اشترك
like Sofy on Facebook

اكتئاب مابعد الولادة عند الرجال

0

كل زوج وكل زوجة بيحلموا باليوم اللي هيجيبوا فيه طفل للدنيا وبيستنوا الحكاية دي بفارغ الصبر,لكن عند بعض الرجالة الموضوع بيكون مختلف شوية واستقبالهم للمولود الجديد مش بيكون مفرح ليهم زي ماكانوا متصورين وممكن يحسوا بأحاسيس سلبية زي الخوف والقلق او الحزن او الاكتئاب.خليكم معانا علشان تعرفوا ايه هي اسباب اكتئاب مابعد الولادة عند الرجالة وازاي يتعاملوا معاها ويتغلبوا عليها وتتحول المشاعر السلبية اللي بيحسوا بيها لمشاعر ايجابية وسوية.

اسباب اكتئاب مابعد الولادة عند الرجل:
-الخوف من مسئولية الابوة واعبائها والقلق من عدم القدرة علي القيام بدور الاب.
-القلق من مسألة زيادة الطلبات المادية مع وجود الطفل خصوصا بعد الزوجة مابتاخد اجازة وضع علشان تهتم بالطفل وبيكون الاب هو
العائل الوحيد للاسرة.
-الضيق من بكاء وسهر الطفل طول الليل اللي اكيد بيسبب قلة نوم واجهاد.
-الشعور بإهمال الزوجة في حقه بسبب انشغالها لفترات طويلة برعاية المولود الجديد خصوصا في الفترة الاولي من بعد الولادة.
-صعوبة تقبل التغيير اللي بيحصل في مظهر الزوجة وزيادة وزنها وقلة اهتمامها بنفسها بسبب انشغالها خصوصا في الشهور الاخيرة من الحمل والفترة الاولي من بعد الولادة.
-الاحساس بعدم وجود ارتباط عاطفي بالمولود بعكس الام اللي بيبدأ ارتباطها بالمولود حتي من قبل الولادة.

اعراض اكتئاب مابعد الولادة عند الرجل ممكن تظهر في صورة:
-شعور مستمر بالحزن والاحباط.
-القلق والغضب المبالغ فيه.
-انعزال عن الناس والمجتمع.
-صعوبة في النوم مع الاحساس بالصداع.
-الانشغال المبالغ فيه بالشغل بهدف الهروب من البيت والعائلة.
-عدم الرغبة في الاكل مع زيادة او نقصان في الوزن.
– صعوبة في التركيز مع ضعف الاداء في الشغل.
-في بعض الحالات ممكن الرجل يتجه للادمان.
ممكن الاب يحس بالاعراض دي قبل الولادة وممكن بعدها علي طول وممكن بعدها بشهور

ازاي تتغلب علي الحالة دي:
-ماتتكسفش انك تطلب المساعدة من اللي حواليك لان علاج المشكلة في الاول افضل من السكوت عليها لانها بتأثر علي
حياتك كلها.
-حاول تخرج من حالة الانعزال وتندمج مع الناس بشكل طبيعي.
-اهتم انك تقرب اكتر من طفلك وتتواصل معاه لان ده هيساعدك انك تتغلب علي مشاعرك السلبية ويحسسك بدورك في حياة طفلك.
-بلاش تسيب كل امور البيت علي زوجتك,حاول تساعدها في حدود مقدرتك لان ده هيخليك تنشغل عن الاكتئاب والتفكير السلبي وكمان
هيدي لزوجتك مساحة من الوقت تقدر تهتم بيك فيها وكمان احساسها انك مهتم بيها هيسعدها وهيخلي علاقتكم احسن وصحية اكتر
وقائمة علي التعاون.
-حاول تتقبل التغييرات اللي حصلت في مظهر زوجتك ولاحظ انها ممكن ترجع لمظهرها الطبيعي قبل الولادة بالاهتمام بالرضاعة
الطبيعية والتمارين الرياضية وممكن تلفت نظرها من وقت للتاني بشكل لطيف انها تهتم بنفسها في حدود اللي تقدر عليه لان ده هيسعدك
وكمان هيديها ثقة في نفسها.
-ادي لنفسك حافز وانت بتشتغل انك تهتم بشغلك وتطور فيه اكتر علشان تحس بنجاحك وكمان علشان مستقبل طفلك لكن ماتخليش
اهتمامك بشغلك ينسيك بيتك وهواياتك وعلاقاتك الاجتماعية.
-حاول تدي لنفسك وقت تمارس فيه هواية او رياضة بتحبها لان ده هيديك طاقة ايجابية هتساعدك في شغلك وبيتك لكن ماتخليش  الموضوع ده يكون وسيلة للهروب من مسئولياتك.

ازاي تتفادي انك تحس باكتئاب مابعد الولادة:
لو كنت مقبل علي انك تستقبل طفل جديد لازم تهيأ نفسك للحكاية دي كويس لانها مسئولية كبيرة وممكن تهيأ نفسك بالحاجات دي:
-اشترك مع زوجتك في شراء مستلزمات المولود ومستلزمات المستشفي وقت الولادة لان ده هيساعدك تهيأ نفسك لمسئوليات الابوة.
-اتناقش مع زوجتك اثناء الحمل  بخصوص الامور المادية الخاصة بالطفل زي مكان المستشفي وحدود المصاريف اللي احوالك المادية
تسمح بيها لان ده هيخفف عنك الاحساس بالقلق بخصوص الاعباء المادية.
-لازم تهيأ نفسك نفسيا لمسألة صعوبة النوم بسبب سهر الطفل واعرف انها مهما كانت حالة مؤقتة وبتنتهي بعد الولادة بفترة لان الطفل
مع الوقت مواعيد نومه بتتظبط.
-لاحظ ان وجود طفل برئ في البيت حاجة جميلة ومفرحة وبتدخل البهجة والسرور علي جو البيت وبتحسسك ان دايما في جديد في
حياتك.

Share.

Comments are closed.