اشترك
like Sofy on Facebook

اكتئاب الشتاء

0

كتير من الناس بيشتكو من حكاية الاكتئاب في فصل الشتاء بسبب تقلبات الجو وبسبب كمان ان النهار بيبدأ يقصر والوقت اللي بتظهر فيه الشمس بتكون اقل ويمكن بسبب الخوف من سوء الاحوال الجوية اللي بيؤدي لقضاء معظم الوقت في البيت والحرمان من الخروج في ظل الجو السئ . تابعو معانا المقال ده عشان تعرفو ايه هي اسباب الشعور بالاكتئاب في فصل الشتاء وعلاج الشعور ده وكيفية الوقاية منه ومين هم الاشخاص الاكتر عرضة من غيرهم للاصابة باكتئاب فصل الشتا وكيفية تجنب التعرض لاكتئاب الشتا.

مين هم الاشخاص الاكتر عرضة للاصابة باكتئاب الشتا:
-المراهقين
-الاشخاص اللي عندهم تاريخ في عائلاتهم للاصابة بالاكتئاب
-الاشخاص اللي بيعيشو في مناطق فترة الشتاء فيها طويلة ومناخها في الشتاء غير مستقر
-النساء اكتر عرضة له من الرجال بسبب التغيرات الهرمونية.
اعراض اكتئاب الشتاء:
-اكتساب الوزن الزايد بسبب الجلوس في البيت
-الشعور بالكسل والتعب
-الرغبة في النوم عدد ساعات اكتر
-رغبة الشخص في الوجود لوحده مدة طويلة
-صعوبة في التركيز
-الرغبة الزيادة في الاكل.

ايه هي الاسباب الطبية للشعور بالاكتئاب في فصل الشتا:
-بعض العلماء بيقولو ان عند بعض الناس بيحصل خلل في الهرمونات في بعض الاوقات من السنة زي بداية فصل الشتاء وده بيسبب
الشعور بالاكتئاب ، وفي اتجاه بيقول ان مع بداية فصل الشتاء وضعف ضوء الشمس بيقل في المخ افراز مادة السيروتونين اللي هي
مسئولة عن تنظيم الحالة النفسية للانسان.ولما بيحصل خلل في افراز المادة دي بيبدأ الشعور بالقلق او الاكتئاب.

ازاي تتعامل مع اكتئاب الشتاء:
-لو حسيت بأي حاجة من الاعراض اللي فوق مع بداية فصل الشتا استشير الطبيب النفسي وهو هيدلك علي التعامل المناسب مع حالتك.
– ممارسة الرياضة وقضاء الوقت في هواية محببة ممكن يساعد في علاج الاكتئاب.
-المشروبات الصحية الدافئة والوجبات المتوازنة ممكن تساعد في علاج الاكتئاب.
-كتير من الدكاترة بينصحو في الحالة دي بالخروج في الصباح الباكر وقضاء بعض الوقت في ضوء الشمس.
-لو كان ضوء الشمس مش متاح خصوصا في الايام شديدة البرودة في الشتاء فالعلاج بالضوء ممكن يكون حل مناسب.

ايه هو العلاج بالضوء:
-العلاج بالضوء بيعمل من خلال توجيه نور قوي بشكل غير مباشر ناحية العين, لما يتم توجيه الضوء ده ناحية عينك المفروض تبعد عنه حوالي 2 متر. الضوء ده بيكون اقوي من نور الاوضة حوالي 20 مرة .بداية تصويب الضوء ده بتكون من 10-15 دقيقة في اليوم في الجلسة الواحدة.وبعدين الوقت بيزيد ل من 30-45 دقيقة في اليوم علي حسب قدرتك واستجابتك.من المهم انك متركزش عينك علي الضوء بشكل مباشر عشان ميضرش عينك.
-عند بعض الناس المصابين باكتئاب الشتا بيتم الشفاء من الحالة دي خلال ايام او اسابيع من بدء العلاج بالضوء وفي ناس بتاخد وقت اطول.في بعض الحالات اللي مش بتستجيب بسرعة بيتم عمل الجلسة مرتين في اليوم. الناس اللي بيستجيبو للعلاج بالضوء بيستمرو فيه لحد ماينتهي فصل الشتا ويبدأ الربيع.

ازاي تتفادي الشعور بالاكتئاب في الشتا؟
لو ماكنتش بتعاني من اكتئاب الشتاء وعايز تتفادي الشعور ده او لو كنت اتعالجت من الحكاية دي ومش عايزها ترجعلك تاني ممكن تتبع النصايح دي:
-ممكن تقضي بعض الوقت من النهار خارج البيت حتي لو الجو مغيم لان حتي النور الضعيف من الشمس ممكن يساعدك
-عرض نفسك للضوء القوي حتي من قبل بداية الشتاء عشان تكون مهيأ نفسيا لاستقباله.
-حاول تاكل اكل صحي وغني بالقيمة الغذائية .
-مارس الرياضة لمدة 20 او 30 دقيقة في اليوم حوالي 5 مرات في الاسبوع لان ده بيديك طاقة ايجابية
-اقضي وقت اكتر مع اصحابك والناس اللي بتحبهم في انشطة اجتماعية مفيدة لان ده بيديك شعور بالتفاؤل واتجنب انك تقعد لوحدك
فترات طويلة لان ده ممكن يخليك فريسة للافكار السلبية زي الشعور باكتئاب الشتا او الاكتئاب بأنواعه.

Share.

Comments are closed.