اشترك
Buy Neuth France products

افكار هتساعدك في التوفيق بين طفلك وشغلك

0

نزولك للشغل من جديد بعد فترة من الولادة اكيد بيشكل عبء نفسي عليكي بسبب احساسك انك مش هتقدري توفقي بين شغلك وبين الطفل ومسئوليات البيت,ويمكن بتحسي بالذنب من ناحية طفلك لانك هتفضلي بعيد عنه ساعات طويلة خلال اليوم وانتي في الشغل لكن في نفس الوقت بتكوني محتاجة انك تنزلي الشغل تاني بسبب رغبتك في تحقيق طموحك ويمكن علشان ظروف بيتك من الناحية المادية بتتطلب منك انك ترجعي شغلك بهدف الربح المادي,من النهاردة مش هتحسي بالذنب من ناحية طفلك بعد نزولك الشغل علشان احنا هنساعدك بشوية خطوات بسيطة انك توفقي بين طفلك وبين الشغل.

-نظمي امورك في شغلك:
اتكلمي مع مديرك قبل نزولك الشغل بمدة كافية بخصوص امكانية انك تشتغلي عدد ساعات اقل او تشتغلي من البيت ولو يوم في الاسبوع,ولو كانت طبيعة شغلك فيها ضغط عصبي شديد او مكان الشغل بعيد عن بيتك فمسئولية التوفيق بين الطفل والشغل هتكون اصعب في الحالة دي وهتحتاج منك مجهود اكبر ويفضل انك تشوفي شغل مايكونش بعيد عن البيت وطبيعته مافيهاش اجهاد نفسي كبير.

-شوفي الطريقة اللي تناسبك في رعاية الطفل:
بعض الامهات لما بيرجعوا الشغل بيفضلوا انهم يودوا الطفل حضانة او يشوفوا واحدة تقعد مع الطفل وبعض الامهات بيفضلوا ان احدي الجدات هي اللي ترعي الطفل وده بيختلف من ام للتانية,علشان كده شوفي الوسيلة اللي تناسبك وتريحك من ناحية القرب من بيتك بحيث انك متاخديش وقت طويل في انك تجيبي الطفل وترجعي بيه وبرضه من الناحية المادية انك تقرري اذا كنتي تقدري تدفعي مصاريف مربية او حضانة,وايا كانت الوسيلة فلازم تكوني مطمنة ان طفلك بياخد الرعاية المناسبة لسنه وصحته.

-توقعي اي ظرف طارئ:
اي طفل معرض انه يتعب وده الطبيعي وممكن يحصل في يوم ان المربية اللي بتقعد مع الطفل تضطر انها تاخد اجازة او تيجي متأخر, طبعا انتي لازم تعملي حساب لكل الامور دي وتشوفي هتتصرفي ازاي.

-نظمي وقتك :
حطي خطة تناسبك بخصوص الحاجات المهمة اللي لازم تعمليها والحاجات اللي ينفع تأجليها ليوم تاني,وحاولي وانتي في الشغل تركزي في الشغل بس وفي البيت تركزي في امور البيت بس لان ده هيريحك من قلق التفكير والضغط العصبي.

-اطلبي النصيحة من اللي حواليكي:
اكيد تعرفي في عيلتك او اصحابك امهات نزلوا الشغل بعد الولادة , شوفي مين فيهم ناجحة في تنظيم وقتها بين الطفل والشغل واسأليها عن خبرتها وطريقتها في التصرف.

-ماتنسيش نفسك:
طول مانتي حاطة نفسك تحت تأثير الضغط العصبي والاجهاد بسبب المسئوليات اللي عليكي عمرك ماهتقدري انك تعمليها كويس,اعرفي انك في الاول وفي الاخر انسانة من حقك تستمتعي ولو بشوية صغيرين من الوقت في حاجة بتحبيها,خدي دوش دافي او اعملي تمرينات بسيطة, كل دي حاجات بتريح من الاجهاد والتوتر.

-تواصلي مع طفلك خلال اليوم:
استغلي وقت الراحة بتاعك وانتي في الشغل في انك تتواصلي مع طفلك من خلال جدته او الحضانة او المربية,سماعك صوت طفلك واطمئنانك انه بخير هيسعدك وهيديكي طاقة ايجابية بس يفضل انك ماتكتريش من المكالمات دي بزيادة علشان ماتكونيش مشتتة في وقت الشغل.

-ماتحمليش نفسك فوق طاقتك:
اعرفي انه من الوارد جدا انك تقصري في مرة من المرات فبلاش تحسي بالاحباط وتعاتبي نفسك ولاحظي ان الغلط او التقصير اللي حصل منك ده هيديكي خبرة في التصرف بعد كده .

Share.

Comments are closed.