اشترك
Buy Neuth France products

الحمل بعد ال35

0

مفيش شك ان اي ست في الدنيا لما بتعرف انها حامل الموضوع ده بيكون سبب فرحة كبيرة ليها ولكل اللي حواليها لان دي امنية غالية عند كل واحدة,لكن لما بيحصل حمل لواحدة عندها 35 سنة استقبالها للخبر بيكون مختلف شوية لانها علي قد مابتكون فرحانة الا ان الفرح ده بيكون مصحوب بقلق علي صحتها وعلي صحة الجنين وكمان القلق بسبب صعوبة الولادة والخوف من اي مشاكل صحية تحصللها هي او الطفل.خليكي معانا علشان تعرفي ازاي تتابعي حملك صح بعد ال35 وازاي تحافظي علي نفسك وعلي طفلك وتولدي بالسلامة ولو تعرفي واحدة حامل وعندها 35 سنة برضه تابعي معانا عشان تنصحيها لصحتها وصحة الطفل.

الحقيقة انه مش كل سيدة عمرها 35 سنة وحامل بتكون معرضة بشكل كبير لمشاكل صحية صعبة بالنسبة ليها وبالنسبة للجنين طالما ان حالتها الصحية كويسة ومش بتعاني من اي امراض ووزنها مناسب وبتهتم بالتغذية السليمة لكن بيزيد احتمال الاصابة ببعض المشاكل زي:
-ارتفاع ضغط الدم.
-سكر الحمل.
-تسمم الحمل.
-الاجهاض.

لو عايزة تحافظي علي صحتك وصحة طفلك وانتي حامل بعد ال35 اعملي الحاجات دي:
اهتمي بالرعاية المبكرة والمنتظمة قبل الولادة:

اول 8 اسابيع من حملك مهمين جدا لنمو طفلك،الرعاية المبكرة بتزود الامل في ولادة امنة وطفل سليم. رعاية قبل الولادة بتشمل الاختبارات المنتظمة والاستشارة والدعم.اهتمامك بالفحوصات والاستشارات في وقت مبكر و باستمرار بيساعد الدكتور اللي بيتابع معاكي انه يتعرف علي مستوي السكر والضغط والجلوكوز عندك،بالشكل ده اي مشكلة صحية بتكون قابلة للعلاج بسهولة وبشكل صحي ليكي ولطفلك.
اهتمي بعمل الفحوصات خلال فترة الحمل:
ممكن الدكتور يطلب منك شوية فحوصات وتحاليل علشان تطمني علي صحة الجنين وتعرفي اذا كان في خطر من ولادة طفل عنده مشاكل صحية وتشوفي ايه الانسب ليكي.
ركزي علي تناول الفيتامينات اثناء الحمل:
اهتمي بتناول الاكلات الغنية بحمض الفوليك زي البقوليات والسبانخ والقرنبيط والبروكلي وزيت الافوكادو والبنجر والبرتقال,تناول الاكلات الغنية بحمض الفوليك خصوصا خلال اول 3 شهور من الحمل بيقلل جدا من مخاطر ولادة طفل بعيوب خلقية. جسمك اثناء الحمل بيحتاج في اليوم  من 800-1000 ميكروجرام من حمض الفوليك اللي بيكون موجود كمان في الفيتامينات الخاصة بفترة الحمل,لكن يفضل عدم تناول اكتر من 1000 ميكروجرام منه في اليوم.

ازاي تحافظي علي نفسك من اي مشاكل خلال فترة الحمل:
-اتبعي نصايح الدكتور اللي بيتابع معاكي:
لو كنتي بتعاني من ارتفاع ضغط الدم او السكر يبقي لازم تتبعي نصايح الدكتور اللي بيتابع معاكي بانتظام.وكمان لازم تهتمي بنضافة وصحة اسنانك ولثتك لان ده بيقلل جدا من احتمالات ولادة الطفل قبل معاده او ولادة طفل وزنه اقل من الطبيعي.

-اتبعي نظام غذائي صحي ومتوازن:
اهتمي ان اكلك يكون متنوع علشان تحصلي علي كل اللي جسمك محتاجه,ركزي جدا علي الخضار والفاكهة والمكسرات والبقوليات واللحوم ومنتجات الالبان قليلة الدسم.اهتمي جدا بتناول الكالسيوم الموجود في منتجات الالبان لان ده بيحافظ جدا علي صحة اسنانك وعضمك خلال فترة الحمل,بالاضافة للخضروات الورقية.

-حافظي علي وزن مناسب اثناء الحمل:
اتكلمي مع طبيبك عن الوزن اللي المفروض انك تزيديه خلال فترة الحمل وده بيختلف علي حسب طبيعة وزنك قبل الحمل وسواء اذا كنتي نحيفة او عادية او بتعاني من سمنة.تنظيم الموضوع ده مع طبيبك بشكل صح بيقلل من احتمالات ولادة طفل وزنه قليل او عنده مشاكل في النمو.

-اهتمي بممارسة التمارين الرياضية اثناء الحمل:
ممارسة التمارين الرياضية بتساعدك في تنظيم وزنك اثناء الحمل غير انها بتقلل من احساسك بالاجهاد والتوتر اثناء الحمل. خدي رأي الدكتور اللي بيتابع معاكي بخصوص نوعية التمارين اللي المفروض تعمليها.

 -ابعدي عن التدخين والكحوليات:
التدخين بيعرض كل الحوامل للخطر لكن مفيش شك ان الحوامل فوق ال35 بيكونو معرضين اكتر للخطر بسبب التدخين بأنواعه سلبي وايجابي وبسبب شرب الكحوليات, علشان كده لازم تبعدي عن التدخين والكحوليات تماما.

-متاخديش اي ادوية قبل ماتاخدي رأي الدكتور اللي بيتابع معاكي:
 اسألي الدكتور قبل ماتاخدي اي دوا سواء اثناء الحمل او خلال فترة الرضاعة سواء كان الدوا ده مصروف بروشتة او لا وحتي لو كان مكمل غذائي  برضه لازم تسألي الدكتور اللي بيتابع معاكي.

Share.

Comments are closed.