اشترك
like Sofy on Facebook

الحفاظ علي النظافة في الاماكن العامة

0

كتير من الناس بيقضوا وقت طويل جدا من يومهم برة البيت في الشغل او في الاماكن العامة او علشان يشتروا احتياجاتهم الضرورية واكيد بيمسكوا بإيديهم حاجات كتيرة بتكون عرضة ان ناس كتير يمسكوها وطبعا بيحتاجوا انهم يدخلوا الحمامات العامة وناس كتير بسبب الخوف من العدوي ممكن مايدخلوش الحمامات العامة وللاسف عدم دخول الحمام لقضاء الحاجة بسرعة بيعرض لامراض كتيرة ,واحنا هنعرفكم شوية عادات صحية وحاجات تعملوها علشان تحافظوا علي نضافتكم وتتجنبوا انواع العدوي المختلفة في الاماكن العامة.

العدوي بأنواعها بتنتشر في اماكن عامة كتيرة خصوصا الاسطح اللي ناس كتيرة بتلمسها بالايد زي اكر الابواب وعربيات التسوق في السوبر ماركت وقواعد الحمامات العامة وزراير الاسانسير في الاماكن العامة وترابيزات المطاعم, كل دي حاجات بتكون معرضة ان اشخاص كتير يلمسوها بإيديهم علشان كده بتكون مصدر لانتقال انواع كتيرة من العدوي والجراثيم خصوصا  عند الاشخاص اللي مش بيهتموا بنضافة ايديهم باستمرار  .

نصائح للحفاظ علي النضافة وتجنب العدوي في الاماكن العامة:
-غسيل الايدين كويس جدا قبل الخروج من البيت وبعد الرجوع فورا وقبل الاكل وبعده مباشرة ويفضل استعمال انواع الصابون القاتلة للجراثيم والميكروبات وتجفيف الايدين كويس ويفضل عدم استعمال الفوطة الموجودة  في الحمام العام واستعمال المنديل الخاص بيك والتخلص منه فورا بعد استعماله.
-يفضل استعمال القفاز(الجوانتي) او مطهر الايدين قبل لمس عربيات التسوق في السوبر ماركت والاهتمام بغسل القفاز كويس بعد كل مرة تستعمله فيها وممكن لفت نظر صاحب المحل انه يهتم بنضافة العربيات لان عدم الاهتمام بنضافتها بيعتبر ناقل للعدوي.
-قبل القعدة علي قاعدة الحمامات العامة يفضل استعمال المناديل المعطرة او الجيل المنظف لتنظيف القاعدة او انك تحط مناديل علي القاعدة واكيد  ده افضل من الجلوس علي قاعدة مش نضيفة وتكون فرصة لانتقال الامراض وافضل طبعا من التأخر في قضاء الحاجة اللي برضه له اضراره.
-لو دخلت الحمام في اي مكان عام ولاحظت وجود ريحة غير مرغوب فيها لازم تلفت المسئول عن المكان لان الروايح الكريهة هي اكبر جاذب للجراثيم والبكتريا اللي بتنقل العدوي.
-قبل الجلوس علي الترابيزة في المطعم او النادي يفضل لفت نظر النادل(الجرسون)للاهتمام بنضافة الترابيزة لتجنب انتقال العدوي من خلال لمسها وكمان لنظافة الكوبايات اللي موجودة علي الترابيزة لانها ممكن تنقل امراض بسبب الاهمال في غسيلها
-يفضل الاهتمام بمستوي نضافة المطعم اللي بتدخله والتركيز علي مستوي نضافة المكان والعاملين فيه وحمامات المكان وكل الاسطح فيه.
-ركز علي مستوي نضافة الاماكن العامة اللي بتدخلها ولو لاحظت تراكم للاتربة او القمامة لازم تلفت نظر العاملين او صاحب المكان للموضوع ده لان تراكم القمامة والاتربة من اكتر الحاجات اللي بتشد الحشرات اللي هي اكبر ناقل للعدوي والامراض الجلدية.
– الاهتمام بنضافة الملابس وعدم لبس اي حاجة مرة تانية غير بعد غسلها كويس جدا.
-يفضل عدم لمس العين او الانف او الفم بالايد لان لمسهم هو من اكتر الحاجات اللي بتنقل العدوي للجسم كله.
-الاهتمام باستخدام منديل بعد الكحة او العطس والتخلص منه فورا وغسل الايدين كويس جدا لتجنب انتقال العدوي.
-لاحظ ان احتمال انتقال العدوي ليك بسبب الاختلاط في الاماكن العامة ممكن يقل كتير لو اهتميت بتقوية جهازك المناعي من خلال ممارسة الرياضة بانتظام والنوم لعدد ساعات كافي والاهتمام بالاكلات الصحية خصوصا الخضروات والفواكه الغنية بالالياف وشرب السوايل باستمرار.

Share.

Comments are closed.