اشترك
Buy Neuth France products

الآم الركبة..اسبابها وعلاجها

0

الركبة دي من اهم المفاصل في الجسم لانها بتتحمل ضغط الجسم كله وللاسف بتكون معرضة للالام والاصابات لاسباب مختلفة ,وفي كتير من الاوقات الشخص اللي بيعاني من الم في الركبة بيحس بصعوبة شديدة في تحريكها او في الانحناء لقدام.تابعونا عشان تعرفو ايه هي اهم مشاكل الركبة وايه اسبابها وايه طرق علاجها والوقاية منها.
اسباب الام الركبة:
-ضعف عضلات الفخذ بيسبب ضغط شديد علي الركبة في التحرك وده بيسبب الم الركبة.
-الاصابة في اربطة الركبة زي الرباط الصليبي والرياضيين بيكونوا عرضة ليه اكتر.
-الاصابة في اي وتر من الاوتار المحيطة بالركبة.
-اصابة في الغضاريف والعظام المكونة للركبة.
-التهاب مفصل الركبة وممكن يكون بسبب خشونة المفاصل او التهاب المفاصل الروماتويدي.
-بعض الامراض المناعية اللي بتأثر علي مفصل الركبة.
-اصابات الرياضيين والكدمات والتعرض لحوادث العربيات.
-التقدم في العمر بيسبب ضعف في مفصل الركبة.
-الزيادة في الوزن خصوصا عند السيدات بتشكل ضغط شديد علي مفصل الركبة.

اعراض الام الركبة:
-صعوبة في تحريك وتني الركبة.
-الم مستمر حتي وقت الراحة.
-صوت غير طبيعي اثناء تحريك الركبة.
-تورم واحمرار في الركبة.
-السقوط اثناء الوقوف.

علاج الام الركبة:
في حاجات ممكن تساعد في التخفيف من الام الركبة زي:
-محاولة الحفاظ علي وزن مناسب بالاكل الصحي والتمارين المناسبة لان الوزن الزايد بيضغط علي الركبة.
-ممارسة التمارين اللي مش بتشكل اجهاد لمنطقة الركبة.
-تجنب تني الركبة لفترة طويلة ويفضل فرد الركبة قدر الامكان لان ده بيريحها.
-يفضل تجنب الاحذية الضيقة واستبدالها بالمريحة لان الضيقة بتضغط علي مشط الرجل ومفصل الكاحل وبالتالي ممكن تجهد الركبة.
-عدم الضغط علي الركبة بتمارين تجهدها زي الجري والنط ومن الافضل عدم لبس الكعب العالي وتجنب الوقوف فترة طويلة.
-وضع قطع من التلج علي منطقة الركبة لمدة نص ساعة وبعدين اخد فترة من الراحة وبعدين تكرار وضع التلج بيساعد في التخفيف من   الالتهاب والتورم .
-يفضل ممارسة تمارين الركبة والفخذين تحت اشراف اخصائي العلاج الطبيعي علي حسب الحالة.
-من الافضل استخدام المسكن المناسب للحالة بعد استشارة الطبيب المختص.
بعض الوصفات الطبيعية لتخفيف الام الركبة:
-خلط كمية صغيرة من الحلبة مع شوية مية قليلين ووضعهم علي الركبة لمدة ساعتين وبعدين غسل الركبة بمية دافية.
-تدليك الركبة بقليل من زيت جوز الهند الدافئ بيساعد في تنشيط الدورة الدموية للركبة وتخفيف الالم.
-شرب كوباية لبن مع معلقة من زيت الكركم بيخفف الم الركبة.

امتي بيكون اللجوء للدكتور ضرورة في حالة الم الركبة:
في حالة مرور حوالي شهر او 6 اسابيع بدون تحسن او لو حصلت زيادة في الالم او تورم بيكون من الضروري استشارة الطبيب المختص.

ايه اللي الدكتور المفروض يعمله في الحالة دي:

الدكتور بيعمل فحص للركبة والمفاصل المحيطة بيها وممكن يطلب عمل اشعة علي الركبة,وفي بعض الاوقات بيتم عمل شفط للسوائل من الركبة عن طريق الحقن ,وممكن الدكتور الجراح يستخدم المنظار للعمل علي الركبة,وفي اخطر الحالات ممكن يتم استبدال مكون من مكونات مفصل الركبة وممكن يتم استبدال مفصل الركبة كليا.

Share.

Comments are closed.