علاجه :

اهتم انك تعرف من الدكتور الخاص بيك المرض فى أى مرحلة فى جسمك و خطة العلاج إللى هتمشى عليها و ممكن تزود وعيك من خلال المواقع الطبية الموثوق منها على الانترنت ، وعيك بالمرض هيزود من شعورك بالسيطرة عليه و يخليك تقدر تجهز نفسك للتغيرات المصاحبة للمرض و للعلاج ، لكن فى نفس الوقت متاخدش وقت طويل فى القراءة عن المرض عشان متشعرش بخوف و قلق أكتر من اللازم

  • عبر عن مشاعرك :

بعض الناس بيكونوا شايفين إن التعبير عن صدمتهم أو قلقهم طريقة كويسة للتخفيف عن الألم  إللى بيشعروا بيه، لكن فى ناس تانية بتشوف الأمر دة على إنه نوع من الضعف ، لكن فى الحقيقة العكس هو الصحيح ، فالتعبير عن المشاعر هو أمر يحتاج لقوة أكبر من إخفائها ، بالإضافة لأن التعبير عن المشاعر يعتبر جزء من العلاج النفسى إللى انت محتاجه فى المرحلة دى ،ممكن تتكلم مع شخص بتحبه و بتثق فيه من عيلتك أو أصدقائك ،و فى طرق تانية كتير تعبر بيها عن مشاعرك زى الرسم و الغناء أو كتابة المذكرات

  • استمتع بحياتك :

اعمل شئ بتستمتع بالقيام بيه كل يوم ، حضر وجبة لذيذة أو اقضى وقت مع شخص بتحبه ، اتفرج على فيلم ، اقضى وقت فى التأمل أو اعمل أى شئ تانى بتستمتع بيه و يخلي معنوياتك مرتفعة

  • العب رياضة :

العب تمارين رياضية خفيفة بعد أخذ رأى طبيبك المعالج زى تمارين اليوجا أو تمارين التمدد أو التمشية

  • تواصل مع الأخرين :

من الصعب عليك إنك تتعامل مع مرض السرطان لوحدك ، انت محتاج لدعم من الأشخاص إللى حواليك و بيحبوك ، قرب من عيلتك و أصدقائك و مؤسسات الدعم لمرضى السرطان عشان متسيبش المرض ينتصر عليك

  • خليك إيجابى و متفائل :

حفاظك على إيمانك بالله و تفاؤلك ممكن يزود قدرة جسمك على التغلب على المرض ، بالتأكيد دة مش معناه إن أصحاب المعنويات المرتفعة بالضرورة يخفوا من المرض لأن السرطان مرض معقد و مش إحنا إللى بإيدينا قرار المرض أو الشفاء ، لكن على الأقل إيجابيتك هتساعدك على إنك تستفيد من الخبرة الصعبة إللى بتمر بيها و هتحافظ على حياتك من الاكتئاب إللى ممكن يحصل بسبب تغيرات فى بعض المواد الكيميائية بالمخ بسبب الإصابة بالسرطان

Share.

Comments are closed.