اشترك
like Sofy on Facebook

الحمل خارج الرحم..اسبابه وعلاجه

0

ساعات بنسمع عن موضوع الحمل خارج الرحم بس في ناس  مش بيكونو عارفين ده بيحصل ازاي وليه ولا ايه طرق  اكتشافه ولا ازاي بيتم علاجه وازاي ممكن يتم تجنبه في حالة حدوث حمل مرة تانية.تابعو معانا المقالة دي لو عايزين تعرفو اسباب الحمل خارج الرحم وازاي بيتم اكتشافه وايه هي اعراضه وايه طرق علاجه وازاي المرأة اللي حصل معاها كده في اول حمل تتجنب ان ده يتكرر معاها تاني.
ايه هو الحمل خارج الرحم:
في حالات الحمل الطبيعي المبيض بيفرز بويضة بتتجه لقناة فالوب. لو تم تخصيب البويضة دي بحيوان منوي المفروض في الوضع الطبيعي ان البويضة المخصبة تتجه ناحية الرحم وتنمو جواه لمدة 9 اشهر اللي هي 9 اشهر الحمل
طب ايه اللي بيحصل في حالة الحمل خارج الرحم:
ده بيحصل بنسبة حوالي 2% من حالات الحمل ان البويضة المخصبة بتفضل في قناة فالوب ومش بتتجه للرحم وده اسمه(الحمل خارج الرحم)في حالات نادرة جدا من الحمل خارج الرحم  البويضة بتستقر في احد المبيضين او في عنق الرحم او في منطقة اخري من البطن وده بيعرض حياتك للخطر ولازم بتحتاجي لرعاية طارئة.

غالبا الحمل خارج الرحم بيحصل في الاسابيع الاولي من الحمل والطبيب بيكتشفه بعد حوالي 6 او 8 اسابيع من بداية الحمل. وطبعا في  النوع ده من الحمل بيكون من الصعب والنادر جدا ان الطفل يتولد وبيكون في احتمال كبير جدا ان الطفل يموت. لكن حدوث حمل خارج الرحم ميعنيش ان حملك التاني برضه لازم يكون خارج الرحم .

ايه هي اعراض حدوث الحمل خارج الرحم:
-نزيف مهبلي خفيف.
-الشعور برغبة في القئ مع حدوث غثيان والام شديدة.
-الام اسفل البطن
-حدوث تشنج في منطقة البطن.
-حدوث اغماء مع الشعور بضعف شديد.
-الم في منطقة الكتف او الرقبة.
لو حسيتي بأي حاجة من الاعراض اللي فوق دي لازم تشوفي مستشفي كويسة وتدخلي اوضة الطوارئ وكل ماكان بدري بيكون افضل ليكي لتقليل خطر النزيف وللحفاظ علي قدرتك علي الانجاب.
ايه هي اسباب حدوث الحمل خارج الرحم:
-حدوث تلف او تشوه او وجود عيب خلقي منذ الولادة في قناة فالوب بيخلي البويضة المخصبة متنتقلش من قناة فالوب ناحية الرحم
علشان تنمو جواه بشكل طبيعي.
-بعض موانع الحمل زي اللولب بتزود من مخاطر بقاء البويضة المخصبة داخل قناة فالوب وانها متتجهش ناحية الرحم.
-حدوث التهاب في منطقة الحوض وده غالبا بيكون بسبب عدوي بتتنقل من خلال العلاقة الجنسية ,العدوي دي اسمها
Chlamydia
-بعض منشطات الحمل بتزود من خطر الحمل خارج الرحم
-انك تكوني ولدتي قبل كده بعملية قيصرية او اجريتي عملية في منطقة البطن.
-انه يكون حصللك قبل كده حمل خارج الرحم ده برضه بيزود من احتمال حدوث حمل تاني خارج الرحم.
-انك تكوني بتدخني او بتتعرضي للتدخين السلبي ده بيزود من خطر الحمل خارج الرحم.

ازاي تكتشفي ان حملك خارج الرحم:
بمجرد وصولك المستشفي بيتم اجراء اختبار الحمل واختبار الحوض واختبار للاطمئنان علي صحة الرحم وقناة فالوب.
لو تم التأكد من ان حملك خارج الرحم فعلا بيتم عمل الاجراءات اللازمة علي حسب حالتك الصحية وخططك المستقبلية بخصوص الانجاب.

ازاي بيتم التعامل مع الحمل خارج الرحم:
لو الدكتور اتأكد ان قناة فالوب حصل فيها تلف فلازم يتم اجراء جراحة عاجلة لايقاف النزيف وفي بعض الحالات المبيض وقناة فالوب لما بيحصل فيهم تلف ممكن يتم ازالتهم.
لو قناة فالوب سليمة والحمل لسة في بدايته كل اللي بيتعمل هو اجراء جراحة بالمنظار لازالة الجنين,المنظار ده عبارة عن الة رفيعة ومرنة بيوصل لتجويف البطن من خلال شقوق صغيرة,وبيتم ازالة الجنين مع الحفاظ علي قناة فالوب بدون ضرر.
بعد انتهاء العملية دي بتتعمللك تحاليل دم للتأكد ان الحمل تم ازالته,التحليل ده بيفحص الهرمون اللي تم افرازه اثناء الحمل.

تكرار الحمل بعد الحمل خارج الرحم:
كتير من النساء اللي بيحصللهم حمل خارج الرحم بيكون في امل كبير ليهم في المستقبل ان يبقي حملهم اللي بعده طبيعي ( داخل الرحم)
حتي لو حصل تلف في قناة من قناتي فالوب طالما ان القناة التانية سليمة.لو كان حدوث الحمل الاول خارج الرحم بسبب مرض اتنقل ليكي من خلال العلاقة الجنسية فممكن جدا بعد علاج المرض ده يحصل حمل طبيعي. المشكلة مش في العدوي نفسها لكن في الاثار اللي سببتها العدوي. علاج العدوي مش بيعالج التلف تماما.

استشيري طبيبك بخصوص المدة اللي المفروض تنتظريها لحد ماتفكري في حمل تاني والمدة دي في الغالب بتكون من 3 اشهر ل 6 اشهر والمفروض انك في الاول تستعيدي صحتك النفسية والبدنية قبل ماتفكري في حمل تاني واستشيري طبيبك اذا كان ممكن انك تجري عملية اطفال انابيب لو عايزة تحملي تاني واتصرفي علي حسب نصيحة الدكتور ليكي .

بلاش تلومي نفسك علي الحمل الاول لانك مالكيش ذنب وخدي فترة ارتاحي فيها واستعيدي صحتك من الناحية المعنوية والجسدية .

Share.

Comments are closed.